Izyakuyiisya
Bakamboni ba Jehova balizizilwe nyika yoonse mbwiizulwa kuti mbantu bayiisya Bbaibbele.
BAMWI inga babayeeyela kuti tabayandi lwiiyo lwamunyika akaambo kakuti babikkila maanu kapati kumulimo wabo wakuyiisya Bbaibbele. Pesi tabuli boobo pe. Mwiiyi kutegwa akonzye kuyiisya bambi bantu, weelede kwiiya kusaanguna, alimwi kuyandika lwiiyo lweelede amalailile. Elyo kunze lyakujana lwiiyo luyandika munyika, Bakamboni ba Jehova kwamyaka minji bagwasyigwa akuyiisya kwiindene-indene alimwi azikolo zyeendelezegwa aba Watch Tower Society. Eezi zyagwasya Bakamboni abamwi-bamwi kuti bayaambele mubukkale bubotu, mukuyeeya, amuzintu zyakumuuya.
Mucikozyanyo, Bakamboni bajisi mulimo mupati muzisi zinji—wakuyiisya bantu batakonzyi kubala naa kulemba akaambo kakubula lwiiyo lweelede. Kutegwa eci cuube-ube, ba Watch Tower Society batalisya lwiiyo lwakubala akulemba.
Mbuli mucisi ca Nigeria atwaambe, cikolo cakuyiisya kulemba akubala calikweendelezegwa a Bakamboni ba Jehova kuzwa mu 1949. Kulembedwe kuti kusika mu 1961, zyuulu zyabantu ku Nigeria bakaciziba kubala, alimwi kuzwa mumwaka wa 1962 kusika mu 1994 abambi bantu bapati kale ibali 25,599 bakayiila muzikolo eezi kubala akulemba. Kuvwuntauzya kwaino-ino kwakatondezya kuti Bakamboni ba Jehova bainda ku 90 pasenti mu Nigeria bakalicizi kubala akulemba, kakuli mumweelwe uceede wabantu bamucisi kwali buyo 50 pasenti. Mucisi ca Mexico iba Watch Tower Society balikweendelezya zikolo zyakuyiisya kubala akulemba kuzwa mu 1946. Mumwaka wa 1994 bantu bainda ku 6,500 bakayiisigwa kubala akulemba. Kutalikila mu 1946 kuyakusika mu 1994 bantu bainda ku 127,000 bakagwasyigwa kuziba kubala akulemba. Zikolo zyakuziba kubala akulemba zyakatalisigwa muzisi zimbi, mbuli Honduras, Bolivia, Cameroon, a Zambia.
Ooku kuyiisya kubala akulemba kanji-kanji kulalemekwa abapati balwiiyo muzisi mokwatalisigwa. Mu Mexico atwaambe, umwi mubelesi wamfulumende wakalemba kuti: “Ndalumba kugwasyilizya kwanu, alimwi mukwiiminina mfulumende ndamutumina mulumbe wabo wakulumba kumulimo wanu mubotu wakugwasya bantu mukuleta mumuni waluzibo kubantu batakonzyi kubala akulemba. . . . Amuzwidilile mumulimo wanu wakuiisya.”
Cikolo ca Mulimo wa Teokrasi
Basicikolo mu Cikolo ca Mulimo wa Teokrasi baiya kubala akwaambaula akati kabuleya
Bakamboni ba Jehova balasoleka kuyaambele mukwiiya nzila zyakupandulula kabotu Bbaibbele kubantu nkaambo balaulemeka kapati mulimo wabo wakuyiisya Bbaibbele. Elyo mbungano aimwi akati kambungano zyabo ziinda ku 75,000 munyika yoonse mbwiizulwa, ilabaa muswaangano ansondo-ansondo wa Cikolo ca Mulimo wa Teokrasi. Boonse Bakamboni bakalembya mucikolo eci, kubikkilizya abantu baciiya balapana ciindi cakupa makani mubufwaafwi kumbele lyabaswiilizi mutwaambo twakubandika twakasalilwa limwi. Eeco ciindi basicikolo bamyaka iliyoonse balalaililwa kutegwa baiye mbokubalwa ambokwaambaulwa akati kabuleya. Abalo bana baniini balakonzya kulembya nobaciziba buyo kubala kuti batambule lwiiyo oolu lwalo lunga lwabagwasya mumasena aambi kubikkilizya akulwiiyo lwakunyika. Bamaiyi banji baamba kuti basicikolo Bakamboni balicizi kukanana kapati.
Mumbungano zyabo balakulwaizya kapati kubala, alimwi mukwasyi omwe-omwe ulakulwazigwa kubaa laibbulali yamukwasyi iijisi mabbuku manji aandeene-andeene
Kunze lyacikolo eci, aimwi mbungano ya Bakamboni ba Jehova ilakulwazigwa kubaa laibbulali mu Ŋanda yabo ya Bwami, naa nkobaswaanganina eeyo iijisi mabbuku aagwasya kwiiya Bbaibbele, mbuli madikisyinali aambi mabbuku aagwasyilizya. Boonse banjila miswaangano ku Ŋanda ya Bwami balakonzya kwiibelesya laibbulali eyi. Mumbungano zyabo balakulwaizya kapati kubala, alimwi mukwasyi omwe-omwe ulakulwaizigwa kubaa laibbulali yamukwasyi iijisi mabbuku manji aandeene-andeene aagwasya bana abapati munzila zyoonse.
Izikolo Zimbi
Iba Watch Tower Society baleendelezya azimbi zikolo zyakuiisya bamisyinali baalumi abamakaintu, alimwi azikolo zyakuyiisya baalumi bajisi milimo yabweendelezi mumbungano zyabo. Eezi zikolo azyalo nzitondezyo zyakuti lwiiyo ncintu cipati kuli Bakamboni ba Jehova.