Mbomunga Mwaiya Kujatikizya Leza

Mulakonzya kwiiya kujatikizya Jehova kwiinda mukubala Bbaibbele. Ikaindi Leza wakasala bantunsi kuti balembe mizeezo yakwe. Imalembe aayo aitwa kuti ndi Bbaibbele. Sunu tulaiya kujatikizya Leza kwiinda mukubala Bbaibbele. Akaambo kakuti Ibbaibbele lijisi jwi naa mulumbe wa Jehova, lilaitwa akuti ndi Jwi lya Leza. Tulakonzya kusyoma nzyolyaamba Bbaibbele nkaambo Jehova tabeji pe. “Takonzya kubeja Leza.” (Ba-Hebrayo 6:18) Ijwi lya Leza lijisi kasimpe.—Johane 17:17.

Ibbaibbele ncimwi cazipego zitaliboteli nzyaakatupa Leza. Lili mbuli lugwalo ndwatumina bana bakwe imuzyali siluyando. Lilatwaambila cisyomezyo ca Leza cakusandula nyika eyi kuti bube busena bubotu bwakukkala—ibe paradaiso. Lilatwaambila zintu nzyaakacita musyule, nzyali mukucita lino alimwi anzyayakucitila bana bakwe basyomeka kumbele. Alimwi lilatugwasya kujana nzila zyakumanizya mapenzi esu ambotunga twajana lukkomano.—2 Timoteo 3:16, 17.

Bakamboni ba Jehova mbalongwe ba Leza; bayoomugwasya kuteelela ncoliyiisya Bbaibbele. Kamubaambila buyo kuti muyanda kwiiya Bbaibbele. Kunyina nobabbadelesya mali kutegwa bacite ceeci. (Matayo 10:8) Kunze lyaboobo, mulakonzya kujanika kumiswaangano ya Bunakristo. Eyi miswaangano icitilwa mumasena aakukombela aategwa Maanda aa Bwami. Ikuti kamujanika kumiswaangano ya Bunakristo, muyoofwambaana kubaa luzibo lwa Leza.

Mulakonzya kwiiya kujatikizya Leza kwiinda muzintu nzyaakalenga. Mucikozyanyo, Ibbaibbele lyaamba kuti: “Leza wakalenga ijulu anyika.” (Matalikilo 1:1) Jehova naakalenga “ijulu,” wakalenga azuba. Ino ono ncinzi ncocitwaambila eco kujatikizya Leza? Citwaambila kuti Jehova ulijisi nguzu kapati. Alikke buyo nguukonzya kubamba cintu canguzu mbuli zuba. Alimwi citwaambila kuti Jehova mmusongo, mbwaanga kwakali kuyandika busongo ikutegwa abambe zuba lyalo ilipa mumuni akukasaala alimwi talimani pe.

Zilenge zya Jehova zitondezya kuti ulatuyanda. Amuyeeye micelo yiindene-indene iiliko anyika. Naakayanda, Jehova naakatupa buyo mucelo omwe—nokuba kutwiimina limwi buya. Pele Jehova wakatupa micelo minji iyiindene-indene kujatikizya mboikomena, insaizi amisyobo alimwi ambwiinona. Eci citondezya kuti Jehova ngu Leza siluyando, mmwaabi, ngusimaanu alimwi ngusilubomba.—Intembauzyo 104:24.