Amuzyibe Mbomweelede Kwiingula

MIBUZYO imwi ili mbuli mabwe aaconcomene mumulonga antela mulwizi. Icibeela cipati camabwe aaya inga tacilibonyi akaambo kakuti cili mumeenda. Ikaambo kapa kuti kubuzyigwe mubuzyo umwi kanji-kanji nkakayandika kapati kwiinda mubuzyo wini.

Noliba leelyo sikubuzya nayandisya kumvwa bwiinguzi, ikucizyiba mbomweelede kwiingula kulakonzya kubikkilizya akuzyiba nzyomweelede kwaamba ambomweelede kuzyaamba. (Joh. 16:12) Zimwi ziindi, mbubwenya mbuli Jesu mbwaakabatondezya baapostolo bakwe, imuntu ulakonzya kayanda kuzyiba makani ngateelede kuzyiba naa aatakonzyi kumugwasya munzila iili yoonse.—Inc. 1:6, 7.

Imagwalo atulailila kuti: “Lyoonse majwi aanu abe aaluzyalo aayaka bamwi kuti muzibe mbomweelede kwiingula muntu.” (Bako. 4:6) Aboobo katutanaingula, tatweelede kubikkila buyo maano nzyotuyanda kwaamba, pele tweelede kuyeeya ambotweelede kuzyaamba.

Amuzyibe Kaambo Ncabuzyila Mubuzyo Sikubuzya

Ba Saduki bakasola kumuca Jesu amubuzyo uujatikizya bubuke bwamwanakazi umwi wakakwetwe ziindi zili mbozibede kubaalumi baindene-indene. Nokuba boobo, Jesu wakalizyi kuti mubwini bantu aaba tiibakali alusyomo mububuke. Aboobo mubwiinguzi bwakwe, wakavwiila mubuzyo wabo kwiinda mukubalulamika mukuyeeya kwabo kwakalubide kwalo kwakabapa kuti bamubuzye mubuzyo ooyo. Cabusongo wakabagwasya kwiinda mukubapandulwida alimwi akubelesya makani aamu Magwalo aazizilwe. Jesu wakabaambila cintu cimwi ncobatakazyi—ibumboni bwakuti Leza uyoobabusya ncobeni bantu bafwide. Basikumukazya bakagambwa abwiinguzi bwakwe cakuti bakayoowa akumubuzya mibuzyo imbi.—Lk. 20:27-40.

Ikutegwa muzyibe mbomweelede kwiingula, andinywe mbubwenya mweelede kuzyiba miyeeyo alimwi atwaambo basikumubuzya ncobabuzyila boobo. Mucikozyanyo, ngomwiiya limwi mukkilasi naa ngomubeleka limwi ulakonzya kumubuzya ncomutasekeleli Kkilisimasi. Nkaambo nzi ncabuzyila boobo? Sena ncobeni muntu ooyo uyanda kuzyiba kaambo ncomutasekeleli antela uyanda buyo kuzyiba naa mulazumizyigwa kulikondelezya? Ikutegwa muzyibe, mweelede kulibuzya icamupa kuti abuzye mubuzyo ooyo. Mpoonya amwiingule munzila yeelede. Alimwi mulakonzya kubelesya coolwe eeci kumutondezya mbotukwabililwa kwiinda mukutobela malailile aamu Bbaibbele kuzintu zijatikizyidwe mukusekelela mazuba ooku eezyo zityompya alimwi akuminya bantu.

Amweezyeezye kuti mwatambwa kwaambila basicikolonyoko makani aajatikizya Bakamboni ba Jehova. Mwamana kwaambaula, balakonzya kumubuzya mibuzyo. Ikuti kaili mibuzyo iitakatazyi, inga cainda kubota kupa bwiinguzi buuba-uba alimwi bugaminide. Ikuti mibuzyo kaitondezya kuti iyeeme atwaambo twakubeja tudumide ooko nkomukkala, inga cainda kubota kuti kamutanaingula mwabapandulwida mubufwaafwi zintu zikonzya kupa kuti bantu kabayeeya boobo atwaambo tupa kuti Bakamboni ba Jehova kabatobela zyeelelo zyamu Bbaibbele. Kanji-kanji, cilagwasya ikubona mibuzyo iili boobo kuba twaambo tweelede kulanganizyigwa ikutali kwiibona mbuli kuti nkumukatazya buyo—nokuba kuti inga yabuzyigwa munzila iiboneka kuba boobo. Aboobo, ibwiinguzi bwanu buyoomupa coolwe cakugwasya bamuswiilila ikuzyiba zintu bamwi nzyobasyoma, ikubaambila makani aaluzi akubapandulwida twaambo twamu Magwalo tutupa kuba alusyomo.

Ino inga mwacita buti ikuti sikumulemba mulimo wakaka kumupa ciindi cakuti mukajanike kumuswaangano wacooko? Kusaanguna, amwaabone kweelana ambwaalanga makani walo. Sena inga cagwasya ikumwaambila kuti kumbele aamazuba inga mwaakubeleka kwaciindi cili mbocibede kwiindilizya aciindi ncomweelede kukotoka? Ikuti mwamupandulwida kuti malailile ngotupegwa kumiswaangano yesu yacooko alatugwasya kuba bantu balomene alimwi babelesi basyomeka, sena eeco inga cagwasya? Ikuti mwamutondezya kuti mulakubikkila maano kuyeeya kwakwe, ambweni awalo uyoozibikkila maano zintu ziyandika kapati mubuumi bwanu akumuzumizya. Pele ino mbuti ikuti kayanda kuti mumucitile cintu cimwi munzila yamavwunze? Cakutainda amumbali, amumukakile akumwaambila kaambo kamu Magwalo ikatondezya lusyomo ndomujisi. Sena inga cagwasya kapati ikuti mwamwaambila kuti, ikuti naa muntu wazumina kwaamba zyakubeja naa kubba naambilwa kucita boobo, nkokuti ulakonzya kumubejekezya naa ikumubbida awalo?

Kulubazu lumwi, ambweni muli basicikolo batatoli lubazu muzintu zimwi kucikolo zitali zyamumagwalo. Amuyeeye kuti ibaiyi ambweni inga kabatazizyi eezyo nzyomusyoma, pele bali amukuli wakubona kuti basicikolo boonse balazitobela zicitwa. Ibuyumuyumu mbomujisi (1) mbwakubikkila maano kuzintu zikonzya kubanyonganya baiyi, (2) ikupandulula lusyomo lwanu cabulemu, alimwi (3) akukakatila kuzintu nzyomuzyi kuti ziyoomukkomanisya Jehova. Ikutegwa muzwidilile mumakani aaya, muyandika kupandulula buya kunze lyakwaamba buyo lusyomo ndomujisi munzila iigaminide. (Tus. 15:28) Ikuti kamucili bana, cakutadooneka bauso naa banyoko bayoomugwasya kulibambila nzyomweelede kwaamba.

Zimwi ziindi inga mwayandika kukazya twaambo tumwi ntwamutamikizya muntu umwi uuli mubweendelezi. Imupulisa, mweendelezi wamfwulumende naa mubetesi ulakonzya kayanda kuti mwiingule mibuzyo imwi iijatikizya kutobela mulawo umwi, mbuli wakutatola lubazu mutwaambo twacisi nkubacita Banakristo antela ikutatola lubazu mukwiimba lwiimbo lwacisi naa kulemeka ndembela yacisi alimwi azimwi buyo. Ino mweelede kwiingula buti? Ibbaibbele litulailila kuti tweelede kucita oobu, “amoyo mutete akuyoowa Leza.” (1 Pet. 3:15) Alimwi amulibuzye imakani aaya ncayandika kubikkilwa maano, mpoonya cabulemu amuzumine kuti masimpe ayelede kubikkilwa maano. Mwamana ncinzi ncomweelede kucita? Mwaapostolo Paulo wakazubulula milawo iikwabilila muntu yaba Roma, aboobo andinywe mulakonzya kwaamba milawo iimukwabilila nomwiingula twaambo tuli boobo. (Inc. 22:25-29) Ambweni makani aajatikizya lusyomo ndobakajisi Banakristo bakusaanguna alimwi andobajisi Bakamboni ba Jehova nyika yoonse mboizulwa alakonzya kumugwasya mweendelezi wamfwulumende ikumvwisya ncomuli alusyomo luli boobo. Antela mulakonzya kumupandulwida ikumvwisya alimwi akuzumina bweendelezi bwa Leza mbokubakulwaizya bantu kutobela milawo iiluleme yakabambwa abantu. (Rom. 13:1-14) Mubukkale buli boobo, itwaambo twamu Magwalo itutondezya lusyomo lwanu ambweni tulakonzya kuteelelwa.

Mbwaabona Magwalo Sikubuzya

Nomuyeeya mbomweelede kwiingula, muyandika kuzyiba mbwaabona Magwalo Aasalala sikubuzya. Jesu wakacita oobo ciindi naakali kwiingula mubuzyo waba Saduki uujatikizya kubuka kwabafwu. Kazyi kuti bakali kuzumina buyo magwalo aa Musa, Jesu wakabelesya cibalo cimwi cili mumabbuku aakusaanguna Osanwe ngaakalemba Musa ikubagwasya kwiinda mukutalika amajwi aakuti: “Awalo Mozesi wakacibikka aatuba cakuti bafu bayoobusigwa.” (Luka 20:37) Andinywe mbubwenya ambweni inga camugwasya kuzubulula zibalo zimwi zyamu Bbaibbele eezyo nzyazumina sikumuswiilila alimwi nzyazyi kabotu.

Ino mbuti kuti sikumuswiilila katalisyomi Bbaibbele? Amubone ncaakacita mwaapostolo Paulo mumakani aakwe ngaakabandika ku Areopagi kweelana ambokulembedwe kubbuku lya Incito 17:22-31. Wakabaambila kasimpe kamu Magwalo kakunyina kuzubulula cacigaminina kuzwa mu Bbaibbele. Kufwumbwa nokwayandika, andinywe mulakonzya kucita mbubwenya. Mumasena amwi mulakonzya kubandika amuntu ziindi zili mbozibede kamutanaunka ku Bbaibbele. Nomubelesya Bbaibbele, ncamaano ikumupa twaambo ncomweelede kubelesya Bbaibbele muciindi cakwiile kwaamba buyo kuti nkaambo ndi Jwi lya Leza. Nokuba boobo, mbaakani yanu njakupa bumboni bulimvwisya kujatikizya makanze aa Leza, mpoonya akugwasya sikuswiilila kuti alibalile ncolyaamba Bbaibbele. Ibbaibbele lili anguzu zyakuzula bantu kwiinda majwi aali oonse ngotunga twaamba swebo.—Heb. 4:12.

“Lyoonse Aaluzyalo”

Elo cileelela kaka kuti babelesi ba Jehova abalo, baambilwa kuti majwi aabo “lyoonse aaluzyalo aayaka bamwi” mbubwenya Jehova mbwali aluzyalo! (Bako. 4:6; Kul. 34:6) Eeci caamba kuti tweelede kwaamba calubomba noliba leelyo nokutayandiki kucita oobo. Majwi eesu ayelede kuti kaamvwika kabotu ikutali aabukali naa aanyemya.

Ibantu banji balikatede kapati amilimo, alimwi lyoonse baambilwa majwi aacisizya moyo. Ciindi notuswaya bantu bali boobo, balakonzya kwaamba cabukali. Ino tweelede kwiingula buti? Ibbaibbele lyaamba kuti: “Kuvuwa kabotu kulalesya bukali.” Ibwiinguzi buli boobo alimwi bulakonzya kumutontozya muntu umwi uujisi twaambo twiindene. (Tus. 15:1; 25:15) Kubantu banyonganizyigwa abuzuba, ikwaambaula calubomba kulakonzya kubakulwaizya kuswiilila makani mabotu ngotubatolela.

Tatujisi ciindi cakukazyanya abantu batakalemeki kasimpe. Muciindi caboobo, makanze eesu ngakubandika kuzwa mu Magwalo abantu aabo ibayootuzumizya kubandika ambabo. Kufwumbwa mbozikonzya kuba zintu, tulizyi kuti tweelede kwiingula calubomba alusinizyo lwakuti zisyomezyo zya Leza iziyandika kapati zilasyomeka.—1 Tes. 1:5.

Zintu Zyakulisalila Azyeezyo Zijatikizya Manjezyeezya

Ciindi sikwiiya Bbaibbele naa musyominyoko namubuzya ncayandika kucita kujatikizya bukkale bumwi, ino mweelede kwiingula buti? Mulakonzya kamucizyi ncomunga mwacita nomwali ndinywe. Pele muntu amuntu weelede kulisalila zintu nzyayanda kucita mubuumi bwakwe. (Gal. 6:5) Mwaapostolo Paulo wakabakulwaizya bantu mbaakali kukambaukila kuti “bazisyome akuziswiilila.” (Balo. 16:26) Eeco ncikozyanyo cibotu ncotweelede kutobela. Imuntu uusala zintu zyakucita kajisi muzeezo wakukkomanisya sikumuyiisya Bbaibbele naa muntu umbi, ooyo muntu uli mukubelekela bantu, tayendi mulusyomo pe. (Gal. 1:10) Aboobo, bwiinguzi buuba-uba inga tabumugwasyi pe ooyo uuyanda kugwasyigwa.

Aboobo, ino mbuti mbomunga mwaingula kweelana amalailile aamu Bbaibbele? Mulakonzya kwaamba njiisyo zigaminide azikozyanyo zijanika mu Bbaibbele. Zimwi ziindi, inga mwamutondezya mbokuvwuntauzyigwa ikutegwa alijanine njiisyo azikozyanyo eezyo. Alimwi mulakonzya kuzibandika njiisyo eezyi kubikkilizya amboziyandika zikozyanyo eezyo, pele ikutali kupa muzeezo wambwakonzya kuzibelesya kweelana apenzi ndyajisi. Amumubuzye muntu ooyo naa kuli kaambo kamwi nkayeeya kuti inga kamugwasya ikusala camaano zintu nzyayanda kucita. Amumukulwaizye ikubona akusala nzila iiyoomukkomanisya Jehova kweelana anjiisyo alimwi azikozyanyo eezyo. Munzila eeyi mumugwasya ‘ikuyiisya miyeeyo yakwe ikusala cibotu acibi.’—Heb. 5:14.

Ikwiingula a Miswaangano Yambungano

Kanji-kanji miswaangano yambungano ya Bunakristo itupa coolwe cakulyaambilida kumeso aabantu boonse kujatikizya lusyomo ndotujisi. Inzila imwi mbotucita boobo nkwiinda mukwiingula mibuzyo. Ino tweelede kwiingula buti? Katujisi makanze aakutembaula naa ikwaamba zintu zibotu kujatikizya Jehova. Mbwaakacita oobo sintembauzyo Davida naakali “akati kambungano.” (Int. 26:12) Aswebo tweelede kwiingula munzila iikulwaizya basyomima, ikubagwasya “kuyandana akucita milimo mibotu” mbubweenya mbwaakakulwaizya mwaapostolo Paulo. (Heb. 10:23-25) Ikuzibalila limwi ziiyo kakucili ciindi kuyootugwasya ikucita oobo.

Nomwapegwa coolwe cakwiingula, amubelesye mabala mauba-uba, aalimvwisya alimwi masyoonto. Mutamanizyi muncali woonse; amubikkile maano akaambo komwe buyo. Ikuti mwaingula cibeela comwe camubuzyo, muyoopa bamwi coolwe cakuti abalo bayungizye. Cilagwasya kapati ikukankaizya magwalo aabikkidwe mumuncali. Nomucita boobo, amusoleke kubikkila maano kucibeela calugwalo ceendelana kapati akaambo kabandikwa. Amwiiye kwiingula mumajwi aanu muciindi cakwiile kubala buya mumuncali. Mutatyompwi pe ikuti kaambo nkomwali kulombozya kwaamba tiimwakaamba mbomwali kuyanda kukaamba. Eeci cilacitika ciindi aciindi kuli umwi aumwi eelyo notwiingula.

Cilisalede kwaamba kuti ikuzyiba mbotweelede kwiingula kulabikkilizya zintu zinji kunze lyakuzyiba buyo bwiinguzi. Bupampu bulayandika. Eelyo kaka cilakatalusya nomwiingula camoyo woonse alimwi munzila iikulwaizya bamwi!—Tus. 15:23.