Cibalo 6

Imwiiyi Mupati Wakabelekela Bamwi

SENA ulacikkomanina eelyo muntu umwi nakucitila cintu cimwi cibotu?— Bantu bamwi balakkomana kapati eelyo bamwi nobabacitila cintu cimwi cibotu abalo. Toonse tulacikkomanina eeci. Mwiiyi Mupati wakalaazyi makani aaya, alimwi lyoonse wakali kubacitila zintu bantu. Wakaamba kuti: ‘Tiindakaboolela kuti ndibelekelwe, pele kuti ndibeleke.’—Matayo 20:28.

Aboobo ikuti katuyanda kuba mbuli Mwiiyi Mupati, ino ncinzi ncotweelede kucita?— Tweelede kubelekela bamwi akubacitila zintu zibotu. Ncamasimpe kuti ibantu banji tabaciti oobu pe. Imasimpe ngakuti, ibunji bwabantu bayanda kuti kababelekelwa lyoonse. Cimwi ciindi nobaba basikutobela Jesu bakalimvwa kuti bakeelede kubelekelwa. Umwi aumwi wakali kuyanda kuba muntu mupati naa uuyandika kwiinda boonse.

Bumwi buzuba Jesu wakali kweenda abasikwiiya bakwe. Nobakanjila mumunzi wa Kapernauma uuli munsi aa Lwizi lwa Galilaya, boonse bakanjila muŋanda. Kabali muŋanda, Jesu wakababuzya mubuzyo wakuti: “Ino ncinzi ncimwali kubuzyanya munzila?” Bakaumuna buyo akaambo kakuti munzila bakali kukazyanya kujatikizya wakali mupati akati kabo.—Marko 9:33, 34.

Jesu wakalizyi kuti cakali cintu cilubide kuti sikwiiya umwi akati kabo ayeeye kuti mmupati kwiinda boonse. Aboobo, mbubwenya mbotwakaiya mucibalo cakusaanguna cabbuku lino, wakaimika mwana musyoonto akati kabo akubaambila kuti beelede kulicesya mbuli mwana ooyo. Nokuba boobo, taakwe nobakaiya ciiyo pe. Aboobo, kakusyeede buyo mazuba masyoonto kuti afwe, Jesu wakabayiisya ciiyo ncobatakali kuyooluba pe. Ino ncinzi ncaakacita?—

Boonse nobakali kulya cakulya antoomwe, Jesu wakanyamuka akusamununa cibaki cakwe caajulu. Wakabweza taulu, walyaanga mucibuno. Mpoonya wakabweza bbavwa akubikka maanzi mulindilyo. Kulangilwa kuti basikwiiya bakwe bakaile kugambwa kujatikizya ncaakali kuyanda kucita. Kabalangilila, Jesu wakaunka kuli umwi aumwi, wafwugama akusanzya matende aakwe. Mpoonya wakapukuta matende aabo ataulu. Kociyeeyela buyo eeco! Ikuti nowakaliko, ino nowakalimvwa buti?—

Basikumutobela tiibakalimvwa kuti cakaliluzi kuti Mwiiyi Mupati ababelekele munzila eeyi. Bakaba aansoni. Petro mane wakakaka kuti Jesu amucitile mulimo ooyu waansi kapati. Pele Jesu wakamwaambila kuti cakali kuyandika kapati kuti aucite.

Kunyina sunu notusanzya matende aabamwi. Pele eeci cakali kucitika ciindi Jesu naakali anyika. Sena ulikazyi kaambo kakapa kuti eeci kacicitika?— Munyika eeyo Jesu abasikumutobela mobakali kukkala, bantu bakali kusama mpato kumatende. Aboobo nobakali kweenda mumazila, imatende aabo akali kutuba buu alusuko. Cakali kutondezya luzyalo ikusanzya lusuko kumatende aamuntu mweenzu wanjila muŋanda.

Pele aciindi eeci kunyina naba omwe akati kabasikwiiya ba Jesu wakalisungula kuti asanzye matende aabeenzinyina. Aboobo Jesu lwakwe wakaucita mulimo ooyo. Kwiinda mukucita boobo, Jesu wakayiisya basikwiiya bakwe ciiyo ciyandika kapati. Bakali kuyandika kuciiya ciiyo eeci. Alimwi eeci nciiyo ncotweelede kwiiya aswebo sunu.

Sena ulicizyi kuti nciiyo nzi?— Naakamana kusama cibaki akukkala alimwi mpaakakkede kutafwule, wakapandulula kuti: ‘Sena mulicizyi ncendamucitila? Mundaamba kuti, Mwiiyi, akuti Mwami. Mwaamba kabotu, nkaambo mbwebede oobo. Eno kuti mebo nde Mwami a Mwiiyi ndamusanzya matende aanu, anywebo muleelede kusanzyanya matende aanu.’—Johane 13:2-14.

Aawa Mwiiyi Mupati wakatondezya kuti wakali kuyanda kuti basikwiiya bakwe kababelekela beenzinyina. Tanaakali kuyanda kuti kabalibikkila buyo maanu beni. Tanaakayanda kuti kabayeeya kuti bakali kuyandika kapati cakuti bakeelede buyo kunoobelekelwa abamwi lyoonse. Wakali kuyanda kuti kabalisungwide kubelekela bamwi.

Sena eeco tiicakali ciiyo cibotu kapati?— Sena unooli mbuli Mwiiyi Mupati akulisungula kubelekela bamwi?— Toonse tulakonzya kucitila bamwi zintu zibotu. Eeci ciyoobapa kukkomana. Pele kwiinda zyoonse, ciyoopa kuti Jesu alimwi a Bausyi bakkomane.

Tacikatazyi pe kubelekela bamwi. Ikuti kobikkila maanu, uyoobona zintu zinji nzyokonzya kucitila bamwi. Lino kociyeeya ceeci: Sena kuli cintu cimwi ncokonzya kucita kutegwa ugwasye banyoko? Ulizyi kuti balakucitila zintu zinji yebo alimwi abambi mumukwasyi. Sena inga wabagwasya?— Kobabuzya umvwe naa kuli nconga wabagwasya.

Ulakonzya kubagwasya kubikka zintu ziyandika aatafwule kamutanatalika kulya antoomwe mumukwasyi. Alimwi ambweni ulakonzya kugusya mitiba njimwali kulida bamanizya kulya boonse mumukwasyi. Ibana bamwi bajisi cilengwa cakupyaanga, kugoma alimwi akusowa matombe aali muŋanda abuzuba. Kufwumbwa ceeco ncokonzya kucita, unoobelekela bamwi mbubwena Jesu mbwaakacita.

Sena ulijisi ibasyoonto bako basankwa alimwi abasimbi mbokonzya kubelekela? Koyeeya kuti, Imwiiyi Mupati, Jesu wakababelekela nobaba basikumutobela bakwe. Kwiinda mukubelekela ibanabokwanu basankwa alimwi abasimbi ibacili basyoonto, unooyiya Jesu. Ino ncinzi nconga wabacitila?— Ulakonzya kubayiisya mbokuyobolwa nzyobasobanya bamana kusobana. Antela ulakonzya kubagwasya kusama zisani. Alimwi ulakonzya kubagwasya kuyala bulo bwabo. Sena kuli cimbi nconga wayeeya ncokonzya kubacitila?— Bayookuyanda eelyo nobacitila zintu eezyi, mbubwenya basikutobela Jesu mbobakamuyanda.

Akwalo kucikolo ulakonzya kucitila bamwi milimo mibotu. Ulakonzya kucitila basicikolonyoko naa bayi bako. Ikuti mabbuku aaumwi aloka, inga wacita kabotu ikuti wamugwasya kwaabwezelela. Ulakonzya kwaambila bayi bako kuti uyanda kubagwasya kumwaya zili kubboodi naa kubacitila cintu cimbi. Nokuba kujatilila cijazyo kutegwa uumbi ainde mmulimo mubotu.

Zimwi ziindi, tuyoobona kuti bantu mbotubelekela tabakatulumbi pe. Sena uyeeya kuti eeci ceelede kutupa kucileka kucitila bamwi zintu zibotu?— Peepe! Ibantu banji kunyina nobakamulumba Jesu kumilimo mibotu njaakacita. Pele eeco kunyina nocakamutyompya akuleka kucita milimo mibotu.

Aboobo tutaleki pe kubelekela bamwi. Katuyeeya Mwiiyi Mupati, Jesu, alimwi akusoleka kutobela citondezyo cakwe lyoonse.

Ikujatikizya magwalo aambi aamba makani aakugwasya bamwi, kobala Tusimpi 3:27, 28; Ba-Roma 15:1, 2; alimwi a Ba-Galatiya 6:2.

[Cifwanikiso icili apeeji 37]

Ino basikutobela ba Jesu bakali kukazyanya nzi?

[Cifwanikiso icili apeeji 39]

Ino nciiyo nzi Jesu ncaakali kuyiisya basikumutobela bakwe?

[Zifwanikiso izili apeeji 40]

Ino ncinzi nconga wacita kutegwa ugwasye bamwi?