Cibalo 12

Jesu Ulatuyiisya Mbotweelede Kupaila

SENA ulaambaula a Jehova Leza?— Jehova uyanda kuti kowambaula anguwe. Nowambaula a Leza, ikwaambaula ooko kwiitwa kuti mmupailo. Jesu kanjikanji wakali kwaambaula a Bausyi bakujulu. Zimwi ziindi wakali kuyanda kuba alikke buyo naakali kwaambaula a Leza. Ibbaibbele lyaamba kuti, cimwi ciindi “Wakatanta kucilundu kuyookomba. Lino naakaba masiku wakalikede nkukonya alike.”—Matayo 14:23.

Ino nkuukuli nkonga waunka koli olikke kutegwa upaile kuli Jehova?— Ambweni ulakonzya kuba olikke akwaambaula a Jehova notanaona masiku. Jesu wakaamba kuti: “Ciindi ncokomba, njila mucimpetu cako, ulijalile kumulyango, ukombe kuli-Uso.” (Matayo 6:6) Sena ulapaila kuli Jehova lyoonse notanaona?— Uleelede kucita oobo.

Alimwi Jesu wakali kupaila naakali aabantu bambi. Eelyo mulongwe wakwe Lazaro naakafwa, Jesu wakapaila abamwi kubusena nkwaakazikkilwa Lazaro. (Johane 11:41, 42) Alimwi Jesu wakali kupaila naakali kuswaangana abasikwiiya bakwe. Sena ulaunka kumiswaangano ooko ikupailwa mipailo?— Kumasena aaya ikanjikanji muntu mupati nguupaila. Weelede kumuswiilila kapati nzyaamba nkaambo uli mukukupailila kuli Leza. Ikuti koswiilila uyookonzya kwaamba kuti “Ameni” kumupailo ooyo. Sena ulicizyi ncocaamba kwaamba kuti “Ameni” kumamanino aamupailo?— Caamba kuti waukkomanina mupailo. Caamba kuti wacizuminizya caambwa akuti uyanda kuti ube mupailo wako anduwe.

Alimwi Jesu wakali kupaila aciindi cakulya. Wakamulumba Jehova akaambo kakujana cakulya. Sena lyoonse ulapaila notanalya cakulya cako?— Ncibotu kuti katumulumba Jehova kucakulya ncatupa katutanatalika kulya. Muntu omwe ulakonzya kupaila ciindi nomulida aantoomwe. Pele, ino mbuti kuti kolya olikke? Alimwi, ino ncinzyi ncokonzya kucita ikuti walya aabantu ibatamulumbi Jehova?— Nokuli boobo weelede kupaila mupailo wako omwini.

Sena lyoonse weelede kupozya buya nopaila? Antela, sena Jehova ulakonzya kukumvwa nopailila mumoyo cakaumuumu?— Tulakonzya kujana bwiinguzi kuli ceeco cakacitikila Nehemiya. Wakali mukombi wa Jehova iwakali kubelekela muŋanda ya Mwami waku Persia wazina lya Aritasasta. Bumwi buzuba Nehemiya wakausa kapati akaambo kakuti wakamvwa kuti malambo aa Jerusalemu, imunzi mupati wabantu bakwe akawisyigwa.

Eelyo mwami naakabuzya Nehemiya ikaambo kakamupede kuusa, Nehemiya katanaingula wakapaila mumoyo. Mpoonya Nehemiya wakaambila mwami kaambo kakamupede kuusa alimwi wakalomba mwami kuti amuzumizye kuunka ku Jerusalemu kuyooyakulula malambo aamunzi. Ino ncinzi cakacitika?—

Inzya, Leza wakawiingula mupailo wa Nehemiya. Imwami wakamuzumizya kuti inga waunka! Alimwi mane mwami wakapa Nehemiya zisamu zinji zyakuyoobelesya kuyakulula malambo. Aboobo Leza ncobeni ulakonzya kwiingula mipailo yesu neliba leelyo notupailila mumoyo.—Nehemiya 1:2, 3; 2:4-8.

Lino kociyeeyela eeci. Sena weelede kukotamika mutwe wako nopaila? Sena weelede kufwugama buya nopaila? Ino uyeeya buti?— Zimwi ziindi Jesu wakali kufwugama naakali kupaila. Zimwi ziindi wakali kucita oobo kaimvwi. Alimwi aziindi zimwi wakalungumana kujulu naakali kupaila mbuli leelyo naakali kupailila Lazaro.

Aboobo, ino eeci caamba nzi?— Inzya caamba kuti mbokkede ciindi nopaila tacili cintu ciyandika kapati pe. Zimwi ziindi ncibotu kukotamika mutwe wako akufwinya. Muziindi zimbi inga wayanda kufwugama buya mbubwenya bwakacita Jesu. Pele koyeeya kuti, tulakonzya kupaila kuli Leza ciindi cili coonse isikati naa masiku, alimwi uyootuteelela. Iciyandika kapati kujatikizya mupailo nkubaa lusyomo lwini-lwini lwakuti Jehova uli mukutuswiilila. Sena ulasyoma kuti Jehova ulaiteelela mipailo yako?—

Ino ncinzi ncotweelede kwaambila Jehova mumipailo yesu?— Kondaambila: Eelyo nopaila, ino inga umwaambila nzi Leza?— Jehova ulatupa zintu zinji kapati izibotu, alimwi cili buyo kabotu kumulumba kujatikizya nzizyo, tee kayi?— Tulakonzya kumulumba kujatikizya cakulya ncotulya. Pele, sena kuli nowakamulumba kujatikizya mboliboneka julu ciindi nokutakwe makumbi, kujatikizya zisamu zyamusyobo wanyanzabili alimwi amaluba-luba?— Nguwakazilenga azyalo eezyi.

Cimwi ciindi, basikwiiya ba Jesu bakamulomba kuti abayiisye mbobeelede kupaila. Aboobo Mwiiyi Mupati wakabayiisya, alimwi wakabatondezya zintu ziyandika kapati nzyobakeelede kupailila. Sena ulizizyi zintu eezyi?— Bweza Bbaibbele lyako ujalule kuli Matayo caandaano 6. In Kutupango 9 kusikila ku 13, tujana ceeco banji ncobaamba kuti Mupailo wa Mwami. Atuubale caantoomwe.

Aawa twiiya kuti Jesu wakatwaambila kuti tweelede kupailila zina lya Leza. Wakaamba kuti tweelede kupailila kuti izina lya Leza lilemekwe, naa lisalazyigwe akubonwa kuti lilisetekene. Ino Leza nguni zina lyakwe?— Inzya, ngu Jehova, alimwi tweelede kuliyanda izina eelyo.

Cabili, Jesu wakatuyiisya kupailila Bwami bwa Leza kuti buboole. Ibwami oobu bulayandika akaambo kakuti buyooleta luumuno anyika alimwi akwiisandula kuba paradaiso.

Catatu, Imwiiyi Mupati wakaamba kuti tweelede kupaila kuti luyando lwa Leza lucitwe anyika mbubwenya mbuli mbolucitwa kujulu. Ikuti naa eeci twacipailila, nkokuti alimwi tweelede kucicita eeco Leza ncayanda kuti tucite.

Alimwi Jesu wakatuyiisya kuti tweelede kupailila cakulya ncotuyandika buzuba abuzuba. Alimwi wakaamba kuti tweelede kwaambila Leza kuti twausa eelyo notwacita zintu zitaluzi akulomba Leza kuti atulekelele. Pele katana tulekelela, tweelede kubalekelela bamwi ikuti kakuli cibi ncobakatucitila. Sena eeco ncuuba-uba kulinduwe kucicita?—

Camamanino, Jesu wakaamba kuti tweelede kupailila kuti Jehova Leza atukwabilile kumubi, Saatani Diabolosi. Aboobo zintu eezyi zyoonse nzintu zibotu nzyotweelede kupailila kuli Leza.

Tweelede kusyoma kuti Jehova ulaiswiilila mipailo yesu. Kunze lyakunoomulomba buyo kuti atugwasye, tweelede kuzumanana kumulumba. Ulakkomana eelyo notulomba zintu nzyotuyanda ncobeni alimwi zyeelede mumupailo. Eelyo uyootupa zintu eezyi zyoonse. Sena ulaasyoma makani aaya?—

Ilulayo lumbi lubotu kujatikizya mupailo lulajanwa ku Ba-Roma 12:12; 1 Petro 3:12; alimwi a 1 Johane 5:14.

[Zifwanikiso izili apeeji 67]

Jesu wakali kupaila naakali alikke . . . alimwi anaakali aabantu bambi

[Cifwanikiso icili apeeji 68]

Nkaambo nzi ncoyelede kwiiswiilila kapati mipailo iipailwa lyamiswaangano?

[Zifwanikiso izili apeeji 69]

Ndiilili nonga wapailila mumoyo mbubwenya mbwaakacita Nehemiya?

[Cifwanikiso icili apeeji 70]

Ino nzyinzi nzyokonzya kwaambila Leza mumupailo?