Amuzumanane Kukkala Muluyando lwa Leza

1, 2. Nkuukuli nkotunga twajana ciyubilo cibotu sunu?

AMWEEZYEEZYE kuti muleenda mumugwagwa ibuzuba nokulibonya kuti kulawa mvwula mpati yaguwo. Kujulu kwasiya mbi makumbi. Imvwula yatalika kumweka, kuzuma alimwi akuwa kapati. Mweendesya kamulombozya kujana mpomunga mwayusa. Kumane, kumbali lyamugwagwa mwabona citungu. Nciyumu, mukati mmuyumu nta alimwi muli buyo kabotu. Elo mwakkomana kaka kuti kuli busena oobo bwakuyusila!

² Tupona muziindi zyamapenzi aali mbuli guwo lipati amvwula. Ibukkale munyika buyaabwiindila kubija. Pele kuli ciyubilo cikwabilila, iciyubilo cinga catukwabilila kukunyonyoodwa limwi. Ino ncinzi? Amubone ncoliyiisya Bbaibbele noliti: “Ndaamba aa-Jehova kuti, Macijilo aangu, ndilinga lyangu, ngu-Leza wangu ngonsyoma.”—Intembauzyo 91:2.

3. Mbuti Jehova mbwanga waba ciyubilo cesu?

³ Amuciyeeyele buyo eeco! Jehova, Imulengi alimwi Mwami wakujulu aanyika ulakonzya kuba ciyubilo cesu. Ulakonzya kutukwabilila, mbwaanga ulaanguzu kapati kwiinda muntu naa cintu cili coonse cinga cayanda kutucisa. Nokuba kuti twaciswa, Jehova ulakonzya kuzimanizya zintu zibyaabi zyoonse zikonzya kutusikila. Mbuti mbotunga twacita Jehova kuba ciyubilo cesu? Tweelede kumusyoma. Kunze lyaboobo, Jwi lya Leza litukulwaizya kuti: “Amukkale muluyando lwa Leza.” (Judi 21) Inzya, tweelede kuzumanana kukkala muluyando lwa Leza, ikuzumanana acaanzyo caluyando a Taateesu wakujulu. Eelyo tulakonzya kusinizya kuti nciyubilo cesu ncobeni. Pele ino mbuti mbotunga twaba acaanzyo eeci?

AMUZIZYIBE NZILA MBWAATONDEZYA LUYANDO LEZA AKUZITOBELA

4, 5. Ninzila nzi zimwi Jehova mbwaatondezya luyando ndwajisi kulindiswe?

⁴ Ikutegwa tuzumanane kukkala muluyando lwa Leza, tweelede kuteelela mbwaatondezya kuti ulatuyanda Jehova. Amuyeeye buyo njiisyo zyamu Bbaibbele zimwi nzyomwaiya mubbuku lino. Mbwali Mulengi, Jehova watupa nyika kauli munzi wesu uukkomanisya. Waizuzya cakulya cinji amaanzi, zilengwaleza, banyama banoneezya alimwi abuyale bweebeka. Mbwali Sikwaanza wa Bbaibbele, Leza wayubununa zina lyakwe alimwi abube bwakwe kulindiswe. Kunze lyaboobo, Ijwi lyakwe litwaambila kuti wakatuma Mwanaakwe uuyandwa anyika, wakazumizya Jesu kuti apenge akutufwida. (Johane 3:16) Alimwi ino cipego eeci caamba nzi kulindiswe? Citupa bulangizi bwabukkale bwakumbele butaliboteli.

⁵ Ibulangizi bwesu bwabukkale bwakumbele alimwi buyeeme aali cimwi ncaacita Leza. Jehova watalisya mfwulumende yakujulu, nkokuti Bwami bwabu Mesiya. Ino-ino buyoomanizya mapenzi oonse alimwi akusandula nyika kuba paradaiso. Amuciyeeyele buyo! Tulakonzya kupona munyika eeyo muluumuno alukkomano kukabe kutamani. (Intembauzyo 37:29) Ciindi eeco kacitanasika, Leza watupa busolozi bwambotweelede kupona munzila yiinda zyoonse kubota lino. Alimwi watupa cipego camupailo, cakuti tulakonzya kwaambaula anguwe aciindi cili coonse abusena kakunyina citusinkilila. Eezyi ninzila zisyoonto buyo Jehova mbwaatondezya kuti ulabayanda banamaleya alimwi andinywe kumugama.

6. Mbuti mbomunga mwacita kujatikizya luyando ndwaamutondezya Jehova?

⁶ Imubuzyo uuyandika kapati ngomweelede kulanga-langa ngwakuti: Ino ndilacita nzi kujatikizya luyando ndwaanditondezya Jehova? Ibanji inga baamba kuti, “Ndeelede kumuyanda ambebo.” Sena mbomulimvwa oobo? Jesu wakaamba kuti imulawo mupati kwiinda yoonse ngwakuti: “Yanda Leza Jehova wako amoyo wako woonse, amoya wako woonse, amumiyeeyo yako yoonse.” (Matayo 22:37) Mmasimpe mulijisi twaambo tunji ncomweelede kumuyanda Jehova Leza. Pele sena kulimvwa kuti luyando luli boobo ndomujisi nceciyandika cilikke mukuyanda Jehova amoyo, moya alimwi amizeezo yanu yoonse?

7. Sena mbomulimvwide ncecintu ciyandika cilikke kutegwa mwaambe kuti mulamuyanda Leza? Amupandulule.

⁷ Mbubwenya mbolupandululwa mu Bbaibbele, luyando ndotujisi kuli Leza teensyi buyo mbotulimvwa pe. Mubwini, nokuba kuti kulimvwa kuti tulamuyanda Jehova kulayandika, ikulimvwa ooko mmatalikilo buyo aaluyando lwini-lwini ndotujisi kulinguwe. Inseke yamucelo ilayandika kapati kutegwa cisamu cizyala micelo eeyo cikomene. Pele ikuti kamuyanda mucelo umwi, sena inga mwazulizya ikuti muntu umwi wamupa buyo nseke yamucelo ooyo? Peepe! Mbubwenya buyo, ikulimvwa kuti tulamuyanda Jehova Leza mmatalikilo buyo. Ibbaibbele liyiisya kuti: “Oku nkokuyanda Leza, kuti twabamba milazyo yakwe, alimwi milazyo yakwe tiili miyumu.” (1 Johane 5:3) Ikutegwa lube lwini-lwini, iluyando ndomujisi kuli Leza lweelede kuzyala micelo mibotu. Lweelede kutondezyegwa mumilimo.—Amubale Matayo 7:16-20.

8, 9. Mbuti mbotunga twatondezya luyando ndotujisi akulumba kuli Leza?

⁸ Tulalutondezya luyando ndotujisi kuli Leza notutobela milazyo yakwe alimwi anjiisyo. Tacikatazyi pe kucita boobo. Muciindi cakuyuma, milawo ya Jehova ibambilidwe kutugwasya kupona buumi bwalukkomano alimwi bukatalusya. (Isaya 48:17, 18) Kwiinda mukutobela busolozi bwa Jehova, tutondezya Taateesu wakujulu kuti tulamulumba ncobeni kuzintu zyoonse nzyaatucitila. Mukubula coolwe, mbasyoonto kapati munyika eeyi yamazubaano ibatondezya kuti balamulumba. Tatuyandi kuba bantu batalumbi mbuli bantu bamwi ibakapona Jesu naakali anyika. Jesu wakaponya basicinsenda bali kkumi, pele omwe buyo nguwakapilukila kuyoomulumba. (Luka 17:12-17) Mmasimpe tuyanda kuba mbuli yooyo omwe wakalumba, ikutali mbuli bali fwuka batakalumba!

⁹ Aboobo, ino mmilawo nzi ya Jehova njotweelede kutobela? Twabandika milawo iili mbwiibede mubbuku lino, pele atwiinduluke misyoonto buyo. Ikutobela milawo ya Leza kuyootugwasya kuzumanana kukkala muluyando lwa Leza.

AMUZUMANANE KUYUMYA CILONGWE CANU A JEHOVA

10. Amupandulule ncociyandika kuzumanana kwiiya kujatikizya Jehova Leza.

¹⁰ Ikwiiya zinji kujatikizya Jehova nintaamu iiyandika mukuba acilongwe ciyumu anguwe. Ncintu cicitwa lyoonse. Ikuti naa muli anze imasiku amwi nokutontola kapati kamuyota mulilo, sena inga mwalekela kuti mulilo ooyo uzime? Peepe. Inga mwazumanana kusosela nkuni kutegwa mulilo uzumanane kuyaka. Kutegwa muzumanane kupona, muyandika kubona kuti mulilo ulayaka! Mbubwenya mbuli nkuni mbozipa kuti mulilo kuuyaka, alwalo “luzibo lwa-Leza” lwini lupa kuti luyando ndotujisi kuli Jehova kaluli luyumu.—Tusimpi 2:1-5.

11. Ino kuyiisya kwa Jesu kwakabapa kulimvwa buti basikumutobela bakwe?

¹¹ Jesu wakali kuyanda kuti basikumutobela bazumanane kuba aluyando lwini-lwini kujatikizya Jehova anjiisyo zibotu zyamu Jwi lyakwe lyakasimpe. Naakabusyigwa, Jesu wakayiisya bobile akati kabasikwiiya bakwe ibusinsimi bumwi bwakali mu Magwalo aa Cihebrayo ngaakazuzikizya. Ino bakalimvwa buti? Kumbele bakati: “Sena myoyo yesu teyali kupya muzyamba zyesu, naali kuza bwaambaula aswebo munzila, aleeliya naali kutupandulwida Magwalo?”—Luka 24:32.

12, 13. (a) Ncinzi cacitika kubanabunji bwabanamaleya kujatikizya luyando ndobajisi kuli Leza a Bbaibbele? (b) Ncinzi ncotweelede kucita kutegwa luyando ndotujisi lutamani?

¹² Nomwakasaanguna kwiiya cini Bbaibbele ncoliyiisya, sena moyo wanu wakatalika kupya alukkomano, busungu alimwi aluyando kuli Leza? Cakutadooneka mbomwakalimvwa oobo. Ibanji mbobakalimvwa oobo abalo. Imulimo uukatazya ngomujisi lino nkubona kuti mwazumanana aluyando oolo alimwi akuyaambele andulo. Tatuyandi kutobela banabunji munyika yasunu. Jesu wakasinsima kuti: “Bantu banji bazooya buleka luyandisyo lwabo.” (Matayo 24:12) Mbuti mbomunga mwabona kuti luyando ndomujisi kuli Jehova anjiisyo zyamu Bbaibbele talumani?

¹³ Amuzumanane kwiiya zya Jehova Leza a Jesu Kristo. (Johane 17:3) Amuzinzibale kuyeeya nzyomwiiya mu Jwi lya Leza, kamulibuzya kuti: ‘Ino eeci cindiyiisya nzi kujatikizya Jehova Leza? Ino ntwaambo nzi tumbi ntocindipa ncondeelede kumuyanda amoyo wangu woonse, mizeezo azyoonse?’ (Amubale 1 Timoteo 4:15) Ikuzinzibala kuyeeya kuli boobo kuyoomugwasya kuzumanana aluyando ndomujisi kuli Jehova cakutayozya-yozya.

14. Mbuti mupailo mbounga watugwasya kuzumanana aluyando ndotujisi kuli Jehova?

¹⁴ Inzila imbi mbomunga mwazumanana kupya aluyando ndomujisi kuli Jehova nkwiinda mukupaila lyoonse. (1 Ba-Tesalonika 5:17) Mu Cibalo 17 cabbuku lino, twakaiya kuti mupailo ncipego ciyandika kapati kuzwa kuli Leza. Mbubwenya zilongwe akati kabantu mbozizumanana kuyaambele kwiinda mukubandika kwakulikwaya, acalo cilongwe cesu a Jehova cilazumanana kuyuma akukkomanisya notupaila kulinguwe lyoonse. Cilayandika kapati kuti tutalekeli mipailo yesu kuba yakwiinzya buyo mulawo—imajwi buyo ngotwiinduluka kakunyina mbotulimvwa alimwi aatatujatikizyi ncobeni. Tweelede kubandika a Jehova mbubwenya mwana muniini mbwabandika abausyi mbayanda kapati. Tweelede kubandika cabulemu, pele cakwaanguluka, cakusinizya alimwi camoyo woonse. (Intembauzyo 62:8) Inzya, ciiyo canu ca Bbaibbele alimwi amupailo uucitwa camoyo woonse nzibeela ziyandika kapati zyabukombi bwesu, alimwi zitugwasya kuzumanana kukkala muluyando lwa Leza.

AMUBUKKOMANINE BUKOMBI BWANU

15, 16. Nkaambo nzi cakweelela ncotweelede kubona mulimo wakukambauka Bwami kuba coolwe cipati akuti ncintu ciyandisi?

¹⁵ Ikwiiya Bbaibbele tobeni alimwi akupaila nzibeela zyabukombi nzyotukonzya kucita tobeni. Pele lino atulange-lange cibeela cabukombi ncotucita kubuleya: ikwaambila bamwi kujatikizya nzyotusyoma. Sena kuli nomwakaambila kale bambi kujatikizya njiisyo zimwi zyakasimpe zili mu Bbaibbele? Ikuti naa mboobo, mwakajisi coolwe citaliboteli. (Luka 1:74) Notwaambila bamwi njiisyo zyakasimpe nzyotwaiya kujatikizya Jehova Leza, tucita mulimo uuyandika kapati wakapegwa Banakristo bakasimpe boonse—imulimo wakukambauka makani mabotu aa Bwami bwa Leza.—Amubale Matayo 24:14; 28:19, 20.

¹⁶ Imwaapostolo Paulo wakabona mulimo wakwe kuti ncintu cakali kuyandika kapati, wakawiita kuti ncintu ciyandisi. (2 Ba-Korinto 4:7) Ikwaambila bantu kujatikizya Jehova Leza alimwi amakanze aakwe mmulimo wiinda yoonse kubota ngomunga mwacita. Mmulimo uucitilwa Simalelo wiinda boonse kubota, alimwi tujana mpindu zibotu kapati kwiinda zimbi zyoonse. Kwiinda mukutola lubazu mumulimo ooyu, mugwasya bantu babombe myoyo kuba acilongwe a Taateesu wakujulu alimwi akutalika kweenda munzila iisololela kubuumi butamani! Kunyina mulimo uumbi uukatalusya mbuli wooyu! Kunze lyaboobo, ikupa bumboni kujatikizya Jehova a Jwi lyakwe kuyumya lusyomo lwanu aluyando ndomujisi kulinguwe. Alimwi Jehova ulakukkomanina kapati kusoleka koonse nkomucita. (Ba-Hebrayo 6:10) Ikujata bubi lyoonse mumulimo ooyo kumugwasya kuzumanana muluyando lwa Leza.—Amubale 1 Ba-Korinto 15:58.

17. Nkaambo nzi mulimo wa Bunakristo ncoubindide kapati sunu?

¹⁷ Cilayandika kapati kwiibaluka kuti mulimo wakukambauka Bwami ulibindide kapati. Ibbaibbele lyaamba kuti: ‘Kambauka makani lyoonse.’ (2 Timoteo 4:2) Ino nkaambo nzi kucita boobo ncokubindide kapati sunu? Ijwi lya Leza litwaambila kuti: “Buzuba bupati bwa-Jehova buli kufwaafwi, ncobeni buli kufwaafwi, bulafwambaana loko kusika.” (Zefaniya 1:14) Inzya, iciindi cili afwaafwi Jehova nayoonyonyoona bukkale oobu boonse. Ibantu beelede kucenjezyegwa! Beelede kuzyiba kuti ecino nceciindi nobeelede kusala Jehova kuba Mwami wabo. Imamanino ‘taakooyoocedelelwa pe.’—Habakuku 2:3.

18. Nkaambo nzi ncotweelede kukomba Jehova mubuleya antoomwe a Banakristo bakasimpe?

¹⁸ Jehova uyanda kuti tumukombe kubuleya antoomwe a Banakristo bakasimpe. Nkakaambo kaako, Jwi lyakwe lyaamba kuti: “Katunga katuyeeyana, katubusyanya-busyanya mukuyandana akucita milimo mibotu. Tutanoonga katuleka kulibunga-bunga, mbuli bamwi mbubaleka, anu kamucenjezyanya twaambo, kamucita obuya lyoonse mbomukubwene kuti buzuba bwa-Kristo buli afwaafwi.” (Ba-Hebrayo 10:24, 25) Notuswaangana abasyomima kumiswaangano ya Bunakristo, tuba acoolwe citaliboteli cakutembaula akukomba Leza wesu ngotuyanda kapati. Alimwi tulayumizyanya akukulwaizyanya.

19. Mbuti mbotunga twabelekela kuyumya zyaanzyo zyaluyando mumbungano ya Bunakristo?

¹⁹ Mbotuswaangana abakombi ba Jehova bambi, tuyumya zyaanzyo zyaluyando acilongwe mumbungano. Cilayandika kuti katubikkila maanu kububotu bwabamwi, mbubwenya Jehova mbwabikkila maanu kububotu mbotujisi. Tamweelede kulangila bulondosi kubasyominyoko. Kamuyeeyede kuti toonse tuliindene mukusima kwesu kwakumuuya alimwi akuti toonse tulalubizya. (Amubale Ba-Kolose 3:13) Amusoleke kuyumya zilongwe abaabo bamuyanda ncobeni Jehova, eelyo muyoojana kuti anywebo muyooyaambele kumuuya. Inzya, ikukomba Jehova antoomwe abanyoko abacizyi bakumuuya kuyoomugwasya kuzumanana kukkala muluyando lwa Leza. Ino mbuti mbwabalongezya Jehova aabo bamukomba cakusyomeka akuzumanana kukkala muluyando lwakwe?

AMUBELEKELE “BUUMI BWINIBWINI”

20, 21. Ino “buumi bwinibwini” ninzi, alimwi ino nkaambo nzi ncobuli bulangizi butaliboteli?

²⁰ Ibulumbu mbwabapa Jehova babelesi bakwe basyomeka mbuumi, pele ino mbuumi buli buti? Sena inga mwaamba kuti muli baumi ncobeni lino? Tobanji inga twaamba kuti inzya tuli baumi. Kayi tulayoya, tulalya alimwi akunywa. Mmasimpe tulapona. Alimwi ziindi notukkomene, tulakonzya akwaamba kuti, “Lino ooku nkokupona ncobeni!” Pele Bbaibbele litondezya kuti munzila yini iiyandika, kunyina muntunsi sunu uupona ncobeni. Ino eeco inga caba buti boobo?

²¹ Jwi lya Leza litukulwaizya ‘kujatisya buumi bwini-bwini.’ (1 Timoteo 6:19) Imajwi aayo atondezya kuti “buumi bwinibwini” ncintu ncotulangila kuyoojana kumbele. Inzya, twaakulondoka, tunoopona ncobeni, nkaambo tunoopona mbwaakakanzide Leza kuti katupona kumatalikilo. Buzuba bumwi twanoopona muparadaiso anyika mubuumi bwini-bwini, muluumuno alimwi alukkomano, tunoojisi “buumi bwinibwini”—nkokuti buumi butamani. (1 Timoteo 6:12) Inzya, oobu mbulangizi butaliboteli!

22. Mbuti mbomunga ‘mwajatisya buumi bwini-bwini’?

²² Ino mbuti mbotunga ‘twajatisya buumi bwini-bwini’? Kutegwa bacite boobo, Paulo wakakulwaizya Banakristo ‘kucita milimo iiluzi’ alimwi ‘akuba bavwubi mukumana milimo mibotu.’ (1 Timoteo 6:18) Aboobo cilasalala kuti izinji ziyeeme ambotuzibelesya njiisyo zyakasimpe nzyotwiiya mu Bbaibbele. Pele sena Paulo wakali kwaamba kuti tubbadalwa “buumi bwinibwini” kwiinda mukucita milimo mibotu? Peepe, nkaambo bulangizi oobo butaliboteli mubwini bulazuzikizyigwa kulindiswe lilikke notutambula “luzyalo” lwa Leza ndotuteelede. (Ba-Roma 5:15) Nokuba boobo, ulakukkomanina Jehova kubapa bulumbu aabo ibamubelekela cakusyomeka. Uyanda kumubona kamupona “buumi bwinibwini.” Ibuumi butamani mulukkomano aluumuno mbobalangila kuyoopona aabo ibazumanana kukkala muluyando lwa Leza.

23. Nkaambo nzi ncociyandika kuzumanana kukkala muluyando lwa Leza?

²³ Umwi aumwi wandiswe weelede kulibuzya kuti, ‘Sena ndikomba Leza kweelana ambwaatondezya kuti mbweelede kukombwa mu Bbaibbele?’ Ikuti naa katusinizya abuzuba kuti mbotumukomba oobo, nkokuti tuli munzila yeelede. Tulakonzya kusyoma kuti Jehova nciyubilo cesu. Uyoobakwabilila bantu bakwe boonse basyomeka mumazuba aamamanino aamapenzi mubukkale oobu. Alimwi Jehova uyootufwutula akutunjizya mubukkale bupya bwabulemu ibuli afwaafwi lino. Elo tuyookkomana kapati kaka kupona iciindi eeco! Alimwi elo tuyookkomana kapati kaka kuti twakasala camaanu mumazuba aano aakumamanino! Ikuti naa mwasala kucita boobo lino, muyoopona “buumi bwinibwini,” nkokuti buumi mbubwenya mbwaakali kuyanda Jehova Leza, lyoonse mane kukabe akutamani!