Mamanino

1, 2. Nkaambo nzi ncociyandika kuba alusyomo lino? Amupe cikozyanyo.

LUSYOMO. Eeli ndibbala libotu liiminina bube bubotu kapati. Nokuba boobo, ciindi notubala bbala eeli, inga twacita kabotu kuyeeya bbala limbi, ilyakuti: “Kufwambaana!” Kayi ikuti katutajisi lusyomo, tweelede kufwambaana kulujana. Alimwi ikuti katujisi lusyomo, tweelede kufwambaana kulukwabilila alimwi akuluyumya. Ino nkaambo nzi?

² Amweezeezye kuti muli mulweendo kwiinda munkanda kuzwa kulubazu lumwi kuya kulubazu lumbi. Mpoonya mufwide nyota kapati. Ciindi nomwajana maanzi, mulaateka akwaabambilila kutegwa atayuminini kuzuba. Kumane, mweelede kuzumanana kuyungizya aambi kutegwa atamani mane mukasike nkomuya. Mazuba aano, toonse tupona munyika bantu mobatabikkili maano kukomba Jehova, munyika lusyomo lwini-lwini—mbubwenya mbuli maanzi aalya—molutajaniki-janiki alimwi lulakonzya kumana cakufwambaana ccita kuti lwakwabililwa alimwi akuyungizyigwa. Lusyomo lulayandika kapati; nkaambo mbubwenya mbotutakonzyi kupona kuti kakunyina maanzi, cilongwe cesu a Jehova cilakonzya kumana ikuti katutajisi lusyomo.—Lom. 1:17.

3. Ncinzi Jehova ncaatupa kutegwa atugwasye kuba alusyomo, alimwi nzyintu nzi zyobilo nzyotweelede kuyeeya kucita?

³ Jehova ulizyi mbociyandika kuti tube alusyomo lino, alimwi ulizyi mbocikatazya mazuba aano kulujana alimwi akuzumanana kuba andulo. Nkakaambo kaako watupa zikozyanyo nzyotukonzya kwiiya. Jehova wakasololela mwaapostolo Paulo amuuya uusalala kulemba kuti: ‘Amwiiye baabo kwiinda mulusyomo akukkazyika moyo ibayookona zyakasyomezyegwa.’ (Heb. 6:12) Alimwi nkakaambo kaako mbunga ya Jehova yatukulwaizya kubeleka canguzu kwiiya zikozyanyo zyabamaalumi abamakaintu basyomeka mbuli zyabaabo mbotwalanga-langa mubbuku eeli. Aboobo, ncinzi ncotweelede kucita lino? Tweelede kuyeeya zyintu zyobilo: (1) Tweelede kuzumanana kuyumya lusyomo lwesu; (2) lyoonse tweelede kuyeeya bulangizi mbotujisi.

4. Mbuti Saatani mbwaatondezya kuti ngusikulwana lusyomo, pele nkaambo nzi ncotuteelede kuyoowa?

⁴ Amuzumanane kuyumya lusyomo lwanu. Lusyomo lulijisi sinkondonyina mupati—Saatani. Mweendelezi wanyika eeyi wapa kuti bweende bwazyintu oobu bube mbuli munkanda mwalo mocili ciyumu kuzumanana kuba alusyomo. Ulaanguzu kapati kutwiinda. Sena tweelede kuyoowa kuti tatukonzyi kuba alimwi akuyumya lusyomo lwesu? Peepe! Jehova ngo Mulongwe mupati wabaabo boonse bayandaula lusyomo lwini-lwini. Utusyomezya kuti kwiinda mukugwasyigwa anguwe, tulakonzya kumukazya Diabolosi alimwi akupa kuti atutije. (Jak. 4:7) Tulamukazya Diabolosi kwiinda mukuba aciindi abuzuba cakuyumya lusyomo lwesu. Munzila nzi?

5. Mbuti bamaalumi abamakaintu basyomeka baambidwe mu Bbaibbele mbobakaba alusyomo? Amupandulule.

⁵ Mbubwenya mbotwabona mubbuku eeli, bamaalumi abamakaintu basyomeka baambidwe mu Bbaibbele, tiibakazyalwa alusyomo pe. Buumi bwabo bupa bumboni bwakuti lusyomo lulaboola akaambo kamuuya uusalala wa Jehova. (Gal. 5:22, 23) Bakali kupailila lugwasyo, alimwi Jehova wakazumanana kuyumya lusyomo lwabo. Atucite mbubwenya mbobakacita, tutalubi kuti Jehova ulapa muuya wakwe cabuuya kuli baabo baulomba alimwi ibacita kweelana amipailo yabo. (Lk. 11:13) Sena kuli zimbi nzyotukonzya kucita?

6. Mbuti mbotukonzya kugwasyigwa kapati aciiyo cesu cazibalo zyamu Bbaibbele?

⁶ Mubbuku eeli, twabandika zikozyanyo zisyoonto buyo zyabaabo ibakali zikozyanyo zibotu zyalusyomo. Nkobali abamwi banji. (Amubale Bahebulayo 11:32.) Cikozyanyo cimwi acimwi—munzila iilibedelede—cilijisi zyintu zibotu nzyotukonzya kwiiya kwiinda aali zyeezyo zilembedwe mubbuku eeli. Ikuti katubala cakubinda muzibalo zyamu Bbaibbele zyaamba bantu ibakatondezya lusyomo, tatukayumyi lusyomo lwesu mbuli mbokuyandika. Kutegwa tugwasyigwe kapati akubala kwesu, tweelede kutola ciindi kutegwa tuzimvwisye zibalo akubona bukkale bujatikizyidwe muzibalo eezyo zyamu Bbaibbele. Ikuti lyoonse katuyeeya kuti bamaalumi abamakaintu aabo batalondokede bakali “kulimvwa mbubonya mbotulimvwa aswebo,” zikozyanyo zyabo ziyakuba zini-zini kulindiswe. (Jak. 5:17) Calweetelelo tulakonzya kweezeezya mbobakali kulimvwa ciindi nobakali kujana buyumuyumu alimwi amapenzi aali mbuli eesu.

7-9. (a) Mbuti bamaalumi abamakaintu ibakajisi lusyomo ibaambidwe mu Bbaibbele mbobakonzya kulimvwa kukomba Jehova mazuba aano? (b) Nkaambo nzi ncotuyandika kuyumya lusyomo lwesu kwiinda muzyintu nzyotucita?

⁷ Alimwi tulayumya lusyomo lwesu kwiinda mukusala kwesu alimwi amuzyintu nzyotucita. Cili boobo akaambo kakuti “lusyomo lunyina milimo lulifwide.” (Jak. 2:26) Amweezeezye buyo bamaalumi abamakaintu mbotwabandika mubbuku eeli mbobakonzya kukkomana ikuti bapegwa kucita mulimo Jehova ngwaatupa kucita mazuba aano!

⁸ Mucikozyanyo, mbuti Abrahamu mbwakonzya kulimvwa ikuti waambilwa kukomba Jehova, kutali kuunka munkanda akukombela acipaililo citaboneki kabotu ciyakidwe amabwe, pele waambilwa kukomba Jehova akati kabakombinyina bakamantene, kukombela mu Maanda aa Bwami mabotu, kujanika kumiswaangano mipati yacooko, kwalo zisyomezyo nzyaakali kubona buyo “kulaale” nkozibandikwa akupandululwa munzila iikkomanisya? (Amubale Bahebulayo 11:13.) Alimwi mbuti Eliya mbwakonzya kulimvwa ciindi naambilwa kuti mulimo wakwe tuujatikizyi kujaya basinsimi bakubeja ba Baala alimwi akuti unakubelekela Jehova kutali aansi aabweendelezi bwamwami mubi siluleyo, pele waambilwa kuti mulimo wakwe ngwakuswaya bantu caluumuno akubaambila mulumbe waluumbulizyo alimwi uupa bulangizi? Cakutadooneka, mbubwenya mbulindiswe, abalo bamaalumi abamakaintu baambidwe mu Bbaibbele inga bakkomana kapati acoolwe cakukomba Jehova mazuba aano.

⁹ Aboobo, atuzumanane kuyumya lusyomo lwesu kwiinda muzyintu nzyotucita. Notucita oobo, tunakwiiya zikozyanyo zyalusyomo zyabamaalumi abamakaintu izyaambidwe mu Jwi lya Leza ilyakasololelwa amuuya. Mbubwenya mbokwaambidwe mumajwi aa Ntalisyo, munzila imwi tuyakulimvwa kuti cilongwe cesu abamaalumi abamakaintu aaba cayuma. Nokuba boobo, ino-ino zilongwe zili boobu ziyakuba zyancobeni.

10. Ndukkomano luli buti ndotuyakujana mu Paradaiso?

¹⁰ Lyoonse amuyeeye bulangizi bwanu. Bamaalumi abamakaintu basyomeka lyoonse bali kuyumizyigwa kwiinda mubulangizi mbwapa Leza. Sena oobo mbocibede akulindinywe? Mucikozyanyo, amweezeezye lukkomano ndomuyakujana ciindi mwaakubona babelesi ba Leza basyomeka kababuka ‘mububuke bwabantu baluleme.’ (Amubale Milimo 24:15.) Mibuzyo nzi imwi njomuyanda kuyakubabuzya?

11, 12. Munyika mpya, mibuzyo nzi imwi njomukonzya kubuzya (a) Abelo? (b) Nowa? (c) Abrahamu? (d) Rute? (e) Abigayeli? (f) Esita?

¹¹ Ciindi mwaakuswaangana a Abelo, sena muyakuyanda kumubuzya bazyali bakwe mbobakabede? Sena muyakuyanda kumubuzya kuti: “Sena kuli buzuba nowakabandikide abakerubimu ibakali kulinda muunda wa Edeni? Sena bakakwiingula?” Mbuti kujatikizya Nowa? Andiza inga mwayanda kubuzya kuti: “Sena wakali kubayoowa Babbabbani? Mbuti mbowakacikonzya kulanganya banyama boonse mubwato?” Mwaakuswaangana a Abrahamu, mulakonzya kumubuzya kuti: “Sena wakaba acoolwe cakubonana a Semu? Ino nguni wakakuyiisya kujatikizya Jehova? Sena cakali ciyumu kusiya munzi wa Uri?”

¹² Abalo bamakaintu basyomeka ibayakubusyigwa mulakonzya kuyanda kubabuzya mibuzyo eeyi: “Rute, ncinzi cakapa kuti ube mukombi wa Jehova?” “Abigayeli, sena wakaliyoowede kumwaambila Nabala mbowakamugwasya Davida?” “Esita, ncinzi cakacitika kulinduwe akuli Moodekai ciindi nozyakamana kucitika zyaambidwe mumakani aali mu Bbaibbele?”

13. (a) Mibuzyo iili buti iilangilwa kubuzyigwa abaabo ibayakubusyigwa? (b) Mulimvwa buti kujatikizya ciindi nomuyakubonana abamaalumi abamakaintu basyomeka bakaindi?

¹³ Cakutadooneka, bamaalumi abamakaintu aabo basyomeka, abalo bayakumubuzya mibuzyo minji. Eelo kaka cinakuli ciindi cikkomanisya kubaambila zyabuumi bwamumazuba aamamanino alimwi a Jehova mbwaakatulongezya ziindi zyamapenzi! Cakutadooneka, bayakukulwaizyigwa kapati baakuzyiba kujatikizya Jehova mbwaakazuzikizya zisyomezyo zyakwe zyoonse. Munyika mpya, tatukapengi kutalika kweezeezya babelesi ba Leza basyomeka baambidwe mu Bbaibbele. Tunakuli antoomwe ambabo mu Paradaiso! Aboobo, amuzumanane kucita zyoonse nzyomukonzya kutegwa bantu aaba babe beni-beni kulindinywe. Amuzumanane kwiiya lusyomo lwabo. Amukkomane ciindi nomubelekela Jehova antoomwe ambabo kabali balongwe banu kukabe kutamani!