CIIYO 2
Rebeka Wakali Kuyanda Kumukkomanisya Jehova
Rebeka wakali mukaintu wakali kumuyanda Jehova. Mulumaakwe wakali Izaka. Awalo wakali kumuyanda Jehova. Ino Rebeka a Izaka bakazyibana buti? Ino Rebeka wakatondezya buti kuti wakali kuyanda kumukkomanisya Jehova? Atwiiye zinji kujatikizya nguwe.
Bazyali ba Izaka bakali ba Abrahamu a Sara. Bakali kukkala munyika ya Kanana, mwalo bantu mobatakali kukomba Jehova. Pele Abrahamu wakali kuyanda kuti mwanaakwe akwate mukaintu wakali kukomba Jehova. Aboobo wakatuma mubelesi wakwe, ambweni Eliezere, kuti akajanine Izaka mukaintu kubusena ibwakali kwiitwa kuti Harani, ikwakali kukkala babbululu ba Abrahamu.
Rebeka wakalilibambilide kubeleka canguzu kuteka maanzi aakupa nkamela
Eliezere wakaunka antoomwe ababelesi bamwi ba Abrahamu. Lwakali lweendo lulamfwu kapati. Bakatolelezya ankamela zili kkumi izyakanyamwide zyakulya alimwi azipego. Ino Eliezere wakali kuyoomuzyiba buti mukaintu ngwaakeelede kusalila Izaka? Ciindi Eliezere ababelesinyina mbaakali limwi nobakasika ku Harani, bakaima amugoti nkaambo Eliezere wakalizyi kuti tacikootola ciindi cilamfwu kuti bantu baboole kuteka maanzi. Wakapaila kuli Jehova akwaamba kuti: ‘Ikuti mukaintu ngonditiilombe maanzi andipe alimwi ape ankamela zyangu kuti zinywe, ndilazyiba kuti ngomukaintu ngoosala.’
Mpoonya Rebeka wakaboola kumugoti. Bbaibbele lyaamba kuti wakali mubotu kapati. Eliezere wakalomba maanzi, mpoonya Rebeka wakaingula kuti: ‘Inzya ndilakupa. Ndilakupa maanzi aakuti yebo unywe alimwi ankamela zyako kuti zinywe.’ Kociyeeyela buyo! Nkamela izilaanyota zinywa maanzi manji kapati, aboobo Rebeka wakeelede kupilukila kumugoti ziindi zinji. Mucifwanikiso ncowabona, ncinzi citondezya kuti mukaintu ooyu ulabeleka canguzu?— Eliezere wakagambwa kubona Jehova mbwaakawiingula mupailo wakwe.
Eliezere wakapa Rebeka zipego zinji zibotu. Rebeka wakaambila Eliezere ababelesinyina mbaakali limwi kuti baunke limwi kuŋanda yabazyali bakwe. Eliezere wakapandulula kaambo Abrahamu ncaakamutumina alimwi a Jehova mbwaakawiingula mupailo wakwe. Mukwasyi wa Rebeka wakakkomana kuti akwatwe kuli Izaka.
Rebeka wakaunka ku Kanana antoomwe a Eliezere akuyookwatwa kuli Izaka
Pele sena uyeeya kuti Rebeka wakali kuyanda kuti akwatwe kuli Izaka?— Rebeka wakalizyi kuti Jehova nguwakatuma Eliezere. Aboobo mukwasyi wakwe nowakamubuzya naa ulayanda kuunka ku Kanana kuyookwatwa kuli Izaka, Rebeka wakaingula kuti: ‘Inzya, ndilayanda kuunka.’ Mpoonya-mpoonya wakaunka a Eliezere. Nobakasika ku Kanana, wakakwatwa kuli Izaka.
Akaambo kakuti Rebeka wakacita eeco Jehova ncaakali kuyanda kuti acite, Jehova wakamulongezya. Nokwakainda myaka minji, Jesu wakazyalwa muzyalani lya Rebeka! Ikuti komukkomanisya Jehova mbuli mbwaakacita Rebeka, uyookulongezya anduwe.