CIIYO 4
Wakakkomanisya Bausyi Alimwi a Jehova
Ino Jefita umusyomezya nzi Jehova?
Mwana wa Jefita wakacita ncobakasyomezya bausyi nokuba kuti tiicakali cuuba-uba kucita boobo
Sena wamubona musimbi uuli mucifwanikiso?— Mwana wa Jefita. Bbaibbele talitwaambili zina lyakwe, pele ncotuzyi ncakuti wakabakkomanisya bausyi alimwi a Jehova. Atwiiye kujatikizya nguwe alimwi abausyi, ba Jefita.
Jefita wakali mwaalumi uuli kabotu alimwi wakabelesya ciindi cinji kuyiisya mwanaakwe kujatikizya Jehova. Wakali mwaalumi singuzu alimwi musololi mubotu. Aboobo, bana Israyeli bakamulomba kuti abasololele kuyoolwana basinkondonyina.
Jefita wakalomba lugwasyo kuli Leza kutegwa bazunde. Jefita wakasyomezya kuti, ikuti bazunde, muntu utiisaangune kuzwa muŋanda yakwe apiluka ulamupa kuli Jehova. Muntu ooyo wakali kuyookkala akubelekela kutente lyakubunganina lya Leza buumi bwakwe boonse. Tempele bwakali busena bantu nkobakali kuunka kuyookomba Leza kaindi. Jefita wakazunda munkondo! Sena ulimuzyi wakasaanguna kuzwa muŋanda yakwe naakapiluka?—
Inzya, wakali mwana wa Jefita! Wakali ngomwanaakwe alikke, aboobo Jefita lino wakeelede kutola mwanaakwe kutente lyakubunganina. Eeci cakamupa kuusa kapati. Pele koyeeya kuti wakasyomezya. Mpoonya mwanaakwe wakaamba kuti: ‘Bataata, mwakamusyomezya Jehova, aboobo mweelede kucita ncomwakasyomezya.’
Mwaka amwaka, beenzinyina bamwana wa Jefita bakali kuunka kumuswaya
Awalo mwana wa Jefita wakaluuside. Kutente lyakubunganina, tanaakali kukonzya kukwatwa akuzyala bana. Pele wakali kuyandisya kuzuzikizya cisyomezyo cabausyi akukkomanisya Jehova. Eeci cakali kuyandika kapati kulinguwe kwiinda kukwatwa naa kuba abana. Aboobo, wakazwa aŋanda akuyookkala kutente lyakubunganina buumi bwakwe boonse.
Sena uyeeya kuti ncaakacita cakabakkomanisya bausyi alimwi a Jehova?— Inzya, cakabakkomanisya! Ikuti komumvwida alimwi akumuyanda Jehova, ulakonzya kuba mbuli mwana wa Jefita. Anduwe uyoobakkomanisya kapati bazyali bako alimwi a Jehova.