Ciyubunuzyo Kuli Johane

Ciindi mwaapostolo Johane naakali mwaange kunsumbu yaku Patimo, Jesu wakamutondezya zilengaano zili 16, naa zitondezyo zyakumbele. Zilengaano eezyi zyakayubununa mboliyoosalazyigwa zina lya Jehova, mbobuyoobola Bwami bwakwe, alimwi aluyando lwakwe mboluyoocitwa aano anyika mbubwenya mbuli kujulu.

Mucilengaano cimwi, Johane wabona Jehova kali acuuno cakwe cabwami cabulemu kujulu, kazingulukidwe abaalu bali 24 ibasamide zisani zituba mpoonya kumitwe basamide misini yangolida. Mumuni wandabo alimwi amuzuzumo zilazwa kucuuno cabwami. Baalu ibali 24 bakotama kumbele lya Jehova akumukomba. Mucilengaano cimbi, Johane wabona nkamu mpati yabantu ibazwa muzisi zyoonse, mumikowa yoonse alimwi amumyaambo yoonse ibakomba Jehova. Mwanaambelele, nkokuti Jesu, ulabeembela akubasololela kumaanzi aabuumi. Mukuya kwaciindi, mucilengaano cimbi, Jesu watalika kulela kali Mwami kujulu, antoomwe abaalu bali 24. Mucilengaano citobela, Johane wabona Jesu kalwana asimwaaba, nkokuti Saatani alimwi amadaimona aakwe. Jesu wabawaalila ansi kuzwa kujulu.

Kumane Johane wabona cifwanikiso cibotu ca Mwanaambelele aba 144,000 kabaimvwi a Cilundu ca Ziyoni. Alimwi wabona amungelo kauluka kuzinguluka nyika, ikwaambila bantu kuti bayoowe Leza akumupa bulemu.

Mucilengaano citobela, nkondo ya Amagedoni ili mukulwanwa. Munkondo eeyi, Jesu ankamu yakwe yabasikalumamba babuzunda bweende bwa Saatani bubyaabi. Mucilengaano camamanino, Johane wabona kweendelana kubotu ikuliko akati kazintu zicitika kujulu alimwi aanyika. Saatani alunyungu lwakwe banyonyoonwa cakumaninina. Boonse kujulu alimwi aanyika balalilemeka zina lya Jehova alimwi akukomba nguwe alikke.