Ino Jesu Nguni?

Jesu ngumwi wabantu bazyibidwe kapati mumakani aakaindi. Nokuba boobo, kunze buyo lyakuzyiba zina lyakwe, bantu banji tabazyi zinji kujatikizya nguwe. Alimwi banji bajisi mizeezo iindene-indene kujatikizya bwini mbwabede Jesu. Ino Bbaibbele lyaamba nzi kujatikizya nguwe?

1. Ino Jesu Nguni?

Jesu ncilenge camuuya cilaanguzu kapati icikkala kujulu. Wakalengwa a Jehova Leza zintu zyoonse kazitanalengwa. Akaambo kaceeci, wiitwa kuti “mutaanzi kuzyalwa kuzilenge zyoonse.” (Bakolose 1:15) Bbaibbele lyaamba Jesu kuti ‘mwana wa Leza simuzyalwaalikke’ nkaambo ngonguwe alikke wakalengwa cacigaminina a Jehova. (Johane 3:16) Jesu wakabeleka antoomwe a Bausyi, nkokuti Jehova, kubagwasyilizya kulenga zintu zimbi zyoonse. (Amubale Tusimpi 8:30.) Jesu wazumanana kuba acilongwe ciyumu a Jehova. Cakusyomeka ulabeleka kali mwaambilizi wa Leza, nkokuti “Ijwi,” kwaambilizya milumbe alimwi amalailile aa Jehova.—Johane 1:14.

2. Ino Jesu wakaboolela nzi anyika?

Myaka iitandila ku 2,000 yainda, camaleele Jehova wakabelesya muuya wakwe uusalala, ikulonzya buumi bwa Jesu kuzwa kujulu kuya mwida lyanakalindu wazina lyakuti Mariya. Munzila eeyi, Jesu wakazyalwa kali muntu. (Amubale Luka 1:34, 35.) Jesu wakaboola anyika kuzooba Mesiya wakasyomezyegwa, naa Kristo, alimwi akuzoofwutula bantu.a Businsimi bwamu Bbaibbele boonse ibujatikizya Mesiya bwakazuzikizyigwa kwiinda mulinguwe, kugwasya bantu kumuzyiba kuti ngu “Kristo, Mwana wa Leza muumi.”—Matayo 16:16.

3. Ino Jesu uli kuli lino?

Naakafwa Jesu, Leza wakamubusya kali cilenge camuuya, mpoonya wakapiluka kujulu. Ooko, “Leza wakamusumpula akumupa cuuno caatala.” (Bafilipi 2:9) Lino, Jesu ulaanguzu zinji zyabweendelezi, Jehova alikke nguumwiinda.

4. Jesu tali Leza Singuzuzyoonse

Ibbaibbele liyiisya kuti nokuba kuti Jesu ncilenge canguzu kapati kujulu, ulalibombya kuli Leza wakwe Jehova, Usyi. Nkaambo nzi ncotwaambila boobo? Atweebelele VIDIYO kutegwa tubone Bbaibbele ncoliyiisya kujatikizya Jesu mbwaindene a Leza Singuzuzyoonse.

VIDIYO: Sena Jesu Kristo Ngu Leza? (3:22)

Magwalo aatobela, alatugwasya kumvwisya kwiindana kuliko akati ka Jehova alimwi a Jesu. Amwaabale, akubandika mibuzyo iitobela:

Amubale Luka 1:30-32.

• Mbuti mungelo mbwaakakupandulula kwiindana kuliko akati ka Jesu a Jehova Leza, “Mupatikampatila”?

Amubale Matayo 3:16, 17.

• Naakali kubbapatizyigwa Jesu, ino jwi lyakazwa kujulu lyakaamba kuti nzi?

• Ino muyeeya kuti lyakali jwi lyani?

Amubale Johane 14:28.

• Nguni mupati alimwi uujisi nguzu zinji, Bausyi naa mwana?

• Ino Jesu wakali kupandulula nzi ciindi naakaamba Jehova kuti Mbaausyi?

Amubale Johane 12:49.

• Sena Jesu uyeeya kuti walo alimwi a Bausyi muntu omwe? Ino nywebo muyeeya buti?

5. Jesu wakatondezya kuti ngu Mesiya

VIDIYO: Jesu Wakabuzuzikizya Businsimi (3:03)

Amubale businsimi bwamu Bbaibbele oobu, akubandika mibuzyo iitobela:

Amubale Mika 5:2 kutegwa muzyibe nkwaakali kuyoozyalilwa Mesiya.b

• Sena kuzyalwa kwa Jesu kwakabuzuzikizya businsimi oobu?—Matayo 2:1.

Amubale Intembauzyo 34:20 a Zekariya 12:10 kutegwa tubone businsimi bwamu Bbaibbele ibwaamba kujatikizya lufwu lwa Mesiya.

• Sena businsimi oobu bwakazuzikizyigwa?—Johane 19:33-37.

• Sena muyeeya kuti Jesu ngowakapa kuti businsimi oobu buzuzikizyigwe?

• Ino eeci cimwaambila nzi kujatikizya Jesu?

MUBUFWAAFWI

Jesu ncilenge camuuya cilaanguzu. Mwana wa Leza alimwi ngu Mesiya.

Ncinzi Ncomwaiya?

• Nkaambo nzi Jesu ncaitwa kuti “mutaanzi kuzyalwa kuzilenge zyoonse”?

• Ino ncinzi ncaakali kucita Jesu katanaboola anyika?

• Ino tuzyi buti kuti Jesu ngo Mesiya?

AMUZYIBE ZINJI

Amwiiye zinji kujatikizya mulimo ngwajisi Jesu mbwali Mesiya.

“Sena Businsimi Bwaamba Mesiya Businizya Kuti Jesu Ngowakali Mesiya?” (Cibalo caaintaneti)

Amubone naa Bbaibbele liyiisya kuti Leza wakazyala Jesu mbubwenya bantu mbobazyala bana.

“Nkaambo Nzi Jesu Ncaitwa Kuti Mwana wa Leza?” (Cibalo caaintaneti)

Amubone kaambo ikatondezya kuti Butatu taili njiisyo yamu Bbaibbele.

“Sena Jesu Ngu Leza?” (Ngazi Yamulindizi, April 1, 2009)

Amubone buumi bwamukaintu umwi mbobwakacinca ciindi naakamana kwiiya ncolyaamba Bbaibbele kujatikizya Jesu.

“Mukaintu mu Juda Ulapandulula Cakamupa Kuti Atalike Kusyoma Bbaibbele” (Sinsimuka!, May 2013)