CIIYO 53
Amusale Zyakulikondelezya Zimukkomanisya Jehova
Jehova ngu “Leza uukkomene.” (1 Timoteyo 1:11) Uyanda kuti katukkomene alimwi akuba abuumi bukkomanisya. Ulakkomana notubikka ciindi ambali kutegwa tulyookezye kumilimo yesu. Muciiyo eeci, tulabona mbotukonzya kucibelesya ciindi cakulyookezya munzila zikonzya kutukkomanisya, kutukatalusya alimwi akupa kuti Jehova akkomane.
1. Ncinzi ncotweelede kuyeeya ciindi notusala zyakulikondelezya?
Ncinzi ncomukkomanina kucita ciindi nomulyookezya? Ibamwi inga bayanda buyo kukkala aŋanda kababala bbuku, kuswiilila nyimbo, kweebelela filimu naa kubelesya Intaneti. Ibambi bakkomanina kuyanzana abalongwe, kweendeenda, kusaya, naa kusobana cisobano cimwi. Kufwumbwa ncotukkomanina, tweelede kusinizya kuti zyakulikondelezya zyesu ‘zilatambulika ku Mwami.’ (Baefeso 5:10) Cilayandika kapati kukamvwisya kaambo aaka akaambo kakuti zyakulikondelezya zinji zidumide zibikkilizya zintu Jehova nzyasulide, mbuli nkondo, kutalilemeka mumakani aakoonana naa mizimo. (Amubale Intembauzyo 11:5.) Ncinzi cikonzya kutugwasya kusala cabusongo mumakani aazyakulikondelezya?
Ikuti twasala balongwe ibamuyanda Jehova, balakonzya kutukulwaizya kapati alimwi akutugwasya kusala kabotu zyakulikondelezya. Kweelana ambotwakaiya mu Ciiyo 48, “ooyo weenda abasongo ulaba musongo.” Kulubazu lumwi, ikuti lyoonse katuyanzana abantu ibatatobeli zyeelelo zya Leza, ‘tuyoojana mapenzi.’—Tusimpi 13:20.
2. Nkaambo nzi ncociyandika kapati kulyeendelezya kujatikizya ciindi ncotubelesya mukulikondelezya?
Nokuba kuti twasala kulikondelezya kuli kabotu, tweelede kucenjela kutegwa tweelebe kubelesya ciindi cinji kukulikondelezya ooko. Buyo-buyo, inga tiitwaba aciindi cinji cakucita zintu ziyandika kapati. Bbaibbele litukulwaizya ‘kucibelsya kabotu ciindi.’—Amubale Baefeso 5:15, 16.
AMWIIYE ZINJI
Atubone mbotukonzya kusala kabotu zyakulikondelezya.
3. Amukutantamuke kulikondelezya ikutali kabotu
Nkaambo nzi ncotweelede kubikkila maano notusala zyakulikondelezya? Atweebelele VIDIYO, akubandika mibuzyo iitobela.
Mbuti zisobano zyakaindi zyakulwana abanyama bakali mbozikozyenye azyakulikondelezya zyamazuba aano?
Muvidiyo, ncinzi Danny ncaakaiya kujatikizya kulikondelezya?
Amubale Baroma 12:9, akubandika mubuzyo ooyu:
Mbuti kapango aaka mbokazijatikizya zyakulikondelezya nzyomusala?
Nzintu nzi zimwi Jehova nzyasulide? Amubale Tusimpi 6:16, 17 alimwi a Bagalatiya 5:19-21. Mwamana kubala lugwalo lumwi alumwi, amubandike mubuzyo ooyu:
Nzintu nzi zyaambidwe mutupango ootu zidumide muzyakulikondelezya zyamazuba aano?
Mbomukonzya kusala cabusongo zyakulikondelezya
Amulibuzye kuti:
Ncinzi? Sena cibikkilizya cintu cili coonse ncasulide Jehova?
Ndilili? Sena cinyonganya zintu ziyandika kapati?
Nguni? Sena cindipa kuyanzana lyoonse abantu ibatamuyandi Jehova?
Cilagwasya kapati kwaatantamuka mapenzi. Nkakaambo kaako ncotweelede kukutantamuka kulikondelezya kuli koonse nkotubona kuti takuli kabotu kulindiswe
4. Amucibelesye kabotu ciindi
Atweebelele VIDIYO, akubandika mubuzyo uutobela.
Nokuba kuti mukwesu muvidiyo tanaakali kweebelela zyakulikondelezya zibyaabi, mbuti mbwaakajatikizyigwa caboola kukubelesya ciindi?
Amubale Bafilipi 1:10, akubandika mubuzyo ooyu:
Mbuti kapango aaka mbokatugwasya kusala ciindi ncotweelede kubelesya muzyakulikondelezya?
5. Amusale zyakulikondelezya zili kabotu
Nokuba kuti zyakulikondelezya zimwi tazimukkomanisyi Jehova, pele kuli zyakulikondelezya zinji izimukkomanisya. Amubale Mukambausi 8:15 alimwi a Bafilipi 4:8, akubandika mubuzyo ooyu:
Nzyakulikondelezya nzi zibotu nzyomukkomanina?
Mulakonzya kulikondelezya alimwi akulyookezya munzila iili kabotu
BAMWI BAAMBA KUTI: “Kunyina cilubide azyakulikondelezya izijatikizya nkondo, kutalilemeka naa mizimo, kufwumbwa buyo kuti kanditaziciti zintu eezyo.”
Ino nywebo muyeeya buti?
MUBUFWAAFWI
Jehova uyanda kuti katusala kabotu, kukkomana alimwi akulikondelezya munzila iili kabotu.
Ncinzi Ncomwaiya?
Nkulikondelezya kuli buti Banakristo nkobeelede kutantamuka?
Nkaambo nzi ncotweelede kucenjela kujatikizya ciindi ncotubelesya mukulikondelezya?
Nkaambo nzi ncomuyanda kusala zyakulikondelezya izimukkomanisya Jehova?
AMUZYIBE ZINJI
Amubone naa nguni uujisi mukuli wakusala zyakulikondelezya zyesu.
“Sena Mulakasya Mafilimu, Mabbuku, naa Nyimbo Zimwi?” (Cibalo caaintaneti)
Amubone mbomukonzya kusala kabotu zyakulikondelezya alimwi aciindi cakulikondelezya.
“Sena Zyakulikondelezya Zyanu Zilagwasya?” (Ngazi Yamulindizi, October 15, 2011)
Mumakani aakuti “Ndakacileka kusalulula,” amubone icakapa kuti mwaalumi umwi acince zyakulikondelezya nzyaakali kukkomanina.
“Ibbaibbele Lilakonzya Kubacinca Bantu” (Ngazi Yamulindizi, July 1, 2010)
Amubone muzyali mbwaasala cabusongo mumakani aazyakulikondelezya zijatikizya mizimo.