‘Mwati Ndaa Makani Buya Kuli Leza?’

“MWATI Ndaa Makani Buya Mebo? Mwati Leza Ulandilanganya Buya?” Oyu wakali ngomutwe wacibalo cimwi cakazwa mu Christianity Today. “Mulimo wangu wabulembi wavwulide kujatikizya penzi lyamacise,” mbwaamba Philip Yancey, iwakalemba cibalo eco. “Lyoonse ndiide kujokelela kumibuzyo njiyonya, mbojene mmuntu waampa-ampa cicisa cakaindi icitabi nociponenena buya. Basikubala mabbuku angu balandizibya mause abo alo aapa kuti nsyome kuti kudooneka kwangu kuliluzi.”

Ambweni anywebo kuli nomweezeezya kuti naa Leza ulamucebuka mubuumi bwenu. Kwalo inga kamwiizi Johane 3:16, yalo yaamba kuti “Leza mbwaakayandisya nyika, wakapa Mwanaakwe simuzyalwa alike.” Antela kuli nomwakaibalide Matayo 20:28, yalo yaamba kuti Jesu wakaboolela “kwaaba buumi bwakwe, bube cinunuzyo cabanji.” Pele inga kamucibuzya kuti, ‘Mwati mebo Leza ulandibona buya? Sena ulandilanganya mebo lwangu kundigama?’ Nkokali kaambo kabotu nkotunga twasyomena kuti ncobeni ulatulanganya, mbuli mbotutibone.