Sena Ncobeni Inga Mwamuyanda Leza?
“TAAKWE muntu uukonzya kubona busyu bwangu akupona.” (Kulonga 33:20) Kunze lyaboobo, kuzwa ciindi ca Bbaibbele, kwanyina bumboni bwakuti kuli ciindi bantu nobakaambawide bwini-bwini anguwe. Sena tacilibonyi kuyuma—nokuba kutakonzeka buya—ikubaa luyando lupati kumuntu ngomutanabwene naa ngumutanamvwide? Sena cilakonzeka ncobeni ikubaa cilongwe caluyando a Mulengi wazyoonse?
Takweelede kudoonekwa pe kuti muntu ulakonzeka ikutangana cilongwe a Leza. Ku Deuteronomo 6:5 tulabala mbucakalaililwa cisi ca Israyeli kuti: “Uleelede kuyandisya Jehova Leza wako amoyo wako woonse, amuuya wako woonse, anguzu lzyako zyoonse.” Kumbele Jesu Kristo wakazoowiindulula mulawo oyu kuli basikumutobela akuyungizya kuti: “Ngooyu mulazyo mutaanzi mupati.” (Matayo 22:37, 38) Sena Bbaibbele inga lilatukulwaizya kuyanda Leza kuti cilongwe cili boobo kacitakonzeki?
Sena Jehova ulangila kuti katumuyanda akaambo buyo kakuti mbwatulailila? Peepe. Leza wakalenga banabukwetene bakusaanguna munzila njobakali kukonzya kumuyanda. Ba Adamu a Eva teebakasinikizigwa buya kumuyanda Mulengi wabo. Icakacitika ncakuti, Leza wakabaabila bukkale bweelede bwalo bwakali kunga bunoobapa kumuyanda kapati. Bakeelede kulisalila beni—ikuswena kuli Leza naa kumutantamuka.
Ba Adamu a Eva bakasala kuzanga. (Matalikilo 2:16, 17; 3:6, 7) Pesi luzubo lwabo lwalo lwakacili kukonzya kutangana cilongwe caluyando a Mulengi.
Ikweenda a Leza Mwini-Mwini
Mucikozyanyo, mu Bbaibbele, Abrahamu waambwa kuti “mulongwaakwe” Leza. (Jakobo 2:23) Nokuba boobo Abrahamu tali alikke iwakali kuyanzene kapati a Leza. Ibbaibbele lyaamba bantu bambi banji batalondokede ibakatondezya luyando lwini-lwini kuli Jehova alimwi “[ib]akali kweenda a-Leza.”—Matalikilo 5:24; 6:9; Jobu 29:4; Intembauzyo 25:14; Tusimpi 3:32.
Ibabelesi ba Leza bakaindi teebakazyalwa aluyando alukakatilo kuli Leza. Bakeelede kulwiiya. Ibuti obo? Ikwiinda mukumuzyiba zina lyakwe lini-lini, lyakuti Jehova. (Kulonga 3:13-15; 6:2, 3) Kwiinda mukuziba kuti nkwali akuti ngo Leza. (Ba-Hebrayo 11:6) Kwiinda mukuzinzibala micito yakwe yaluyando ziindi zinji. (Intembauzyo 63:6) Kwiinda mukwaamba mizeezo yabo mipati mukupaila kuli Leza. (Intembauzyo 39:12) Kwiinda mukwiiya zyabubotu bwakwe. (Zekariya 9:17) Kwiinda mukwiiya kuyoowa kumubisizya, munzila iigwasya.—Tusimpi 16:6.
Sena mulakonzya kuba balongwenyina a Leza akweenda anguwe? Mmasimpe tamukonzi kumubona Leza nokuba kumvwa jwi lyakwe. Nokuba boobo, Jehova ulamutamba ‘kukusekelezegwa mucilao cakwe,’ kukuba mulongwenyina. (Intembauzyo 15:1-5) Aboobo, mulakonzya nywebo ikuyanda Leza.