“Walo Tamunamubwene pe Nekubaboobo Mulamuyandisya”
“Walo tamunamubwene pe nekubaboobo mulamuyandisya, nkabela nomutamuboni sunu mulamusyoma, aboobo mulakondwa alukondo lutaambiki luli abulemu.”—1 PETRO 1:8.
1. Nokuba kuti taakwe aansi aano sunu wakamubwene Jesu, mbuti bantu bazikombelo mbobasola kutondezya kuti balamukomba?
TAAKWE muntu naba omwe uupona sunu anyika wakamubwene Jesu Kristo. Nokuba boobo mamiliyoni aabantu balyaamba kuti balamuyanda. Mwaka amwaka mu January 9, ku Manila, kucisi ca Philippines, cibumbwa ca Jesu Kristo icipati mbuli muntu uupona iciyumwide ciingano cilakwelwa mumigwagwa mucitondezyo cabukombi citegwa ncecipati, alimwi cigambya cizizilwe mucisi. Inkamu zyabantu ziintide inga zilatontana; kuli batantana amitwe mukusola kuti bajate cibumbwa. Iciyobolola bantu banji kuboola kukulemeka cicitika nkusekelela kucitwa. Pele bamwi mbantu boongelezegwa aluyando lwini-lwini ndobajisi kuli Jesu. Citondezyo caceeco balakonzya kabasama ciingano, naa ambweni kuunka nkobaunka kucikombelo lyoonse. Nokuba boobo kukomba mituni kuli boobo inga kwaba buti kukomba kwakasimpe?
2, 3. (a) Mbaani akati kabasikumutobela Jesu ibakamubona biya akumuvwa? (b) Mbaani bambi mumwaanda wakusaanguna ibakamuyanda Jesu akubikka lusyomo mulinguwe, nokuba kuti teebakamubona?
2 Mumwaanda wamyaka wakusaanguna, kwakali zyuulu zyabantu muzyooko zyaba Roma mu Judaya, Samariya, Periya, alimwi a Galileya balo ibakamubona Jesu Kristo akumumvwa. Bakali kuswiilila naakali kupandulula kasimpe kakkazika moyo kajatikizya Bwami bwa Leza. Bakalibonena maleele ngaakacita. Bamwi babaaba bakaba basiciiya bakwe basungweede, ibakali kusyoma kuti ngu “Kristo, Mwana a-Leza muumi.” (Matayo 16:16) Pele aabo mwaapostolo Petro mbaakalembela lugwalo lwakwe lwakusaanguna kwiinda mumuuya teebakali akati kabaaba.
3 Aabo mbaakalembela Petro bakali kukkala muzyooko zyaba Roma mu Ponto, Galatiya, Kapadokiya, Asiya, alimwi a Bituniya—zyoonse zyakali mucisi ca Turkey camazubaano. Kulimbabo Petro wakalemba kuti: “Walo tamunamubwene pe nekubaboobo mulamuyandisya, nkabela nomutamuboni sunu mulamusyoma, aboobo mulakondwa alukondo lutaambiki luli abulemu.” (1 Petro 1:1, 8) Ino bakamuziba buti Jesu Kristo cakuti mane bakasike nkobamuyanda alimwi akusyoma mulinguwe?
4, 5. Mbuti bantu aabo ibatakamubona Jesu mbobakayiya zintu zyakabapa kuti bamuyande akubikka lusyomo mulinguwe?
4 Kulibonya kuti bamwi bakali ku Jerusalemu ciindi mwaapostolo Petro naakapa bukamboni kunkamu yakajanika kupobwe lya Pentekoste mu 33 C.E. Nolyakamana pobwe basiciiya banji bakacaala mu Jerusalemu kutegwa batambule malailile aambi kuzwa kubaapostolo. (Incito 2:9, 41, 42; amukozyanisye a 1 Petro 1:1.) Munyendo zyakupilukila, mwaapostolo Paulo wakakambauka cabusungu akati kabantu bakali kukkala kubusena Petro nkwaakazoolembela lugwalo lwakwe lwa Bbaibbele lwakusaanguna iluulikidwe zina lyakwe.—Incito 18:23; 19:10; Ba-Galatiya 1:1, 2.
5 Ino nkaambo nzi bantu aabo ibatakaninga buzuba bamubona Jesu ncobakamuyandisya boobo? Nkaambo nzi sunu mamiliyoni aabantu bambi nyika yoonse mbwiizulwa ncobamuyandisya kapati?
Izintu Nzyobakamvwa
6. (a) Kuti nomwakamumvwa Petro kapa bukamboni kujatikizya Jesu ku Pentekoste 33 C.E., nomwakaiya nzi? (b) Ino eci cakabajatikizya buti bantu bali 3,000 ibakaliko?
6 Kuti nomwakali ku Jerusalemu ciindi Petro naakaambaula kunkamu eyo yakali kupobwe mu 33 C.E., ino nomwakaiya nzi kujatikizya Jesu? Maleele ngaakacita akasinizya cini-cini kuti wakali mutume wa Leza. Alimwi nomwakamvwa kuti nokuba kuti bantu basicinyonyoono bakali mujayide, Jesu tanaakacilimo mucuumbwe, wakali busidwe akusumpulwa kubikkwa kujanza lyalulyo lya Leza kujulu. Alimwi nomwakamvwa kuti Jesu masimpe ngonguwe ngo Kristo, Mesiya iwakalembedwe abasinsimi. Akuti muuya uusalala wakatililwa basikumutobela kwiinda muli Jesu Kristo kutegwa ndilyonya elyo bacikonzye kupa bukamboni bwazintu zigambya kubantu bazwa mumasi manji Leza nzyaakali kucita kwiinda Mumwanaakwe. Makani ngobakamvwa kuli Petro bantu banji bakajanika ciindi eco akabanjila cakuti ibali 3,000 bakabbapatizigwa baba basiciiya Banakristo. (Incito 2:14-42) Nomwakaliwo awo, sena nomwakabweza ntaamu eyo cakutawayawaya?
7. (a) Kuti nomwakali ku Antiokeya ciindi mwaapostolo Paulo naakali kukambaukila nkuko, ncinzi ncomwakali kunooiya? (b) Nkaambo nzi bamwi bamunkamu eyo ncobakasyoma alimwi akukambaukila beenzinyina makani mabotu?
7 Kuti nomwakali akati kabaabo bakaliwo ciindi mwaapostolo Paulo naakali kuyiisya mu Antiokeya mucooko caba Roma mu Galatiya, ncinzi cimbi ncomwakali kulangilwa kwiiya kujatikizya Jesu? Nomwakamumvwa Paulo kapandulula kuti cisubulo calufwu ncaakapegwa Jesu abaleli baku Jerusalemu cakasinsimwa abasinsimi. Alimwi nomwakabamvwa bakalibonena kubusigwa kwa Jesu kabapa bukamboni. Alimwi naakamunjila majwi aa Paulo naakapandulula kuti kwiinda mukumubusya Jesu kuzwa kubafwu, Jehova wakasinizya kuti oyu wakali Mwanaa Leza cini-cini. Alimwi sena moyo wanu nowatakatontozegwa kwiinda mukwiiya kuti kulekelela kwazinyonyoono ikwakakonzeka kwiinda mulusyomo muli Jesu kuyakusololela kubuumi butamani? (Incito 13:16-41, 46, 47; Ba-Roma 1:4) Nobakabona ncocaamba ncobakali kumvwa, bamwi baku Antiokeya bakaba basiciiya, ibakali kutola lubazu mukukambauka makani mabotu kubantu nokuba kuti kucita boobo kwakali kunoobapa kuti bapenzegwe kapati.—Incito 13:42, 43, 48-52; 14:1-7, 21-23.
8. Kuti nomwakali kumuswaangano wambungano yaku Efeso ciindi nolwakatambulwa lugwalo lwa Paulo ndwaakabalembela, nomwakaiya nzi?
8 Ino atwaambe mwakali kuyanzana ambungano ya Bunakristo yaku Efeso, mucooko caba Roma caku Asiya ciindi lugwalo lwa Paulo ndwaakalemba kwiinda mumuuya nolwakatambulwa abasiciiya? Ncinzi ncomwakali kunooiya kujatikizya mulimo wa Jesu mumakanze a Leza? Mulugwalo olo Paulo wakapandulula kuti zintu zyoonse zyakujulu azyaansi ziyooyanzanisigwa alimwi kuli Leza kwiinda muli Kristo, kuti cipego ca Leza kwiinda muli Kristo cakali kujatikizya bantu bamisyobo yoonse, kuti bantu bakafwide mumeso aa Leza akaambo kazibi zyabo bakali kuba baumi kwiinda mulusyomo muli Kristo, alimwi akuti akaambo kaceeci, cakakonzeka alimwi kuti bantu babe bana ba Leza bayandwa.—Ba-Efeso 1:1, 5-10; 2:4, 5, 11-13.
9. (a) Ncinzi cinga camugwasya kubona ncocaamba Paulo ncaakalemba kuba Efeso? (b) Ino bakwesu ibakali muzyooko zyaba Roma mbaakaamba Petro bakajatikizigwa buti azintu nzyobakali kwiiya izijatikizya Jesu?
9 Sena kulumba kwanu kuzintu zyoonse ezi kwali kunoomupa kuti mumuyandisye kapati Mwanaa Leza? Sena luyando olu lwalikunoocinca buumi bwanu bwabuzuba abuzuba mbuli bwakakulwaizya mwaapostolo Paulo muzyaandaano 4 kusikila ku 6 zya Ba-Efeso? Sena oku kulumba kwanu kwali kunoomupa kulanga kabotu-kabotu zintu nzyomubikka ambele mubuumi? Sena akaambo kaluyando ndomujisi kuli Leza alimwi akumulumba nkomumulumba Mwanaakwe, nomwakacinca buumi bwanu mbuli mbokweelede kucita kuti kucita luyando lwa Leza cibe ncecintu cipati mubuumi bwanu? (Ba-Efeso 5:15-17) Kumakani aanzila njobakajatikizigwa anzyobakali kwiiya Banakristo baku Asiya, Galatiya alimwi abamuzyooko zimbi zyaba Roma, mwaapostolo Petro wakabalembela kuti: “Walo [Jesu Kristo] tamunamubwene pe nekubaboobo mulamuyandisya, . . . mulamusyoma, aboobo mulakondwa alukondo lutaambiki luli abulemu.”—1 Petro 1:8.
10. (a) Ncinzi cakagwasya Banakristo bakusaanguna kuyanda Jesu? (b) Eco inga catugwasya buti andiswe?
10 Kakunyina akudooneka, kuli cimbi icakapa kuti Banakristo bakusaanguna mbaakali kukananina Petro bamuyande Mwanaa Leza. Ino eco cakali cinzi? Ciindi Petro ncaakalemba lugwalo lwakwe lwakusaanguna, kulangilwa kuti kwakali mabbuku aa Makani Mabotu obile—Matayo alimwi a Luka—aakamwaidwe kale. Ibanakristo bamumwaanda wakusaanguna ibatakamubona Jesu, bakali kukonzya kwaabala mabbuku aya aa Makani Mabotu. Andiswe tulakonzya kucita boobo. Aya Makani Mabotu taali azyaano buyo pe; boonse bukamboni bujatikizya ngawo businizya kuti ngamasimpe. Mumagwalo ayo aakalembwa kwiinda mumuuya uusalala, tujana zintu zinji ziyungizya luyandisyo lwesu mu Mwanaa Leza.
Muuya Ngwaakatondezya
11, 12. Ncinzi cibonwa mumuuya ngwaakatondezya Jesu kubantu icinga camupa kumuyanda nywebo?
11 Oomu mumalembe aajatikizya buumi bwa Jesu, twiiya mbwaakali kweendelezya bantu. Muuya ngwaakatondezya ujatikizya moyo wabantu noliba lino nokwainda myaka ili 1,960 kuzwa ciindi naakafwa. Mapenzi aaletwa acinyonyoono abaminya bantu boonse bapona. Mamiliyoni manji aabantu bapenga akaambo kacibi, kuciswa, naa kutyompwa kapati akaambo kazintu zimbi. Kuli boonse aba Jesu waamba kuti: “Amuboole kulindime nyoonse nomukatede nomulemenwa, ndime enti kamulemunune. Amulikulike ijokwe lyangu, mwiiye kwangu, nkaambo ndilibombede, ndi mutete moyo, lino mulakatulukwa mumyoyo yanu, nkaambo ijokwe lyangu lilibulungusene, awalo mukuli wangu muuba.”—Matayo 11:28-30.
12 Jesu wakatondezya lweetelelo kubacete, basinzala alimwi abaabo baumbilidwe. Wakacita maleele aakusanina nkamu zyabantu zipati nokwakali kuyandika kucita boobo. (Luka 9:12-17) Wakabaangulula kuzilengwa zyakali kubacita buzike. Alimwi wakayumya lusyomo lwabo munzila ya Leza yakumana kudyaaminina kuzwa kubulelo alimwi akubweendelezi bwalubono. Jesu tanaakatyompya baabo bakadyaaminidwe kale. Kwiinda muluse aluyando, wakababusya camaanu babombe myoyo. Wakabalemununa bantu aabo bakali mbuli matete aafuyukide alimwi abaabo bakali mbuli kamuni kasuka kayandoozima. Kuzoosikila sunu, izina lyakwe lipa bulangizi nomuba mumyoyo yabaabo batana buzuba bamubona.—Matayo 12:15-21; 15:3-10.
13. Nkaambo nzi nzila njaakeendelezya basizibi Jesu ncoipa kuti bantu bamuyande?
13 Nokuba kuti Jesu taakali kubayanda basikucita zibi, wakali kutondezya lweetelelo kubantu bakali kulubizya, pele bakali kweempwa akulomba lugwasyo kulinguwe. (Luka 7:36-50) Wakali kukkala akulya abantu bakali kusampaulwa abuleya kuti naa wabona kuti inga camujulila nzila yakubagwasya munzila yakumuuya. (Matayo 9:9-13) Akaambo kamuuya ngwaakatondezya, mamiliyoni aabantu bali muciimo ncoona eco ibatanamubwene Jesu bakulwaizigwa kuyanda kumuziba alimwi akusyoma mulinguwe.
14. Ncinzi cimukonda kunzila Jesu njaakali kugwasya bantu ibakali kuciswa, balemene, nobaba bakafwidwa?
14 Inzila Jesu njaakeendelezya bantu bakali kuciswa nobaba baabo bakalemene itondezya kuti wakali siluse alimwi walubomba alimwi wakalijisi nguzu zyakubagwasya. Aboobo ciindi muntu mulwazi wakajisi cinanta mubili woonse naakamusikila akumulomba lugwasyo, Jesu taakamuluwa akaambo kambwaakali kuboneka. Alimwi taakaambila muntu oyu kuti nokuba kuti wakamufwida luse, bulwazi bwakwe bwakasika aciimo mpobutakonzyi kusilikika aboobo kunyina ncaakali kunga ulacita kumugwasya. Oyo mwaalumi wakakombelezya, wakati: “Mwami, kuti koyanda, ulakonzya kundisalazya.” Kakunyina akuwayawaya, Jesu wakatambika janza lyakwe akuguma mwaalumi oyu sicinanta, wamwaambila, wati: “Ndazumina, salazigwa.” (Matayo 8:2, 3) Acimbi ciindi mukaintu umwi akaambo kakuyanda kuponesegwa wakayubilila, wajata cisani cakwe nkocili kumamanino. Jesu wakamweendelezya caluse acakumukulwaizya. (Luka 8:43-48) Alimwi naakabona bantu bali mumalila, wakamufwida luse mukamufwu wakali mubuumba wakafwidwa mwana musankwa ngwaakajisi omwe alikke. Nokuba kuti Jesu wakali kakide kubelesya nguzu nzyaakapedwe kuli Leza kucita maleele aakulijanina cakulya, wakaanguluka kubelesya nguzu ezyo kubusya mwaalumi oyu wakafwide akumupilusya kuli banyina.—Luka 4:2-4; 7:11-16.
15. Ikubala makani aa Jesu akuzinzibala kwaayeeya, inga kwamujatikizya buti?
15 Kwiinda mukubala makani aya alimwi akuzinzibala kuyeeya muuya Jesu ngwaakatondezya, tulatalika kumuyandisya oyu muntu wakaaba buumi bwakwe bwabuntu kutegwa tukakonzye kupona kukabe kutamani. Nokuba kuti tatunamubwene, tulamuyanda alimwi tulayanda kutobela mumukondo wakwe.—1 Petro 2:21.
Kusyoma Kwakwe Muli Leza Cakulibombya
16. Nguni kapati Jesu ngwaakali kubikkila maanu, alimwi wakatukulwaizya kucita nzi?
16 Kunze lyazyoonse ezi, Jesu wakabikkila maanu kapati kuli Wisi wakujulu Jehova Leza alimwi wakatukulwaizya kucita boobo. Wakawaamba mulawo mupati kwiinda milawo yoonse, wakati: “Yanda Leza Jehova wako amoyo wako woonse, amoya wako woonse, amumiyeeyo yako yoonse.” (Matayo 22:36, 37) Wakalaya basiciiya bakwe kuti: “Amube alusyomo lwakuli-Leza.” (Marko 11:22) Ciindi nobakali mumusunko mupati walusyomo lwabo, wakabakulwaizya kuti: “Amulangile akukomba.”—Matayo 26:41.
17, 18. (a) Mbuti Jesu mbwaakatondezya cakulicesya kuti usyoma muli Wisi? (b) Nkaambo nzi ncocili cipati kulindiswe ncaakacita?
17 Jesu lwakwe wakasiya cikozyanyo. Kupaila cali cintu cipati mubuumi bwakwe. (Matayo 14:23; Luka 9:28; 18:1) Ciindi nocakasika cakuti asale bamaapostolo bakwe, Jesu taakalisyoma kuti ulacikonzya alikke kusala nokuba kuti kacili kujulu wakali kweendelezya bangelo boonse. Cakulicesya wakapaila masiku oonse kuli Wisi. (Luka 6:12, 13) Ciindi naakaamba kujatwa akujaigwa, alimwi Jesu wakasungwaala kupaila kuli Wisi. Taakayeeya kuti wakamuzi kabotu Saatani aboobo wakali kukonzya kusupuka kukakole kalikoonse nkaakali kukonzya kuletelwa anguwe oyu mubi. Jesu wakalizi mbokwakali kuyandika kuti azwidilile. Kuti kaalilwa cakali kunooleta masampu cini-cini kuli Wisi! Alimwi bantu bajisi bulangizi bwabuumi kwiinda mucipaizyo cakali kuzoopegwa a Jesu bakali kunooluza kaka!
18 Jesu wakazumanana kupaila—kali abaapostolo bakwe muŋanda yamujulu yaku Jerusalemu alimwi anaakali mumuunda wa Getesemane wakasungwaala kapati kupaila. (Matayo 26:36-44; Johane 17:1-26; Ba-Hebrayo 5:7) Ciindi naakali kupenga acisamu cakupenzezya, taakabasampaula aabo bakali kumupenzya. Pele, wakapailila aabo bakali kucita zintu mukutaziba: “Taata, ubajatile, nkaambo tabezi ncobacita.” (Luka 23:34) Wakali kuyeeya buyo Wisi, “makani aakwe wakaasia mumaanza aamubetesi mubotu.” Majwi aamamanino ngaakaamba kali aacisamu cakupenzezya akali aakupaila kuli Wisi. (1 Petro 2:23; Luka 23:46) Ino tulalumba kapati akaambo kakuti Jesu, kwiinda mukusyoma muli Jehova amoyo omwe, wakamanizya mulimo wakwe cakusyomeka kuli Wisi! Nokuba kuti tatunamubwene Jesu Kristo, tulamuyandisya kaka akaambo kancaakacita!
Kutondezya Luyando Lwesu Kulinguwe
19. Notutondezya luyando kuli Jesu, nzintu nzi nzyotweelede kutantamukila limwi izitayandiki?
19 Ino inga twasinizya buti kuti luyando ndotujisi taluli buyo lwamajwi? Mbwaanga Wisi, Jesu ngwaakali kuyanda wakakasya kupanga zinkozya mpoona akuzikomba, taakwe notunga twaleta bulemu kuli Jesu kuti katusama cinkozya camusyobo oyu mumukosi nokuba kweenda ancico mumigwagwa. (Kulonga 20:4, 5; Johane 4:24) Nokuba kuti katujanika kucikombelo ziindi zinji ansondo, kuti katutatobeli njiisyo zyakwe mumazuba aya amwi ngotutaunki kucikombelo, taakwe notunga twati tulemeka Jesu. Jesu wakati: “Oyo uujisi milao yangu, akwiibamba nguundiyanda. Awalo uundiyanda uyooyandwa Taata.”—Johane 14:21, 23; 15:10.
20. Nzintu nzi zimwi izinga zyatondezya naa tulamuyanda cini-cini Jesu?
20 Ino milawo nzi njaakatupa? Mulawo mupati ngwakukomba Leza mwini-mwini, Jehova walo alikke. (Matayo 4:10; Johane 17:3) Akaambo kalubazu ndwajisi mumakanze a Leza, Jesu alimwi wakaamba kuti tweelede kusyoma mulinguwe kuti Mwanaa Leza alimwi tweelede kulutondezya lusyomo lwesu kwiinda mukutantamuka milimo mibi alimwi akweenda mumumuni. (Johane 3:16-21) Wakatulailila kuyandaula Bwami bwa Leza abululami bwakwe kusaanguna, kuzibikkila maanu kwiinda zintu zyakumubili ziyandika kulindiswe. (Matayo 6:31-33) Wakalailila kuti tuyandane mbweena mbuli mbwaakatuyanda. (Johane 13:34; 1 Petro 1:22) Alimwi wakatutuma mulimo wakuba bakamboni bamakanze aa Leza mbuli mbwaakabede awalo. (Matayo 24:14; 28:19, 20; Ciyubunuzyo 3:14) Nokuba kuti tabanamubwene Jesu, Bakamboni ba Jehova basika kumamiliyoni osanwe sunu balabamba milawo eyo akaambo kaluyando lwini-lwini ndobajisi kulinguwe. Kutamubona nkobatakamubona Jesu taakwe ambokucesya busungu bwabo bwakumvwa. Balayeeya majwi Mwami ngaakaambila mwaapostolo Tomaso kuti: “Nowandibona wasyoma, bali acoolwe abo abatandibwene, nokubaboobo balasyoma.”—Johane 20:29.
21. Mbuti mbotunga twajana mpindu mukujanika ku Ciibalusyo calufwu lwa Kristo icitikacitwe mwaka uno mu Nsondo, mu March 23?
21 Tusyoma kuti muyakuba akati kabaabo nyika yoonse mbwiizulwa ibayakubungana mu Maanda aa Bwami aa Bakamboni ba Jehova lyaakubbila zuba mu Nsondo, mu March 23, 1997, kuyeeya citondezyo cipati kapati caluyando lwa Leza kubantu alimwi akwiibaluka lufwu lwa Mwanaakwe uusyomeka Jesu Kristo. Icaambwa akucitwa ciindi eco ceelede kutupa kuti tumuyandisye Jehova a Mwanaakwe alimwi akuyandisya kubamba milawo ya Leza.—1 Johane 5:3.
Mulaingula Buti?
◻ Mbuti aabo ibakalembelwa bbuku lyakusaanguna lya Petro mbobakamuziba akumuyanda Jesu?
◻ Nzintu nzi zimwi nzyobakamvwa Banakristo bakusaanguna izimukonda?
◻ Ncinzi ncomubona mumuuya ngwaakatondezya Jesu icimupa kuti mumuyandisye?
◻ Nkaambo nzi kusyoma kwa Jesu muli Leza cakulicesya ncocili cintu cipati kulindiswe?
◻ Mbuti mbotunga twatondezya luyando muli Jesu Kristo?
[Zifwanikiso izili apeeji 28, 29]
Tulamuyanda Jesu akaambo kamuuya ngwaakatondezya