Kwavwulisya Kupenga
“NKAAMBO nzi ncokuli kupenga kubyaabi boobu kumuntu amuntu alimwi akubuleya . . . ? Leza weelede kuti kali ngonguwe buya uuiminina buumi bulaa mulimo, pele kanjikanji munyika buumi mbwabuyo, kuli kupenga kutakwe ancokubeda alimwi akubisya kutakwe ancokucitilwa. Sena ambweni oyu Leza uli mbuli bwakamwaamba Nietzsche: ikuti ngusilunya, sikulicengeezya, silweeno, imujayi?”—On Being a Christian, lyakalembwa a Hans Küng.
Mulakonzya kubona kuti silwiiyo lwazya Leza muna Katolika Hans Küng wiide kwaamba penzi libazingide ibanji—ilyakuti nkaambo nzi Leza singuzu zyoonse, siluyando ncanga ulalekela kupenga kunji boobu? Sena tamunamvwide bantu babuzya mubuzyo uli boobu? Kufwumbwa muntu uulaa nkumbu uleetezegwa azeezyo Küng nzyapandulula kuti “mulonga uutaleki kukunka iwabulowa, nkasaalo amisozi, buumba akuyoowa, kulendelelwa alimwi alufwu.” Atwaambe kuti cili mbuli mulonga nuuzula, nokuli cilobe ciyoosya alimwi akuminwa ikwayuminizya maumi aamamiliyoni aabantu ciindi coonse eci cainda.—Jobu 14:1.
Azwide “Makatazyo Buyo Amapenzi”
Amuyeeye buyo kupenga ikuzwa munkondo, kutali buyo macise aayooyo wajatikizigwa lwakwe pele aalo aabaabo basyaala mubuumba, mbuli bazyali abasazinyina babana abambi bacitilwa lunya. Ino-ino iba Red Cross bakaamba kuti: “Mumyaka iili 10 eyi yainda, ibana basika ku 1,500,000 bajaigwa mulumamba.” Mu Rwanda mu 1994, iba Red Cross baluula kuti, “kwakajaigwa myaanda yazyuulu zyabaalumi, bamakaintu abana munzila yalunya alimwi iyakuyaabutobelezya.”
Alimwi tatweelede kwaainda ambali macise aaletwa abantu banyongene ibalalika bana. Umwi mutumbu sikuumbilwa, walo iwakaamba kuti mwanaakwe musankwa wakalijaya naakamana kucitilwa zitondwa kumubelesi sikulela bana wakati: “Mwaalumi oyu iwakacitila mwanaangu zitondwa . . . wakamunyonyoona antoomwe abasankwa bambi bali mbobabede munzila iinyongene iitakwe abweezeezye.” Alimwi mbuti alo macise ngobamvwa ibajaigwa abajayi batakwe bunyeele naa bajayi batobelanya, mbuli baabo bakajatwa mu Britain “ibakabba bantu, kujata bamakaintu, ibakapenzya bulanga akujaya kabatasubulwi kwamyaka iili 25”? Ciindi coonse eci cainda kubaanga kwanyina magolelo aazintu baalumi abakaintu nzyobacita munzila ziindene-indene mukuleta macise amapenzi.—Mukambausi 4:1-3.
Kunze lyazeezi amusanganye amapenzi aaletwa amalwazi aakumoyo akumubili alimwi amacise aataambiki aabuumba bwamikwasyi ciindi bantu nobafwa bacili bana. Kwamana kuli manyongwe aabasinzala naa ibajatikizigwa antenda zitegwa zijatikizya zilengwaleza. Mbasyoonto banga bamukazya Musa kaambo nkaakati myaka yesu iili 70 naa 80 izwide “makatazyo buyo amapenzi.”—Intembauzyo 90:10.
Sena Ncibeela Camakanze aa Leza?
Sena inga kacinooli mbuli mbobataminina bamwi, ikuti kupenga oku kutamani ncibeela camakanze amwi a Leza aatateeleleki? Sena tuleelede kuti tupenge lino kutegwa tukalumbe buumi ‘bwamunyika mpya’? Sena mmasimpe, mbuli sibusongo mu French Teilhard de Chardin mbwaakali kusyoma, ikuti “kupenga ooko kuleta lufwu akubola, ncintu ciyandika kumuntu kutegwa akonzye kupona akuba muuya”? (The Religion of Teilhard de Chardin; ndiswe twasendeka mabala.) Tacikonzyi pe kuba boobo!
Sena inga sikwaanza siluse inga acaali walenga cilawo cantenda akulitaminina kuti ngusiluse ciindi navwuna bantu kuntenda zyaco? Nee! Ino acitile nzi cintu cili boobo Leza siluyando? Aboobo ino nkaambo nzi Leza ncalekelede kupenga? Mwati kupenga kuli nokuyoomana? Icibalo citobela ciyooibandika mibuzyo eyi.
[Nkotwakajana cifwanikiso icili apeeji 3]
WHO photo by P. Almasy