Amuboole Kumuswaangano Wacooko wa “Lusyomo mu Jwi lya Leza”!
MAMILIYONI aabantu aali mbwaabede ayakujanika kumyaanda-myaanda yamasena kuzingulika nyika yoonse. Mu Zambia mwalo, kwabambwa masena aamiswaangano aali 47. Wakusaanguna uyakuba mu August 11-13 mpoona wamamanino, uyakuba mu August 29-31. Kulangilwa kuti aamiswaangano yamazuba otatwe eeyi—kuzwa Mubuzuba Bwakusaanguna kusikila Mubuzuba Bwamamanino—kuli omwe uuni kuli kumbali ankomuzwa.
Muyakukkomana amalaile aabeleka aa mu Bbaibbele aatalivwulili. Mumasena manji iprogilamu inakutalika lyoonse cifwumofwumo anyimbo aciindi ca 9:30. Mubuzuba Bwakusaanguna mafwumofwumo kuya kuba kubuzya-buzya kwa maminiti aali 25 kubantu bakacinca maumi aabo kwiinda mukubaa lusyomo mu Jwi lya Leza. Cibeela eeco cakusaanguna ciyakumanaa nkani yamutwe wamakani wakuti, “Kweenda Kulusyomo Kutali Kukubona.”
Makani aakusaanguna Mubuzuba Bwakusaanguna kumazuba ayakujatikizya lubazu lupati bakubusi ndobajisi mubungano ya Bunakristo. Makani aaya kutobela ngakusiilana muzibeela zyotatwe aamba zyeelelo zya Bbaibbele mbozijatikizya kulilemeka kwa Bunakristo mumibandi, ziyanza, alimwi ansamino. Makani aakuti “Amukucenjelele Kubula Lusyomo” alimwi aakuti “Ijwi lya Leza Lili Abuumi” ayakutobela kaamba kulaya kubotu kujanika ku Ba-Hebrayo zyaandaano 3 alimwi a 4. Progilamu ya Buzuba Bwakusaanguna iyakumanisigwa amakani aakuti “Ibbuku lya Bantu Boonse.”
Makani aakusaanguna mu Buzuba Bwabili cifwumofwumo anikuli aakuti, “Lusyomo Lutajisi Milimo Lulifwide.” Aambi makani mabotu mafwumofwumo aayo anikuli aakuti, “Amuzyate Akuyakwa Mukasimpe,” aamba kukomena kwakumuuya mbokunga kwazwidilizigwa. Cibeela eeci ciyakumana amakani aamuswaangano aalyoonse aakuti, “Lusyomo mu Jwi lya Leza Lutola Kukubbapatizigwa,” mpoona kumamanino kuya kuba kubbapatizigwa kwabasikwiiya bapya.
Makani aaya kujula mu Buzuba Bwabili kumazuba ngakuti, “Amululwanine Acanguzu Lusyomo,” aaya kubandika lulayo lwamu Bbaibbele mubbuku lya Juda. Imakani aakusiilana aajisi mutwe wamakani wakuti “Katuya Kuŋanda ya Jehova,” aya kulanga-langa bubotu bwa Miswaangano ya Bunakristo kwa oola lyomwe likkwene. Progilamu yabuzuba oobu iyakumanaa makani aakuti “Lusyomo Lwenu—Lwasunkwa Lino.”
Progilamu ya Buzuba Bwatatu mafwumofwumo iyakubaa makani aakusilaana mumbazu zyotatwe aaya kukanana bbuku lya mu Bbaibbele lya Joeli, alimwi ambolitujatikizizye mazubaano. Mpoona kuya kutobela cisobano camu Bbaibbele camutwe wamakani wakuti “Liso Lyanu Kamulilulamikide.” Makani mapati amwi aamuswaangano makani aakubuleya aakumazuba aakuti, “Ilusyomo Mboluswaangene Abuumi Bwanu Bwakumbele.”
Masimpe muyakulisigwa kabotu munzila yakumuuya kwiinda mukujanika. Muyakutambulwa camaanza obilo acibeela cimwi acimwi. Amulibambile ono kuyakujanika. Kwaamba zyabusena buli munsi ankomuzwa kuyakucitilwa muswaangano, amubuzye aa Ŋanda ya Bwami ya Bakamboni ba Jehova nkomuzwa antela mulembele basikumwaya ba magazini eeyi.