Nomikwasyi, Amutembaule Leza Mumbungano Yakwe
“Ndatembaula Jehova akati kambungano.”—INTEMBAUZYO 26:12.
1. Ncibeela nzi cimbi cabukombi bwakasimpe iciyandika kapati kunze lyakwiiya alimwi amupailo zicitilwa aŋanda?
IKUKOMBA Jehova takujatikizyi buyo kupaila akwiiya Bbaibbele aŋanda pe, pele kulajatikizya amilimo kamuli lubazu lwambungano ya Leza. Ibana Israyeli bansiku bakalaililwa kuti ‘babunganye bantu boonse, baalumi abanakazi abana,’ kuti baiye mulawo wa Leza ikutegwa beende munzila yakwe. (Deuteronomo 31:12; Joshua 8:35) Ibapati alimwi ‘abalombe bakubusi abakamwale’ bakakulwaizigwa kutola lubazu mukutembaula izina lya Jehova. (Intembauzyo 148:12, 13) Ibubambe mbubonya obo bulabeleka mumbungano ya Bunakristo. Mu Ŋanda zya Bwami nyika yoonse mbwiizulwa, baalumi, bamakaintu alimwi abana balatola lubazu cakwaanguluka muzibeela iziyandika kwiingula kwabaswiilizi alimwi ibanji balakukkomanina ikutola lubazu.—Ba-Hebrayo 10:23-25.
2. (a) Nkaambo nzi kulibambila ncocili cintu ciyandika kapati mukugwasya bana basyoonto ikukkomanina miswaangano? (b) Ncikozyanyo cani iciyandika kapati?
2 Masimpe, ikugwasya bana basyoonto ikuuzyibila mulongo uugwasya wamilimo yambungano cilakonzya kuba cintu cikatazya. Ikuti naa bana bamwi ibaunka abazyali babo kumiswaangano kabataikkomanini, ndipenzi nzi lilangilwa kuti ndyobajisi? Amubone kuti, ibulamfwu bwaciindi ncobaswiilila bana banji ncisyoonto alimwi balafwambaana kufwa bukata. Ikulibambila kulakonzya kugwasya kumanizya penzi eli. Ikuti kakunyina kulibambila, ibana kwiina nobanga batola lubazu mumiswaangano munzila iigwasya. (Tusimpi 15:23) Ikuti kakunyina kulibambila, cilakonzya kubakatazya kuyaambele munzila yakumuuya kwalo ikuleta lukkomano. (1 Timoteo 4:12, 15) Ino ncinzi cinga cacitwa? Citaanzi, ibazyali beelede kulibuzya naa ilwabo balalibambila miswaangano. Icikozyanyo cabo ncintu cikulwaizya kapati. (Luka 6:40) Ikulibambila kabotu kujatikizya ciiyo camukwasyi akwalo kulakonzya kuba cintu cigwasya kapati.
Ikuyaka Moyo
3. Lyaciiyo camukwasyi, nkaambo nzi ncokuyandika kusoleka kapati ikuyaka myoyo, alimwi ino eci cijatikizya nzi?
3 Iciiyo camukwasyi taceelede kuba buyo ciindi cakujana luzibo pele cileelede kuba ciindi cakuyaka myoyo. Awa kuyandika kwaazyiba kabotu mapenzi aajisi banamukwasyi alimwi akumubikkila maanu umwi aumwi mumukwasyi munzila yaluyando. Jehova ngu Leza ‘uulingula myoyo.’—1 Makani 29:17.
4. (a) Ino ‘kubula boongo’ caamba nzi? (b) Ncinzi cijatikizidwe ‘mukuvuba busongo’?
4 Ncinzi ncajana Jehova nalingula myoyo yabana besu? Ibunji bwabo inga baamba kuti balamuyanda Leza aboobo ncintu cibotu eco. Nokuba boobo, imuntu uucili mwana naa iwataliko ono kwiiya makani aajatikizya Jehova tanazizyibila kabotu pe inzila zya Jehova. Akaambo kakuti tanazizyibila, ulakonzya kwaambwa kuti “takwe boongo,” mbubonya Bbaibbele mbolyaamba. Ambweni taili mizeezo yakwe yoonse mibyaabi nokuba boobo citola ciindi cilamfwu ikucinca moyo wamuntu kuti ube muciimo cinga camukkomanisya ncobeni Leza. Eci cijatikizya kweendelanya mizeezo yamuntu oyo, kulombozya, kuyanda, alimwi amakanze aakwe mubuumi azeezyo Leza nzyazumizya kusikila waawo mpobakonzya kugolela bantunsi batalondokede. Imuntu umwi nazumizya ciimo cakwe camukati ikubumbwa munzila yabunaleza, ‘uli mukuvuba busongo.’—Tusimpi 9:4; 19:8.
5, 6. Mbuti bazyali mbobanga bwagwasya bana babo ‘kuvuba busongo?’
5 Sena bazyali inga bakonzya kugwasya bana babo ‘kuvuba busongo’? Masimpe, kwiina muntunsi uunga wabikka ciimo camoyo cibotu mumuntu uumbi. Umwi aumwi wandiswe wakapegwa nguzu zyakulisalila alimwi ikucita boobu kuya buyo mbuli zintu nzyotulizumizya kuyeeya. Pele kwiinda mukubelesya bupampu, bazyali balakonzya kucitya mwanaabo ikwaamba zili mumoyo wakwe elyo balakonzya kuzizyiba zili mumoyo akujana nzila mbobanga bagwasya. Amubelesye mibuzyo mbuli yakuti ‘Ino ulimvwa buti kujatikizya ceeci?’ alimwi awakuti ‘Ncinzi cini-cini nconga wayanda kucita?’ Mpoonya, amuswiilile cakukkazika moyo. Mutakalali pe. (Tusimpi 20:5) Iciimo caluzyalo, cakuteelela alimwi caluyando cilayandika kapati ikuti kamuyanda kuzyiba zili mumoyo.
6 Ikutegwa mukulwaizye mizeezo mibotu, kamubandika micelo yamuuya lyoonse—mucibandike cibeela cimwi acimwi—alimwi amubelekele antoomwe mumukwasyi kujana ciimo eco. (Ba-Galatiya 5:22, 23) Amumuyandisye Jehova alimwi a Jesu Kristo, ikutali kwiinda mukwaamba buyo kuti tweelede kubayanda pele kwiinda mukubandika twaambo ncotubayandila alimwi ambotunga twalutondezya luyando olo. (2 Ba-Korinto 5:14, 15) Amubakulwaizye kucita zintu ziluleme kwiinda mukubandika mpindu iziyoojanwa mukucita boobo. Amubakulwaizye kutantamuka miyeeyo italuzi, ŋambawido alimwi abukkale bubyaabi kwiinda mukubandika mapenzi aajanwa akaambo kazintu zili boobo. (Amosi 5:15; 3 Johane 11) Amutondezye mbuli mizeezo, ŋambawido alimwi abukkale—bubotu naa bubyaabi mbobunga bwacijatikizya cilongwe caumwi a Jehova.
7. Ncinzi cinga cacitwa mukugwasya bana kulwana mapenzi alimwi akusala zyakucita munzila iinga yapa kuti bazumanane mucilongwe cabo a Jehova?
7 Imwana najisi penzi naa nayanda kusala kucita cimwi cintu, tulakonzya kumubuzya kuti: ‘Uyeeya kuti Jehova ucibona buti eci? Ncinzi ncozyi kujatikizya Jehova icikupa kwaamba boobo? Sena wapaila kulinguwe kujatikizya makani aya?’ Amufwambaane kugwasya bana benu ikubaa buumi mwalo mobasolekesya kubona kwaamba kuti lyoonse kuyanda kwa Leza kulisinizidwe alimwi kulacitwa. Mbobayaambele mukubaa cilongwe cigaminide a Jehova, bayoojana lukkomano mukweenda munzila zyakwe. (Intembauzyo 119:34, 35) Eci ciyoocitya kuti kabacilumba coolwe ncobajisi cakuyanzana ambungano ya Leza wakasimpe.
Ikulibambila Miswaangano Yambungano
8. (a) Ncinzi cinga catugwasya kutegwa tubikkilizye zintu zyoonse ziyandika kulanganya cakufwambaana muciiyo cesu camukwasyi? (b) Ino ciiyo cili boobu ciyandika buti?
8 Kuli makani manji aayandika kulanganya ciindi nokucitwa ciiyo camukwasyi. Mbuti mbomunga mwaabikkilizya oonse? Tacikonzyeki pe kwaabandika oonse aciindi comwe. Pele inga camugwasya naa mwaandandamika oonse akapepa. (Tusimpi 21:5) Ciindi aciindi, amwaainduluke alimwi amulange-lange yaayo aayandika kulanganya cakufwambaana. Amukubikkile maanu kapati ikuyaambele kwaumwi aumwi mumukwasyi. Ibubambe obu bwaciiyo camukwasyi ncibeela cipati calwiiyo lwa Bunakristo, lwalo ilutugwasya mubuumi bwalino alimwi amukulibambila zyabuumi butamani kumbele.—1 Timoteo 4:8.
9. Mmakanze nzi aajatikizya kulibambila miswaangano ngotunga tunoobelekela bucebuce ciindi caziiyo zyesu zyamukwasyi?
9 Sena ciiyo canu camukwasyi cilabikkilizya akulibambila miswaangano yambungano? Kuli milimo iili mbwiibede yalo njomunga mwabeleka bucebuce ciindi nomwiiya antoomwe lyoonse. Imwi yayeeyi inga yabelekwa mumvwiki zili mbozibede, imwi itola myeezi alimwi iimbi inga mane yatola myaka buya kuti imanizigwe. Amulange-lange mbaakani ezi: (1) umwi aumwi mumukwasyi kalibambilide kwiingula ciindi camiswaangano; (2) umwi aumwi kakanzide kwiingula mumajwi aakwe mwini; (3) ikubikkilizya magwalo mubwiinguzi; alimwi (4) akulanga-langa makani aayiigwa kamukanzide kwaatobela mubuumi bwanu nobeni. Eezi zyoonse zilakonzya kugwasya muntu kucitya kasimpe kusitikila mubuumi bwakwe.—Intembauzyo 25:4, 5.
10. (a) Mbuti mbotunga twalanganya muswaangano umwi aumwi wambungano? (b) Nkaambo nzi eci ncocijisi mpindu?
10 Nokuba kuti ciiyo canu camukwasyi lyoonse inga ciyeeme aaciiyo ca Ngazi Yamulindizi cansondo eyo, mutakusotoki pe ikulibambila kucitwaa umwi aumwi naa antoomwe mumukwasyi kwa Ciiyo Cabbuku Cambungano, Cikolo Camulimo Wateokrasi alimwi a Muswaangano Wamulimo. Eezi azyalo nzibeela ziyandika kapati zyapulogilamu iituyiisya kweenda munzila njayanda Jehova. Ambweni inga muziindi-ziindi kamukonzya kulibambila miswaangano eyi antoomwe mumukwasyi. Inzila zyanu zyakwiiya ziyooyaambele kwiinda mukubelekela antoomwe. Aboobo muyoojana mpindu zinji kapati mumiswaangano eyi. Akati kazintu zimbi nzyomubandika, amulange-lange mpindu zijanwa kwiinda mukulibambila miswaangano eyi lyoonse alimwi ambokuyandika kubaa ciindi cibikkidwe cakulibambila oko.—Ba-Efeso 5:15-17.
11, 12. Mbuti mbokunga kwatugwasya kulibambila kwiimba kwamumbungano, alimwi ino eci inga cacitwa buti?
11 Aamiswaangano ya “Kupona Munzila Njayanda Leza,” twakakulwaizigwa kulibambila cibeela cimbi camiswaangano yesu, nkokuti ikwiimba. Sena mwakakutobela kukulwaizya oko? Ikucita boobo kulakonzya kugwasya kusimpikizya kasimpe kamu Bbaibbele mumizeezo amyoyo yesu alimwi akuyungizya lukkomano lwesu ciindi camiswaangano yambungano.
12 Ikulibambila ikubikkilizya kubala alimwi akubandika ncaamba mabala amwi aali munyimbo iziyooimbwa kulakonzya kutugwasya kwiimba camoyo woonse. Mu Israyeli yansiku, iziimbyo zyakali kubelesyegwa kapati mukukomba. (1 Makani 25:1; Intembauzyo 28:7) Sena mumukwasyi wanu kuli uucizyi kubelesya ciimbyo cili coonse? Amucibelesye ciimbyo eco kwiiya lwiimbo lumwi lwa Bwami lwansondo eyo, mpoonya amulwiimbe lwiimbo olo antoomwe mumukwasyi. Icimbi cinga cagwasya nkubelesya nyimbo zyakalekkoodwa. Muzisi zimwi ibakwesu balaimba kabotu kapati kakunyina kubelesya mateepu. Nobeenda mumigwagwa naa nobakutauka mumyuunda, kanjikanji balaimba nyimbo iziyooimbwa ciindi camiswaangano insondo eyo.—Ba-Efeso 5:19.
Ikulibambila Mulimo Wamumuunda Kwamukwasyi
13, 14. Nkaambo nzi ncoyiyandika mibandi yamukwasyi iitupa kulibambila myoyo yesu kujatikizya mulimo wamumuunda?
13 Ikupa bumboni kubantu bamwi kujatikizya Jehova alimwi amakanze aakwe ncibeela ciyandika kapati cabuumi bwesu. (Isaya 43:10-12; Matayo 24:14) Tube bana naa bapati, tulaukkomanina kapati mulimo oyu alimwi tulazwidilila ikuti katulibambilide. Ino eci inga twacicita buti mumukwasyi?
14 Mbubwenya buyo mbuli makani aambi aajatikizya bukombi bwesu, ncintu ciyandika kapati ikupangika myoyo yesu. Tatweelede buyo kubandika ncotuya kucita pele tweelede kukaziba akaambo ncotuyoocicitila. Kuciindi ca Mwami Josafati, ibantu bakapegwa malailile mumulawo wa Leza, pele Bbaibbele litwaambila kuti bantu “kabatana kupangika myoyo yabo.” Eci cakapa kuti babe muntenda yakoongelezyegwa yalo yakali kunoobaandaanya kubukombi bwakasimpe. (2 Makani 20:33; 21:11) Imbaakani yesu taili buyo yakuti tukonzye kulemba mawoola ngotwakabeleka mumuunda naa kwiile kumwaya buyo mabbuku. Imulimo wamumuunda weelede kuba citondezyo caluyando ndotujisi kuli Jehova alimwi akubantu balo bayandika kupegwa coolwe cakulisalila buumi. (Ba-Hebrayo 13:15) Mmulimo motuli “basimilimonyina Leza.” (1 Ba-Korinto 3:9) Taciliboteli coolwe eci kaka! Notuli mumulimo, tubelekelaamwi abangelo basalala. (Ciyubunuzyo 14:6, 7) Kwiina ciindi cimbi cibotu cakukulwaizya kulumba oku kunze lyaceeco camumibandi yamumukwasyi, cibe ciindi caciiyo cesu cansondo ansondo naa notubandika lugwalo lumwi lweelela kuzwa mukabbuku ka Kulingaula Magwalo Mazuba Oonse!
15. Ndiilili notunga twalibambila mulimo wamumuunda caantoomwe mumukwasyi?
15 Sena ciindi cimwi caciiyo canu camukwasyi mucibelesya ikugwasya banamukwasyi ikulibambila kujatikizya mulimo wamumuunda wansondo eyo? Inga cagwasya kapati naa mwacita obo. (2 Timoteo 2:15) Inga cagwasya kucitya mulimo wabo kubaa mpindu alimwi akuzwidilila. Muziindi mulakonzya kubikka ambali ciindi coonse caciiyo camukwasyi kuti mulibambile mulimo oyo. Kanjikanji, mulakonzya kulanganya zibeela zyamulimo wamumuunda mumibandi mifwaafwi kumamanino kwaciiyo camukwasyi naa aciindi cimbi mukati kansondo.
16. Amubandike mpindu yantaamu imwi aimwi iilembedwe mumuncali.
16 Iziiyo zyamukwasyi zilakonzya kubandikwa munzila zisiyene-siyene mbuli zeezi zitobela: (1) Amulibambile kabotu-kabotu nzila yakutalisya makani kubikkilizyaa lugwalo lwakubala kuzwa mu Bbaibbele ikuti kakucili ciindi. (2) Ikuti kacikonzyeka, amubone kwaamba kuti umwi aumwi mumukwasyi ulijisi coola cakwe camubukambausi, Ibbaibbele, ikabbuku kakulembela, ibboopeeni naa mpensulo, matulakiti amabbuku aalibonya kabotu. Icoola camubukambausi taciyandiki kuti mane kacili ceeco cidula, pele ceelede kacisumbula. (3) Amubandike nkomukonzya kucitila bukambausi bwamukwiizya alimwi ambobweelede kucitwa. Amutobele inzila imwi aimwi yamalailile aciindi nomubeleka antoomwe mumulimo wamumuunda. Amupe inzila zigwasya, pele mutavwuzyi twaambo twakulaya.
17, 18. (a) Nkulibambila kwamusyobo nzi kwamumukwasyi ikunga kwagwasya kucitya mulimo wesu wamumuunda kuba uuzwidilila kapati? (b) Ncibeela nzi cakulibambila oku icinga cacitwa nsondo ansondo?
17 Icibeela cipati camulimo Jesu Kristo ngwaakapa basikumutobela mmulimo wakugwasya bamwi kuba basikwiiya. (Matayo 28:19, 20) Ikugwasya bamwi kuba basikwiiya takuyiili buyo aakukambauka pe. Kuyandika kuyiisya. Mbuti ciiyo canu camukwasyi mbocinga camugwasya kuzwidilila mukucita boobo?
18 Caantoomwe mumukwasyi, amubandike kujatikizya bantu mbomuyeeya kuti inga cagwasya kupilukila kulimbabo. Bamwi balakonzya bakatambwide mabbuku; ibamwi ambweni bakateelela buyo. Balakonzya bakajanwa nomwakali mumulimo waŋanda aŋanda naa mubukambausi bwamukwiizya kumusyika naa kucikolo. Ijwi lya Leza alimusololele. (Intembauzyo 25:9; Ezekieli 9:4) Aumwi asale ngwayanda kuyooswaya imvwiki eyo. Ncinzi iciyoobandikwa? Iciiyo camukwasyi cilakonzya kugwasya umwi aumwi mumukwasyi ikulibambila. Amwaabikkile maanu magwalo amwi aayoobelesegwa mwanoobandikaa bantu bayanda kwiiya kasimpe alimwi atwaambo tumwi tweelede ikuzwa mubroshuwa ya Ncinzi Leza Ncayanda Kulindiswe? naa kuzwa mubbuku lya Luzibo Lutola Kubuumi Butamani. Mutabandiki zintu zinji kapati aciindi comwe. Amusiile siŋanda mubuzyo uuyooingulwa mukuswaya kutobela. Ino kayi kutacicita kuba cilengwa camukwasyi ncomucita nsondo ansondo ikulibambila kupilukila umwi aumwi nkwayoocita, nayoopilukila alimwi amakanze ngajisi. Ikucita boobo kulakonzya kugwasya kupa kuti mulimo wamumuunda wamukwasyi woonse mbuuzulwa uuzwidilile.
Amuzumanane Ikubayiisya Nzila ya Jehova
19. Ikutegwa banamukwasyi bazumanane kweenda munzila ya Jehova, ncinzi ncobeelede kubaaco alimwi ino ncinzi cipa kuti eco cikonzyeke?
19 Ikuba silutwe wamukwasyi munyika ino mbyaabi mmulimo uukatazya kapati. Saatani amadaimona aakwe balasoleka kunyonyoona balanda ba Jehova munzila yakumuuya. (1 Petro 5:8) Kunze lyaboobo, sunu nobazyali mujisi mapenzi manji ikapati nywebo nobamazyali bali balikke. Cilakatazya ikujana ciindi cakucita zintu zyoonse nzyomuyanda kucita. Pele ikucita boobo kulagwasya neliba leelyo nomutobela muzeezo omwe buyo aciindi alimwi akuyaambele bucebuce mupulogilamu yanu yaciiyo camukwasyi. Mbulumbu bukkazika moyo kapati ikubona baabo mbomuyanzene limwi kabeenda cakusyomeka munzila ya Jehova. Ikutegwa beende cakuzwidilila munzila ya Jehova, banamukwasyi beelede kukukkomanina kujanika amiswaangano yambungano alimwi akutola lubazu mumulimo wamumuunda. Ikutegwa eco cikonzyeke, ikulibambila kulayandika, nkokuti ikulibambila ikuyaka moyo alimwi ikucitya umwi aumwi ikutola lubazu lugwasya.
20. Ncinzi cinga cagwasya bamazyali banji ikubaa lukkomano mbuli loolo lwaambwa kuli 3 Johane 4?
20 Kujatikizya baabo mbaakagwasya munzila yakumuuya, imwaapostolo Johane wakalemba kuti: “Taakwe kubotelwa kumbi nkunjisi kupati kwiinda oku kwakumvwa kuti bana bangu baleenda mulusinizyo.” (3 Johane 4) Iziiyo zyamukwasyi izyeendelezegwa amakanze aasalede alimwi izicitwa abasilutwe bamikwasyi ibalanganya iziyandika kumuntu omwe-omwe wamumukwasyi munzila yalubomba alimwi iigwasya zilakonzya kuugwasya kapati mukwasyi ikujana lukkomano luli boobo. Kwiinda mukuyandisisya kupona munzila njayanda Leza, ibazyali bagwasya mukwasyi wabo kubaa bukkale ibwiinda kubota.—Intembauzyo 19:7-11.
Sena Inga Mwapandulula?
◻ Nkaambo nzi ikulibambila miswaangano ncokuyandika kapati kubana besu?
◻ Ino bazyali inga babagwasya buti bana babo ‘ikuvwuba busongo’?
◻ Mbuti ciiyo cesu camukwasyi mbocinga cagwasya mukulibambila miswaangano yoonse?
◻ Ino kulibambila mulimo wamumuunda caantoomwe mumukwasyi inga kwatugwasya buti kuba bantu bazwidilila?
[Cifwanikiso icili apeeji 30]
Iciiyo canu camukwasyi cilakonzya kubikkilizyaa kulibambila miswaangano yambungano
[Cifwanikiso icili apeeji 31]
Ikwiiya kwiimba nyimbo zyakumiswaangano kulagwasya kapati