Ibbaibbele Lilakonzya Kumugwasya Mulukwatano Lwanu
LUKWATANO—ibbala eeli bantu bamwi libaletela mizeezo iikkomanisya. Ibambi talibakkomanisyi. Imutumbu umwi cakuusa wakaamba kuti: “Mumizeezo ndilimvwa mbuli kuti twakalekana kale amulumaangu. Ciindi coonse tandibikkilwi maano alimwi akulendelelwa.”
Ino ncinzi cipa kuti bantu ibakakonka kuzumanana kuyandana akubikkilana maano baleke kuyandana? Ikaambo kamwi kapa kucita boobo nkutayiya zintu zijatikizyidwe mulukwatano. Imulembi umwi wamakani aabusilisi wakaamba kuti: “Tulanjila mulukwatano kakunyina lwiiyo luli loonse pe.”
Mbwaali masimpe makani aakuti mbasyoonto bantu bajisi luzibo kujatikizya lukwatano, cilalibonya mubuvwuntauzi bwakacitwa a The National Marriage Project. Eeyi ninkamu iivwuntauzya yaku Rutgers University ku New Jersey mu U.S.A. Ibeendelezi bankamu eeyi bakalemba kuti: “Mukuvwuntauzya ooko ibanji bakakomenena mumikwasyi bazyali mobatakali kumvwana naa mobakalekana. Balizyi kabotu-kabotu lukwatano lutakkomanisyi mbolubede, pele tabazyi kabotu mbolweelede kuba lukwatano lukkomanisya. Ibamwi lukwatano lukkomanisya balupandulula buyo kuti ‘ndukwatano lwiimpene alwabazyali bangu.’”
Sena Banakristo balikwabilidwe kumapenzi aamulukwatano? Peepe. Mubwini, Banakristo bamwi mumwaanda wamyaka wakusaanguna bakali kuyandika lulayo lugaminide kuti baleke ‘kukanza kwaangununwa’ kulukwatano lwabo. (1 Ba-Korinto 7:27) Masimpe, mulukwatano loonse lwabantu bobile batalondokede kunooli mapenzi ziindi zimwi, pele tulijisi lugwasyo. Balumi abakaintu balakonzya kusumpula cilongwe cabo kwiinda mukubelesya njiisyo zyamu Bbaibbele.
Mubwini, Ibbaibbele talili bbuku lyamalailile buyo aamulukwatano. Mbwaanga lyakasololelwa a Muntu ooyo wakatalisya lukwatano, tulakonzya kulangila kuti njiisyo zili mumo zilagwasya. Kwiinda mumusinsimi Isaya, Jehova Leza wakaamba kuti: “Ndime Jehova Leza wako. Ndime uukwiiyisya kuti ugwasigwe. Ndime uukweenzya munzila njoelede kutola. Nicakabota niwakaswiilila [milazyo] yangu! Lino luumuno lwako nilwakaba mbuli mulonga, abululami bwako nibwakaba mbuli mayuwe aalwizi.”—Isaya 48:17, 18.
Sena luyando ndomwakajisi amuntu ngomukwetene limwi lwatalika kuyaabumana? Sena mulaangilidwe mulukwatano mutakwe luyando? Imukaintu umwi wakkala mulukwatano kwamyaka iili 26 wakaamba kuti: “Mbocitakkomanisyi ikuba mulukwatano luli boobo cilakonzya kuyuma kupandulula. Ikutakkomana ooku kulazumanana alimwi takumani pe.” Muciindi cakutyompwa akuzumanana alukwatano lutazuzikizyi zintu nzyomulombozya, sena tamukonzyi kukanza kucita cimwi cintu? Cibalo citobela cilabatondezya balumi abamakaintu mbuli njiisyo zyamu Bbaibbele mbozikonzya kubagwasya mulukwatano lwabo mucibeela comwe cigaminide, nkokuti kulyaaba.