Hena Ilamukatazya Mizeezo?
KWAMYAKA minji, Lena wali kukatazyigwa mumizeezo akaambo kakulimvwa kubula bulemu. Wakati: “Myaka njindakoonwa kandicili mwana, yakandibuzya bulemu, ndakaubuka. Ndakalimvwa kuti ndakali manide mulimo.” Awalo Simone naakalanga zyakamucitikila kacili mukubusi, ulati: “Mumoyo ndakali kulimvwa kuti tiindakacili muntu alimwi tiindakacijisi bulemu buya komoonga.” Kutakkomana ooku kuboola akaambo kakulimvwa boobu, kulibonya kuti kwasakana koonse mazuba aano. Kabunga kamwi kalaya bakubusi kwiinda mukubelesya luwaile, kakaamba kuti cileka aaniini kusika acisela cabaabo batumya luwaile baamba kuti “kulimvwa kubula bulemu ncintu cizumanana.”
Kweelana abasilisi bamwi balanga zyabuumi, balati, ikulimvwa muntu nkwalimvwa kuti taciko mulimo, kulaboola bantu nobabaamba kuti bakamana mulimo. Ikulimvwa kuli boobu kulakonzya kuboola mumizeezo ikuti umwi lyoonse bantu kabamubona kubbila kasusu, alimwi akumudyakaizya cakuzwa munzila naa kumutundulula. Kufwumbwa naa ninzila nzi iipa kuti muntu alimvwe boobu, iciccilila cilakonzya kupa kuti muntu atyompwe, ndiza kumunyonyoona buya. Kuvwuntauzya kwaino aawa kwakulanga zyabuumi, kwakajanwa kuti bantu bakatazyidwe mumizeezo, tabalisyomi nokuba kusyoma beenzyinyina calo cipa kuti kabatabambi cilongwe cili kabotu abantu, cakunga balalijaila cilongwe. Kuvwuntauzya kwaamba kuti: “Mubwini ‘balaliletela’ bukkale bubapa kuyoowa kapati.”
Bantu balimvwa boobo, ikanji bali mupenzi Bbaibbele mbolyaamba kuti mbantu ‘balibilika kapati.’ (Intembauzyo 94:19, BT) Balimvwa kuti bakamana mulimo. Ikuti kuli calubila, balalitongooka cakuzwa munzila. Nekuba kuti bamwi bantu inga balabalumbaizya akaambo kakuya ampela kwabo, pele mumoyo balimvwa mbuli silweeno uulangilwa kubikkwa aatuba kufwumbwa ciindi. Mbwaanga balimvwa kuti mbantu bateeleli kuti abalo balakonzya kukkomana, ibanji balanjila mubukkale bunyonyoona cakuti balimvwa kuti tabakonzyi kuzwa mulimbubo. Lena iwaambwa kumatalikilo, wakaba acilengwa cibi caboola kumakani aakulya akaambo kakulimvwa kubula bulemu. Wakati: “Ndakalimvwa kuti tandikonzyi kucinca cintu cili coonse.”
Hena aabo bakopana ‘akulibilika kapati’ nkokuti caamba kuti kwamana mbweena oobu mbobana kulimvwa lyoonse mubuumi? Hena kuli cikonzya kucitwa kutegwa penzi eeli lyakulimvwa boobu limane? Ibbaibbele lilijisi njiisyo alulayo lugwasya zyalo izyagwasya bantu banji kuzwidilila mumapenzi. Ino ninzila nzi zimwi zyanjiisyo eezyi, alimwi mbuti mbozyabagwasya bapengede kukonzya kukkomana mubuumi? Cibalo ciccilila cilapandulula.