Nkaambo nzi Ncayelede Kuzyibwa Sikulwanya Kristo?
Mwaapostolo Paulo kaindi wakasololelwa amuuya kulemba kuti: “Mulimvwide kale kuti ulasika Sikulwanya-Kristo.” (1 Johane 2:18) Elo alakkomanisya majwi aayo! Kwamyaanda yamyaka, bantu balikatazidwe ancaamba majwi aaya. Nguni sikulwanya Kristo? Ino ndilili nayooboola? Ncinzi ncayoocita aakuboola?
MULONGO wabaabo baambwa kuti mbaasikulwanya Kristo mulamfwu. Kaindi, aabo bakaambwa kuti ‘mbaasikulwanya Kristo’ bakali kubikkilizya aba Juda, ba Paapa bamu Katolika, alimwi abeendelezi bana Roma. Mucikozyanyo, Mweendelezi Frederick Wabili (1194-1250) naatakabasangana ku Muswaangano wacikombelo, Pope Gregory IX wakamuulika zina lyasikulwanya Kristo alimwi wakamugusya mucikombelo. Innocent Wane, iwakanjila mubusena bwa Gregory, awalo wakamugusya mucikombelo. Ikaambo kakamupa kumugusya, Frederick wakaamba kuti Innocent wakali sikulwanya Kristo.
Mwaapostolo Johane ngomuntu alikke sikulemba Bbaibbele wakabelesya bbala lya “Sikulwanya-Kristo.” Mumagwalo obilo aajisi zina lyakwe, ibbala eeli lilajanika ziindi zyosanwe mubunji akugama muntu omwe. Itupango ibbala eeli molijanika nkotuli mukabbokesi kali apeeji litobela. Kuzwa mutupango ootu, tulakonzya kubona kuti sikulwanya Kristo ngusikubeja alimwi ukanzide kumana cilongwe muntu ncajisi a Kristo alimwi a Leza. Cakweelela mwaapostolo wakakulwaizya Banakristonyina kuti: “Nobayandwa, mutazuminini myuuya yoonse, pele amusoleke myuuya na njiya-Leza, nkaambo basinsimi banji babeji mobali kale munyika.”—1 Johane 4:1.
Awalo Jesu wakacenjezya kujatikizya basikubeja naa basinsimi bakubeja naakaamba kuti: “Beza kulindinywe basamide zyakusama zyambelele, anukuti mukati lyabo mbaumpe babutambo. Micelo yabo [naa milimo] njiiti muzibye mbubabede.” (Matayo 7:15, 16) Sena Jesu alimwi wakali kucenjezya basikumutobela bakwe kujatikizya sikulwanya Kristo wacikozyanyo? Atubone mbotunga twaziba mubeji mubi ooyu.