Makani aa Nowa Azambangulwe Ngamasimpe, Taali Aakupanga Buyo
SENA mulombozya kupona munyika mbotu—munyika muli luumuno, munyina nkondo, milandu akudyaaminina bamwi? Ikuti naa mboobo, mulakonzya kukulwaizyigwa amakani aakaindi ambweni ngomuzyi kabotu. Imakani aaya ajatikizya Nowa, imwaalumi mubotu iwakapanga bwato bwakapa kuti afwutuke amukwasyi wakwe nolyakapaya Zambangulwe lyakanyonyoona basizibi.
Makani aaya alizyibidwe kapati. Imakani aamba cakamucitikila Nowa alajanwa mubbuku lyamu Bbaibbele lya Matalikilo zyaandaano 6 kusikila ku 9, alimwi akalembwa mu Koran amuzyaano zinji nzyobaluula bantu munyika yoonse. Sena Zambangulwe eeli lyakacitika ncobeni naa makani buyo aakulengelela aakulwaizya bantu kuti kabalilemeka kabotu? Basikwiiya zyabukombi abasayaansi bali kwaabandika makani aaya kwamyaka minji. Pele, Bbaibbele, Ijwi lya Leza, lilaamba kuti makani aaya ngamasimpe taali aakupanga buyo. Amubone twaambo ootu:
Cibalo cili mubbuku lya Matalikilo cilaamba mwaka, mwezi abuzuba bwini nolyakatalika Zambangulwe, iciindi abusena nkobwakaakukkalila bwato alimwi anaakayuminina maanzi anyika. Abwalo bwato mbobwakapangwa bulipanduludwe kabotu-kabotu, nkokuti, bulamfwu azyintu zyakabelesyegwa mukubupanga. Mukwiimpana, bunji bwaziindi makani aakupanga inga taajisi twaambo tuli boobo.
Mulongo wamazyalani uulembedwe muzibalo zyobilo zyamu Bbaibbele utondezya kuti Nowa wakaliko ncobeni. (1 Makani 1:4; Luka 3:36) Boonse bobilo, Ezara a Luka ibakalemba mulongo wamazyalani aaya bakalicibwene kuvwuntauzya twaambo. Luka wakautobelezya mulongo wazyalani lya Jesu Kristo kusikila kuli Nowa.
Makani aajatikizya Nowa naa Zambangulwe akaluulwa abasinsimi ba Isaya a Ezekiele alimwi abaapostolo Banakristo ba Paulo a Petro.—Isaya 54:9; Ezekiele 14:14, 20; Ba-Hebrayo 11:7; 1 Petro 3:19, 20; 2 Petro 2:5.
Jesu Kristo wakaamba makani aa Zambangulwe naakati: “Mbubonya mbokwakaba kumazuba aa-Nowa, kuyooba mbubonya obo kumazuba aa-Mwana a-Muntu. Bakali kulya, bakali kunywa, bakali kukwata akukwasigwa, mane do kusikila kubuzuba Nowa mbwaakanjila mubwaato, imiyoba yakasika yabajaya boonse.” (Luka 17:26, 27) Ikuti naa Zambangulwe nilyatakacitika, nkokuti ncaakaamba Jesu kujatikizya “mazuba aa-Mwana a-Muntu” ncabuyo.
Imwaapostolo Petro wakasinsima kuti kuyooba “basabuzi” ibaya kusampaula ncolyaamba Bbaibbele. Wakalemba kuti: “Muzisusi zibi zyamyoyo yabo beni, . . . balilubya-lubya caali kuti . . . nyika yaciindi [ca Nowa] yakanyonyoonwa . . . mboyakapayizigwa maanzi.” Sena andiswe tweelede ‘kulilubya-lubya caali’? Peepe! Petro wakazumanana kuti: “Ijulu anyika nzitubona sunu zyayobwedwa lubeta, kujwi elyo ndilyonya, ziti kanyonyoonwe amulilo mubuzuba obo mbubayoobetekwa bantu basikasampusampu.”—2 Petro 3:3-7.
Masimpe, Leza uyakubanyonyoona basizibi alimwi, akufwutula baluleme. Kwiinda mukutobela cikozyanyo ca Nowa, tulakonzya kuba akati kabalulami bayakufwutulwa akunjila munyika mbotu.