‘Tulakambauka Makani’
1 Mbubonya bupandulula Bbaibbele kujatikizya “mazuba aakumamanino,” sunu bunji bwabantu bajisi buyo “ciwa cabukombi.” (2 Tim. 3:1, 5) Eeci cili aakaambo kakuti basololi babukombi bakakilwa kupa butanga bwabo busolozi bwini-bwini bwakumuuya. Basololi babukombi bwa Kristendomu tabalisumpuli pe Bbaibbele. Cilainda kubabotela ikwiindulula ziyiisyo zyabuyo zyabasibusongo abasilwiiyo lwa Leza naa kupandulula twaambo twabukkale atwamapolitikisi muciindi cakukambauka Jwi lya Leza. Banji basololi babukombi tabalisyomi Bbaibbele. Balimvwa kuti ndyakaindi, aboobo mubumpelenge basumpula muzeezo wakusanduluka kwazintu mubusena bwaciyiisyo ca Bbaibbele ca Mulengi Mupati. Bunji bwabasololi babukombi tabalibelesyi akulibelesya zina lini-lini lya Leza, alimwi tabakazyi nokuceya kuti litagwisigwi mubunji bwama Bbaibbele aasandululwa.
2 Mbuli mbucakabede kubasololi babukombi kuciindi ca Jesu, sunu kukambauka kwabasololi babukombi nkwabuyo. (Mt. 15:8, 9) Cili mbubwena bwakaambilizya musinsimi Amosi. Kuli nzala, “teensi kwaamba kuti ninzala yansima nanka nyota yamaanzi pe. Ninzala yakuswiilila majwi aa-Jehova.” (Amosi 8:11) Ibantu ncobayandika kwiinda, ncilyo cakumuuya ica Jwi lya Leza.
3 Mbokuzuzikizigwa Zyakumuuya Nzyobayandika Bantu: Paulo wakakulwaizya Timoteo kuti akakatile ku “magwalo aasalala aakonzya kukusongwaazya mukufutulwa” aboobo wamulailila cakusinizya kuti ‘akambauke makani’ kuli bambi. (2 Tim. 3:14, 15; 4:2) Mbotuli Bakamboni ba Jehova, tweelede kukakatila kuli ceeco ncoliyiisya Bbaibbele ciindi notukambauka, kutegwa twiiye Sicitondezyo wesu, Jesu, walo iwakati: “Kwiisya kwangu takuli kwangu ndemwini, nkukwakwe uwakandituma.” (Joh. 7:16) Tulalibelesya Jwi lya Leza kuba ntalisyo yaziyiisyo zyesu nkaambo tulibwene kuti liyumwide busongo bwa Leza, alimwi tuyanda kuti bantu bazibe nkoluzwa luzibo ndotuli mukubaabila.—1 Kor. 2:4-7.
4 Ibantu beelede kusaanguna kumvwa kasimpe kamu Bbaibbele kutegwa baiye zya Jehova akumusyoma. Paulo wakalemba camaanu kuti: “Alimwi bamusyome buti ngubatana kumvwa? Alimwi, bamvwe buti nikutakwe sikukambauka?” (Rom. 10:14) Kwiinda mukukambauka Jwi lya Leza, tulagwasya bambi kujana lusyomo kwiinda muluzibo lwini-lwini. Luzibo luli boobu lulakonzya alimwi lulacinca maumi aabantu kwaabotya. Mulembi muna England Charles Dickens Ibbaibbele wakalilemba kuti: “Ndebbuku liinda kubota lyaliwo alimwi iliyoobawo munyika, nkaambo liyiisya ziyiisyo ziinda kubota zyalo zinga zyasololela muntu uuli woonse uusola kusyomeka akubaa lusyomo.”
5 Aabo balaa nzala yakasimpe balaziba kuti kalazuminizigwa abumboni bwa Jwi lya Leza. Ikaindi mu 1913, Frederick W. Franz, naakali kucikolo cipati, wakapegwa kabbuku kalaa mutwe wakuti Where Are the Dead [Nkuli Nkobabede Bafwu]? Amane kubala kwiingula kwa Bbaibbele kumubuzyo oyu cabusungu loko, wakati: “Nkakasimpe aka.” Mamiliyoni aabasikuyandaula kasimpe abalo mbobalimvwa oobu. Atuzumanane kukambauka Makani cabunkutwe abusungu kutegwa tukabe alubazu mukumvwa bambi nkobati: “Nkakasimpe aka.”