Imulimo Wesu—Ncitondezyo Caluyando Lwini-Lwini
1 Kwiinda mumulimo wesu tutondezya kuti tulaitobela milawo yobilo mipati kwiinda. (Mt. 22:37-39) Luyando lwesu kuli Jehova lutukulwaizya kuti katumulumbaizya lyoonse. Luyando lwesu kuli basimukoboma lutucitya kuti tubakulwaizye kuyandaula luzibo lwakuyanda kwa Leza akubazibya makanze aakwe ikutegwa abalo bamuyande Jehova, mbubwena mbuli ndiswe akulibikka mucoolwe ciyoopa kuti bapegwe cipo cabuumi butamani. Aboobo, kwiinda mumulimo wesu, tulalilemeka izina lya Jehova akutola lubazu mukuzyibya bulangizi buyandika kapati bwa Bwami kuli basimukoboma. Inzya, mulimo wesu ncitondezyo caluyando lwini-lwini kuli Leza alimwi akubantuma.
2 Luyando lwesu lutukulwaizya kukananaa bantu boonse munzila ziindene-indene. (1 Kor. 9:21-23) Mucikozyanyo: Kali mundeke, mwaalu umwi Munakristo wakakkede munsi aamupaizi waba Katolika. Mwaalu wakacitya kuti mupaizi oyu akanane kwiinda mukumubuzya mibuzyo misyoonto cabusongo, mpoona akunjizya mubandi oyu mumakani aa Bwami. Ciindi mupaizi oyu naakasika nkwaakali kuya, wakazwa mundeke kajisi mabbuku eesu obile ngaakatambula. Taciliboteli cakacitika kwiinda mukutondezya luyando lwini-lwini kwamwaalu oyu kuli simukobonyina!
3 Luyando Lwini-Lwini Lutukulwaizya Kukambauka: Aabo ibacita mulimo wabupainiya bwakugwasilizya alimwi abwaciindi coonse mmasimpe bali mukutondezya luyando lwini-lwini kuli Leza alimwi akuli basimukobonyina. Ibapainiya lyoonse babelesya ciindi cabo anguzu kuti bagwasye bamwi munzila yakumuuya. Ino ncinzi cibakulwaizya kucita boobo? Mupainiya umwi wakati: “Ndilizi kuti luyando mucelo wamuuya wa Leza. Aboobo ikuti neetakalilujisi, naanga tandili mukasimpe pe alimwi neetakazwidilila kandili mupainiya. Luyando lundicitya kuti kandilanganya bantu, ikubikkila maanu kuzintu nzyobayandika, alimwi ndilakkomana kuti bantu balakwelelezyegwaa luyando.” Ndoluyando Jesu ndwaakatondezya kubantu. Cimwi ciindi walo abasikwiiya bakwe ibakakatede kapati nobakaunka kubusena bumwi kuti “[ba]kalyookezye buniini,” imakamu aabantu akabaindila, aakujanika nkuko. Ino Jesu wakacita nzi? Akaambo kakuti “wakabafwida luzyalo,” zyakumubili zyakwe wakazibikka ambali kutegwa ‘abayiisye makani manji.’—Mk. 6:30-34.
4 Neciba ciindi ibantu nobaakaka makani mabotu ngotubakananina, tulakkomana mumoyo nkaambo inga tulizyi kuti kwiinda muluyando twacita mpotugolela kuti tubagwasye kujana lufwutuko. Ciindi caakusika nayootubeteka toonse cakumaninina Kristo, tunookkomene kapati kuti twakatondezya luyando lwini-lwini kwiinda ‘mukukondezesya mulimo ngotwakapegwa.’—2 Tim. 4:5.