Amubatambe Baboole
1 Ibwiite bwakacitwa myaanda yamyaka iili mbwiibede yainda bulalimvwisya lino mumasi aali 233 munyika ibwakuti: “Atwiinke, tukaye kucilundu ca-Jehova, . . . elyo uyootwiisya inzila zyakwe, nkabela tuyooenda muziyanza zyakwe.” (Is. 2:3) Ikugamika bantu kumbunga ya Jehova ninzila imwi iinda kubota yalo njotunga twabagwasya kuti bayaambele munzila yakumuuya yalo iisololela kubuumi butamani.
2 Basikumwaya bamwi balakonzya kweenkela ikutamba bantu kuti baboole ku Ŋanda ya Bwami mane kusikila limwi batondezya kuti bayaambele muciiyo cabo ca Bbaibbele caaŋanda. Pele zimwi ziindi bantu balatalika kujanika kumiswaangano yambungano kacitanatalisigwa ciiyo ca Bbaibbele kuli mbabo. Tatweelede kumuka kutamba bantu akubakulwaizya kuti baboole kumiswaangano.
3 Ncomweelede Kucita: Amubelesye coolwe cili coonse ncomujana ikwaambila bantu kujatikizya miswaangano yesu yambungano. Amwaambe kuti miswaangano injilwa buyo kakunyina kubbadela alimwi akuti kunyina milumbo iibwezegwa pe. Amupandulule mbuli mboyeendelezyegwa miswaangano. Amwaambe akuti nziiyo zini buya zya Bbaibbele izicitwa alimwi akuti iziyiigwa zilapegwa kuli boonse kutegwa kabayaabutobelezya. Amubaambile bukkale busiyene-siyene bwabantu ibajanika kumiswaangano. Mwaambe kuti mbantu bazwa mubusena mbubwenya obo alimwi akuti ibana bamisela yoonse balaangulukide kusika abalo. Abo mbotwiiya limwi tweelede kubatamba akubaambila kuti tulilibambilide kubagwasya kutegwa bakonzye kusika kumiswaangano.
4 Cimwi cintu camamanino icilembedwe mu Bbaibbele mbwiite bwamaanza obile bwakuti tutole lubazu muzipego zya Jehova izipa buumi ibwakuti: “Lino Muuya anabwiinga balaamba kuti, Boola . . . Ayooyo uufwide nyota aboole. Amuntu woonse uuyanda anywe cabuyo maanzi aabuumi.” (Ciy. 22:17) Kunyina cimbi cintu cikonzya kucitwa kunze lyakutamba bamwi kuti bajanike kumiswaangano yesu.
5 Ibbuku lya Isaya 60:8 lilaitondezya myaanda-myaanda yabasikutembaula bapya munzila yabusinsimi balo ibaboola lino mumbungano zyabantu ba Leza mbuli nziba ‘izyuuluka mbuli ijoba, mbuli inziba iziya kuzipulo zyazyo.’ Toonse inga twabatamba bapya kumiswaangano yesu akubatondezya kuti balitambwidwe camaanza obile. Twacita boobu, tunoobelekela antoomwe a Jehova mbwayaabufwambya mulimo wakuyobolola.—Is. 60:22.