Kabbokesi Kamubuzyo
◼ Ino mbaani balaamukuli wakusalazya Ŋanda ya Bwami?
Iŋanda ya Bwami iisalala alimwi iiboneka kabotu iwiiminina kabotu mulumbe ngotukambauka. (Amweezyanisye 1 Petro. 2:12.) Kulayandika kapati kuti ŋanda kaisalala alimwi kaili yabulondo, aboobo toonse tulakonzya kutola lubazu mukwiisalazya. Tatweelede kulangila bantu basyoonto buyo kuti babweze mukuli oonse oyu. Ikanjikanji inkamu yomwe-yomwe ya Ciiyo Cabbuku Cambungano njiisalazya, elyo iweendelezya ciiyo naa imugwasyi wakwe nguusololela mumulimo oyu. Ibaalu bayoolanganya makani aya aakusalazya mu Maanda aa Bwami imuswaanganina mbungano iziinda kuli yomwe ikutegwa mbungano zyoonse zikatole lubazu mukusalazya oku.
Ino mukuli oyu inga twaulanganya buti kabotu? Iŋanda ya Bwami yeelede kusalazigwa kweelana amulongo walyoonse. Izibelesyo zyeelede kuti kaziliko lyoonse. Ipepa lyamulongo wazintu izyeelede kucitwa lyeelede kubikkwa abusena mpobakonzya kulibona boonse abo ibabeleka ikutegwa bazibe nzyobeelede kucita. Mulakonzya kubaa mapepa obile, lyomwe kalitondezya mulimo weelede kucitwa wamana muswaangano omwe-omwe, amana limwi kalitondezya kusalazya ikweelede kucitwa nsondo ansondo. Sikweendelezya ciiyo cabbuku weelede kusala buzuba aciindi cakusalazya icili kabotu kuli boonse abo ibajatikizidwe. Abwalo bwizu amaluba zyeelede kubikkilwa maanu ciindi aciindi. Ituzila twiindwa alimwi amasena imusiigwa myootokala kweelede kuti kakunyina tombe. Imwaka amwaka kweelede kuba ciindi cakusalazya kabotu-kabotu ambweni kacitanacitwa buyo Ciibalusyo. Ikusalazya oku kulakonzya kubikkilizya kusanzya mpulungwido abwaanda, ikkapeti kuti kailiko alimwi amakketani kuti kaaliko.
Toonse tulakonzya kuubya-ubya mukuli oyu kwiinda mukutasowa ccungamu naa tombe lili lyoonse mukati naa anze a Ŋanda ya Bwami. Tulakonzya kusalazya cimbuzi twamana kucibelesya akucisiya kacili kabotu kutegwa uuboola munsi ajane kacisalala. Amubikkile maanu kutegwa mutajayi zibelesyo naa kunyonyoona zyuuno azimwi-zimwi. Amufwambaane kumwaambila mukwesu uulaa mulimo wakulanga mbwiibambwa Ŋanda ya Bwami mwabona buyo tombe lyakadamina akkapeti, izyuuno zityokede, imipaipi yameenda yanyonyooka, imalaiti aamanide azimwi-zimwi.
Atulisungule toonse kubeleka mulimo wesu. Eci inga capa kuti ŋanda yakukombela kaili mbotu akutuzibya kuti tuli bantu basumbula balo balemeka Jehova Leza.—1 Pet. 1:16.