Toonse Atumulemeke Jehova Alimwi a Mwanaakwe
Mbobakonzya Kugwasigwa Boonse Aabo Ibayoojanika ku Ciibalusyo mu April 8
1 Mbabaani ibalemekwa kapati sunu? Mbaabo ibacita zintu ziyandwa kapati abantu bamunyika. Nokuba boobo, bunji bwaziindi milimo yabo ilalubwa cakufwambaana. Pele ino mbuti kujatikizya milimo eeyo iibagwasya ncobeni bantu boonse? Tuyoolanga-langa kabotu mulimo umwi mupati kapati akati kamilimo eeyi twaakutalika kwiibaluka naa kulalila Mulalilo wa Mwami lyaakubbila zuba mu April 8, 2001.
2 Nguni weelede kwiinda kulemekwa? Ibbaibbele liingula kuti: “Nduwe uuelede, O Mwami, kutambula bulemu alulemeko anguzu, nkaambo nduwe wakalenga zintu zyoonse.” (Ciy. 4:11) Mbwali ngo Mulengi, Jehova ngo Mwami Mupati mububumbo boonse. Ikweelela kwakwe ikupegwa bulemu, taakwe nokuyoomana pe!—1 Tim. 1:17.
3 Jesu Kristo Mwanaa Leza, wakacita milimo mibotu kapati yalo iiyooletela bantu zilongezyo zitamani. Wakamwiiya Wisi kabotu-kabotu. (Joh. 5:19) Ikuswiilila kwakwe cakumaninina alimwi amulimo ngwaakacita cakusyomeka zyakamupa kuti ‘Ayelele kutambula bwami abuvwubi abusongo, anguzu alulemeko abulemu azilongezyo.’ (Ciy. 5:12) Wakalemekwaa Wisi kwiinda mukubikkwa kuti abe Mwami. (Int. 2:6-8) Pele swebo tuyoobaa coolwe cakubalemeka boonse bobile Wisi alimwi a Mwana twaakwiibaluka Mulalilo wa Mwami mu April 8, 2001.
4 Cilausisya kujana kuti mbasyoonto buyo bantu ibali kumupa bulemu mbwayelede Jehova alimwi a Mwaanakwe. Zimwi ziindi nobaba bantu ba Leza bansiku, iba Israyeli, bakali kumubelekela Jehova cakwiinzya buyo mulawo. Ooku kwakali kubula bulemu kutaambiki. (Malk. 1:6) Muntu ujisi bulemu weelede kuswiilila camoyo omwe akaambo kaluyando alimwi akulumba nkwajisi kuli Jehova a Mwanaakwe kuzintu zyoonse nzyobatucitila ciindi coonse. Ikupa bulemu buli boobo kuyanda kuti katutondezya kuti tulamuyoowa Leza alimwi akumupa bulemu, akuzumina kuti ncobeni Jehova alimwi a Jesu balaandiswe muzintu zyoonse nzyotucita. Mbungano ya Bunakristo ilasoleka kuyiisya alimwi akugwasya bamwi kucita mbubwena oobu.
5 Ciindi Cilibedelede Cakutondezya Bulemu: Muswaangano wa Ciibalusyo ulaampindu kapati kubantu ba Jehova mwakaa mwaka. Kufwumbwa muntu uuyanda kubelekela Jehova alimwi akumulemeka weelede kuyoojanika. (Lk. 22:19) Kunze lya Bakamboni basungweede ibali tuulunzuma tuli 6, kulangilwa kuti aabo balaaluyandisisyo bayooyungizya mweelwe wabantu bayoojanika kusika kutuulunzuma tuli 14. Elo kaka ciyooba ciindi cibotu cakulemeka Tateesu wakujulu! Nokuba kuti aciindi eci tuyoobikkila kapati maanu kuli Jesu, ibulemu buyootondezyegwa akaambo kamilimo njaakazuzikizya, buyoolemya Usyi wakamutuma.—Joh. 5:23.
6 Ino ncinzi ncotunga twacita kugwasilizya bubambe bulibedelede oobu? Tulakonzya kugwasya ibapya kutegwa abalo bagwasigwe kapati. Atubakulwaizye kuti bakajanike alimwi kuti kacikonzyeka atukabagwasye kutegwa bakacikonzye kusika kubusena ooko. Amupandulule makanze aamakani akananwa. Amubazibye kuli bamwi. Eezyo nzyobabona akumvwa zilakonzya kubakulwaizya kuti batusangane mukulemeka Jehova.
7 Mutaubyi-ubyi lugwasyo lukonzya kujanwa mupulogilamu. Sikwiiya umwi wakuyunivesiti wakaamba kuti: “Ndakali kujanika ziindi zinji ku Mulalilo mucikombelo cangu, pele eci ciliindene kapati. Ndabona kuti eci cileendelanaa ncolyaamba Bbaibbele alimwi ndisyoma kuti muli kajisi kasimpe.” Wakatalika kujanika kumiswaangano lyoonse alimwi tiikwakainda ciindi wakabbapatizigwa.
8 Amubagwasye Bapya Kuyaambele: Amubikkile maanu kubapya ibajanika ku Ciibalusyo alimwi akubaswaya kakutanainda ciindi ikutegwa mukalange-lange zintu zikatalusya nzyobakayiiya alimwi anzyobakabona. Amubazibye kuti nkoili miswaangano aimbi ooko nkobakonzya kuyungizya luzibo lwabo lwa Bbaibbele. Ikwiinduluka cibalo 17 mubbuku lya Luzibo, “Amuliibe Akati Kabantu ba Leza,” kuyoobagwasya kubona mbazu zinji oomo mbungano moitupa zintu zyakumuuya zyalo nzyobabambilidwe kale. Amukabatondezye vidiyo yakuti Our Whole Association of Brothers ikuti kamwiijisi kutegwa bakalibonene lukamantano, lukkomano alimwi abusungu mbobajisi bantu ba Jehova!
9 Cilayandika kapati kuti ibapya baiya mbuli mbobakonzya kutondezya bulemu kuli Jehova. Amubapandulwide kuti Jehova ulakkomanaa mipailo iizwa mumoyo akuti kucita oobo lyoonse kulakatalusya munzila yakumuuya. (1 Joh. 5:14) Kwiinda mukubelesya ziiyo 8 kusikila ku 12 mubroshuwa ya Ncayanda, amwaambe bukkale buletela bulemu kuli Jehova. Kwiinda mukubandika zilembedwe mubroshua litegwa Jehovah’s Witnesses—Who Are They? What Do They Believe?, amapeeji 30-1, amubakulwaizye bapya ikuyeeya nzila imwi njobanga balemeka Jehova kwiinda mukutola lubazu mumulimo wakukambauka.
10 Ikutondezya kulumba kucituuzyo ca Jesu alimwi acoolwe ncotujisi mukubeleka katuli basikwiiya bakwe kupa bulemu kuli Taata alimwi kuletela zilongezyo kuli bamwi. Jesu wakasyomezya kuti: “Muntu uundibelekela awalo Taata uyoomulemeka.”—Joh. 12:26