“Zintu Zyoonse Zilakonzeka Kuli-Leza”
1 Mulimo mupati ngoijisi mbungano ya Bunakristo ngwakukambauka mulumbe wa Bwami nyika yoonse mboizulwa. (Mt. 24:14) Ooyu mmulimo mupati cini-cini. Bantu banji balangilila bayeeya kuti mulimo wesu uyanda mali manji kwiinda ngotujisi kutegwa ucitwe. Ibamwi bayeeya kuti mulimo ooyu tuukonzyi kucitwa akaambo kakuti bunji bwaziindi tulasampaulwa, kukazigwa alimwi akupenzegwa. (Mt. 24:9; 2 Tim. 3:12) Basikudooneka abalo basyoma kuti mulimo ooyu tuukonzyi kuzuzikizigwa pe. Pele Jesu wakati: “Zintu zyoonse zilakonzeka kuli-Leza.”—Mt. 19:26.
2 Zikozyanyo Zibotu Nzyotweelede Kwiiya: Jesu wakatalika mulimo wakwe kali buyo alikke nyika yoonse kaimukazya. Mukusola kumulesya kutegwa atazwidilili, basikumukazya bakamupenzya munzila iili yoonse njomunga mwayeeyela, mpoonya akumujaya munzila mbyaabi. Pele kumamanino, cabusicamba Jesu wakati: “ndakiizunda nyika.” (Joh. 16:33) Elo kaka ooyo wakali mulimo mupati ngwaakazuzikizya!
3 Basikwiiya ba Jesu bakajisi muuya nguwenya wabusicamba alimwi abusungu mumulimo wa Bunakristo. Ibanji bakaumwa akubikkwa muntolongo mane akujaigwa buya. Pele bakali ‘kubotelwa kuti kwakategwa baleelede kunyansigwa nkaambo kazina lyakwe.’ (Inc. 5:41) Kabatayeeyelwi kuti inga bazwidilila, bakauzuzikizya mulimo wakukambauka makani mabotu “mane kusikila kumamanino aanyika” walo wakali kulangilwa kuti tuukonzyeki.—Inc. 1:8; Kol. 1:23.
4 Mbotunga Twazwidilila Mumazubeesu: Nokuba kuti kuli buyumuyumu, andiswe tulaucita cabunkutwe mulimo wakukambauka Bwami. Tulazwidilila nokuba kuti tulakazigwa, tulapenzyegwa, ikwaangwa alimwi amicito imbi buyo yalunya iicitwa kutegwa tucileke. Ino eeci cikonzyeka buti? “Cintu cipati teensi inguzu, teensi bukozu, ngu-Muuya wangu, mbwaamba Jehova wamakamu.” (Zek. 4:6) Kufwumbwa kuti Jehova kali andiswe, taakwe cikonzya kulesya mulimo wesu!—Rom. 8:31.
5 Ciindi notukambauka, taakwe ncotweelede kuyoowa naa kulimvwa kuti tatweelede kucita mulimo ooyu pe. (2 Kor. 2:16, 17) Tulijisi twaambo tubotu kapati ncotweelede kuzumanana kumwaya makani mabotu aa Bwami. Akaambo kalugwasyo ndwaatupa Jehova, tuyoozuzikizya “icikakila muntu”!—Lk. 18:27.