Amuyiisye Miyeeyo Yanu
1 Imazubaano aakataazya ngotupona, ibantu ba Leza kuli koonse nkobabede balasikilwa buyumuyumu alimwi amasukusyo aasiyene-siyene. (2 Tim. 3:1-5) Toonse tuyandika lugwasyo kutegwa tukakatile mulusyomo. (1 Kor. 16:13) Tulakonzya kucita oobo kwiinda mukugwasigwaa Jehova mbotuyaabuzumanana lyoonse kulya mu Jwi lyakwe, ikusyoma muuya wakwe uusalala alimwi akukakatila kumbunga yakwe.—Int. 37:28; Rom. 8:38, 39; Ciy. 2:10.
2 Imutwe weelela wakuti “Amusime Mukuyeeya Kwanu” wakapandululwa mupulogilamu yabuzuba bomwe bwamuswaangano waalubazu mwaka wamana. Wakazwide mulugwalo lwa 1 Bakolinti 14:20, Ci, ooko nkotubala majwi amwaapostolo Paulo aakuti: “Nobakwesu, mutabi mbuli bana mukuyeeya kwanu pe. Amube mbuli bavwanda caamba cakubisya, pele amusime mukuyeeya kwanu.” Ino ncinzi ncomwakajana mupulogilamu eeyi?
3 “Yakali kukulwaizya kaka!” “Eeci ncencico ncotwakali kuyanda!” Oobu mbobakaingula bamwi ibakabuzigwa kujatikizya pulogilamu eeyi. Mane amuntu uutali Kamboni iwakajanika kumuswaangano waalubazu kuzoobona mwanaakwe musimbi wamyaka yakuzyalwa iisika ku 12 nkwabbapatizigwa, wakaamba kuti wakabotelwa kapati apulogilamu alimwi wakiibona mboyakali kuyoogwasya mukwasyi wakwe. Sena oobo mbomulimvwa andinywe? Atutwiibaluke twaambo tumwi tupati-pati twapulogilamu eeyi.
4 Luzibo Lwini-Lwini Lulayandika Mukuyiisya Miyeeyo: Mumakani aakusaanguna aakuti, “Amuyaambele Mukuyeeya Kwanu Lino,” ncinzi ncaakakankaizya mwaambi kuti nceciyandika kapati kutegwa tuzwidilile mumakatazyo ngotujana mubukkale bwesu? Nzinji nzyotuyandika kunze buyo kwaluzibo lwamumizeezo. Tuyandika kuyaambele mukuyeeya alimwi akusima mukumvwisya Bbaibbele kwesu, kutegwa tutazundwi abubi buli boonse butuzingulukide. Ikutegwa tulimvwisye munzila iili boobu, tuyandika bweendelezi bwa Leza. Mbuli sintembauzyo, tweelede kumukumbila Jehova ikutegwa atugwasye ikumvwisya milawo yakwe alimwi aziibalusyo kutegwa tumubelekele amoyo oonse.—Int. 119:1, 2, 34.
5 Mucibeela cakatobela, mulangizi wabbazu wakatondezya kuti Jehova ulatupa “Izibelesyo Zigwasilizya Kusima Mukuyeeya Zyamu Bbaibbele.” Ikumvwisya kwakapandululwa kuti caamba “kucikonzya kubona mbwaabede makani alimwi akuziba zijatikizidwe kwiinda mukubona nswaanganino yazibeela zyamakani oonse, mpoonya akubaa muzeezo angawo.” Ino nguni uukonzya kutugwasya kuyaambele mumakani aaya? Jehova watupa zipego kubantu kutegwa batugwasye kuzumanana kuyaambele munzila yakumuuya. (Ef. 4:11, 12) Imbunga yakwe yaanyika ilatukulwaizya kunoobala Jwi lya Leza abuzuba alimwi akujanika kumiswaangano yoonse yambungano lyoonse. (Int. 1:2) Tulayiisigwa mbolibelesyegwa Bbaibbele alimwi amabbuku eesu aa Bunakristo muciiyo cesu tobeni alimwi acamukwasyi kubikkilizyaa mbokulibambilwa miswaangano alimwi amulimo wamumuunda. Sena kuli notwagwasigwaa bubambe boonse oobu? Sena mulautobela mulongo wanu wapulogilamu yakubala Bbaibbele lyoonse? Eeci cilayandika kapati ikutegwa tukwabililwe kuntenda ziletwaa bukkale bwanyika, zintu zikondelezya kwakaindi buyo kasyoonto, busyaabusongo alimwi akweenwa.—Kol. 2:6-8.
6 Tweelede Kuyiisya Miyeeyo Yesu: Mwaambi mweenzu mumakani aakwe aakusaanguna aakuti “Amutabilile Buumi Bwakumuuya Kwiinda Mukuyiisya Miyeeyo Yanu,” wakapandulula kuti, aabo ibali munyika balijisi penzi lyakwaandaanya cibotu kucibi. (Is. 5:20, 21) Eeci cili boobo nkaambo tabazumini kutobela zyeelelo zya Leza ziluleme. Mukwiindana andiswe notwazumina kuyiisigwa munzila yakumuuya kwiinda mumbunga ya Jehova, tulizizyi zyeelelo zya Leza zisumpukide zyalo zitweendelezya muzintu nzyotucita alimwi amubukkale bwesu. Aboobo, swebo tulicizi ikucita cibotu alimwi iciluzi mumeso aa Jehova alimwi ceendelanaa kuyanda kwakwe kulondokede.—Rom. 12:2.
7 Ikutegwa tutajatikizigwi mukuyeeya kwanyika kunyongene alimwi azintu zibyaabi ziboola akaambo kakuyeeya kuli boobo, tweelede kuzumanana kuyiisya miyeeyo yesu. Ino eeci cicitwa buti? Kweelanaa mbokulembedwe mulugwalo lwa Ba-Hebrayo 5:12-14, imwaapostolo Paulo wakakankaizya mbokuyandika kulya cakulya ikutali buyo “mukupa” wajwi lya Leza. Tuyandika cakulya cakumuuya ciyumu mbuli ceeco ncotuli mukutambula mu Ciiyo Cabbuku Cambungano. Twamana tweelede kuzibelesya mubukkale bwesu eezyo nzyotwiiya. Twacita boobo, nkokuti tulabuzumina ibubotu bwakutobela njiisyo alimwi azyeelelo zya Jehova. Eeci ciyiisya miyeeyo yesu kuciziba kwaandaanya ciluzi alimwi acitaluzi.
8 Cilausisya kubona bamwi nkobawa munzila yakumuuya. Nkaambo nzi? Nkaambo kakuti taakwe nobakabikkilide maanu kuzintu zili kabotu mumeso aa Jehova. Akaambo kaceeco, bacegwa mumibandi iicitwa muli sikapepele alimwi aacipekupeku mwalo mubandikwa zintu zikazigwaa Magwalo, amunyimbo zisofweede naa kuyungwa mubukkale butali kabotu. Kwiinda mukucita zintu cabusongo, tatukooyoozumina ikuyungwa abantu babi mubukkale bwakutalilemeka naa bwabufwubafwuba.—Tus. 13:20; Gal. 5:7; 1 Tim. 6:20, 21.
9 Bakubusi Beelede “[Kuba] Mbuli Bavwanda Caamba Kukubisya”: Ipulogilamu yakajisi zibeela zyobilo zyakagaminide kukulwaizya bakubusi kuyiisya miyeeyo yabo. Baambi bakatondezya kuti, ikuba “bavwanda caamba kukubisya” cipandulula kuba bacece kumakani aabubi mbubwenya mbuli bacece batazi cintu kujatikizya zintu zisofweede kumeso aa Jehova. (1 Bako. 14:20, Ci) Toonse twakakulwaizigwa ikubikkila maanu mbuli mbotucibelesya ciindi cesu kutegwa tuleke bubi bwiindene-indene akutayambukilwa ambubo. (Ef. 5:15-17) Twakakulwaizigwa ikulanga-langa ciindi ncotusowa ikubala zintu zitatugwasyi mukuyaambele kwesu mukumvwisya zintu zyakumuuya. Sena mwakacita oobo? Ino ncinzi ncomwakajana? Kunze lyakubala Bbaibbele abuzuba, atuzumanane ikubala zintu imbunga nzyoitupa. Ikucita boobo, kuyootugwasya toonse kubikkilizyaa bakubusi ‘ikulijanina luzibo.’—Tus. 4:7-9.
10 “Amugwasigwe Kwiinda Mukubelesya Njiisyo Zyamu Bbaibbele Akumvwisya”: Ooyu nguwakali mutwe wamakani aamamanino mupulogilamu yamuswaangano waalubazu. Mwaambi mweenzu wakapandulula kuti, kuli Jehova Nkokuzwa luzibo lupa buumi lwalo lusumpukide kapati kwiinda luzibo lwabantunsi. Amuciyeeyele buyo coolwe ncotujisi cakubelesya luzibo lwa Jehova! Ulalupa cabwaabi kulibaabo ibaluyandaula alimwi akulukumbila mulusyomo. (Tus. 2:3-5, 9; 28:5) Sena mulacibelesya kabotu cipego eeci?
11 Twakakulwaizigwa ikwiiya kubikkila maanu kunjiisyo zigwasya eelyo notubala Bbaibbele. (2 Tim. 3:16, 17) Atuziiye cabunkutwe ikutegwa tujane luzibo lwini-lwini kujatikizya ncaali mukwaamba Jehova. Atujane ciindi cakuzinzibala kuyeeya anjiisyo eezi alimwi akuzibikka mumizeezo alimwi amumoyo wesu. Eeci ciyooyiisya miyeeyo yanu kutegwa kamuzwidilila ciindi nomusala zintu zyakucita kujatikizya bukkale bwanu. (Jos. 1:8) Atulange-lange bukkale bumwi bantu banji mobajanika alimwi akubona mbotunga twagwasigwa kwiinda mukubelesya njiisyo zyamu Bbaibbele.
12 ‘Sena inga ndatobela nsamino alimwi akulibamba kumwi kudumide?’ Nsamino alimwi akulibamba ikuliko sunu munyika kanjikanji kutondezya muuya wabuzangi. Imuuya uuli boobu upa kuti bantu kabasama cabuyamba alimwi munzila iitakondelezyi naa munzila iiletela muzeezo wakoonana. Ino ninjiisyo zili buti iziyandika kapati zyamu Bbaibbele ziyootugwasya kukazya ziyanza zili boobu? Mbwaanga twakayiisya miyeeyo yesu, tuyoobikkila maanu kunjiisyo iijanika mulugwalo lwa 1 Timoteo 2:9, 10, iijatikizya kusama ‘bweelede mbubonya mbubeelede kusama bantu bakomba Leza.’ Njiisyo zimwi nzyotukonzya kubelesya zilabikkilizyaa zyeezyo zyaambwa mulugwalo lwa 2 Ba-Korinto 6:3 alimwi alwa Ba-Kolose 3:18, 20.
13 ‘Ncinzi ncondeelede kucita kutegwa tuzumanane kukamantana mumukwasyi wangu?’ Ikwaambauzyanya kuli kabotu akati kabanamukwasyi ncintu ciyandika kapati. Lugwalo lwa Jemusi 1:19, Ci, lutwaambila kuti: “Muntu woonse kafwambaana kuswiilila, pele atafwambaani kwaamba, nikuba kunyema.” Bana mukwasyi bayandika kupana ciindi alimwi akwaambauzyanya akaambo kakuti ikwaambauzyanya mumukwasyi ncintu ciyanda kwaabana. Noliba leelyo notwaamba zintu zyamasimpe, ikuti twazyaamba munzila yalunya, cakulisumpula naa iitondezya kutababikkila maanu bamwi, masimpe ziyoobacisa mumoyo bamwi muciindi cakubagwasya. Aboobo, tacikwe makani naa tuli balumi naa bakaintu, bazyali naa mwana, imajwi eesu ayelede ‘kuba aluzyalo akulweezegwa amunyo.’—Kol. 4:6.
14 ‘Sena ndimuntu uuyandisya zintu zyakumubili?’ Ikuyandisya zintu zyakumubili ncecintu cikankaizigwaa munyika calo eeco ciletela manyongwe mubukkale bwamuntu. Taakwe anokugwasya muntu ikuti abe alukkomano lwini-lwini. (Muk. 5:10; Lk. 12:15; 1 Tim. 6:9, 10) Mukutugwasya ikutegwa tutanjili mukooze kakuyandisya zintu zyakumubili, Jesu wakatuyiisya njiisyo eeyi iiyandika kapati: Ikubaa liso lyabuuya. Ikupona buumi buuba-uba, bwakutayandisya zintu zyakumubili kubikkilizya kugamika meso eesu azintu zya Bwami, akubikka zimwi zyoonse musyule.—Mt. 6:22, 23, 33.
15 Iceelede Kuba Mbaakani Yesu: Tulijisi Jwi lya Leza mwalo motukonzya kujana njiisyo ziluleme zitusololela mukusala zintu nzyotucita. Tuyandika kuziiya njiisyo eezi, kuzinzibala kuyeeya alinzizyo alimwi akujana luzibo lwambotukonzya kuzibelesya mubukkale bwesu. Aboobo, kwiinda ‘mukuyiisya miyeeyo yesu mukwaandaanya cibotu acibi,’ tuyoogwasigwa kapati alimwi akumuletela bulemu Jehova.—Heb. 5:14.