Ikugwasya Bamwi Kuti Batembaule Jehova
1 Imulumbe uuyandika kapati uli mukwaambilizyigwa kubantu munyika yoonse mbwiizulwa wakuti: “Amuyoowe Leza akumupa bulemu, nkaambo casika ciindi calubeteko lwakwe. Amukombe oyo iwakalenga ijulu anyika alwizi atusensa twamaanzi.” (Ciy. 14:6, 7) Tulaacoolwe cipati cakutola lubazu mukwaambilizya ooku. Ino ncinzi bantu ncobeelede kuzyiba kujatikizya Jehova kutegwa bamuyoowe alimwi akumukomba?
2 Izina Lyakwe: Bantu beelede kuzyiba lwaandaano luliko akati ka Leza mwini-mwini uuli alikke alimwi abaleza bakubeja ibakombwa mazubaano kwiinda mukubelesya zina lyakwe. (Dt. 4:35; 1 Kor. 8:5, 6) Alimwi balembi ba Bbaibbele bakabelesya zina lya Jehova lizyibidwe kapati iziindi ziinda ku 7,000. Nokuba kuti tweelede kubelesya bupampu kujatikizya notweelede kutalika kulibelesya zina lya Leza, tatweelede kulisisa naa kucilekela limwi buya kulibelesya. Leza ncayanda ncakuti, ibantu boonse balizyibe zina lyakwe.—Int. 83:18.
3 Bube Bwakwe: Ikutegwa bamutembaule Jehova, bantu beelede kumuzyiba mbwabede Leza ooyu. Tweelede kubayiisya kujatikizya luyando lwakwe lwini-lwini, busongo bwakwe butalivwulili, bululami bwakwe bubotu kapati alimwi anguzu zyakwe zyipati kubikkilizya aluse lwakwe, luzyalo alimwi abube bumwi butaliboteli. (Kul. 34:6, 7) Alimwi beelede kwiiya kumuyoowa Leza cakumaninina, kumutembaula alimwi akuzyiba kuti buumi bwabo buyeeme akuzuminwa a Jehova.—Int. 89:7.
4 Ikuba Balongwe ba Leza: Bantu beelede kwiita zina lya Jehova kabajisi lusyomo kutegwa bakafwutulwe ciindi calubeta lwa Leza oolo luboola. (Rom. 10:13, 14; 2 Tes. 1:8) Eeci cijatikizya zintu zinji ikutali buyo kuba aluzibo lwazina lya Leza alimwi abube bwakwe. Tweelede kubagwasya bantu kuba balongwe babotu a Jehova akuti bamusyome camoyo woonse. (Tus. 3:5, 6) Mbobayaabuzumanana kuzitobela zintu nzyobaiya, kupaila kuli Leza camoyo woonse alimwi akulibonena lugwasyo lwakwe mubuumi bwabo, lusyomo lwabo luyooyungizyigwa calo ciya kupa kuti babe balongwe beni-beni a Jehova.—Int. 34:8.
5 Atwaambilizye zina lya Leza cabusungu alimwi akubagwasya bamwi kuti bamusyome cakumaninina akumuyoowa. Tulakonzya kugwasya banji kuzyiba Jehova alimwi akumutembaula kali “Leza [wabo] walufutuko.”—Int. 25:5.