Amukutantamuke Kuyandaula “Zintu Zyabuyo”
1 Imwi nzila iidumide yakubandika abantu bali kule mazuba aano njakulembelana twaambo kubelesya kkompyuta (E-mail). Nokuba kuti kubandika zintu zyakatucitikila alimwi atwaambo tumwi kuli bamumukwasyi abalongwe kwiinda mukubelesya kkompyuta cili buyo kabotu, ino ‘nzintu nzi zyabuyo’ zijatikizyidwe mukulembelana twaambo kubelesya kkompyuta (E-mail) cakutalyeendelezya?—Tus. 12:11.
2 Kucenjezya Kujatikizya Makani Aakulembelana Kubelesya Kkompyuta (E-Mail): Bamwi baamba kuti balimvwa kuyanzana kapati ambunga ya Jehova ciindi nobatambula twaambo akkompyuta ntobabona kuti makani mapya. Aaya makani inga abikkilizya zyakuluula, twaambo tujatikizya zicitika ku Bbeteli, malipooti aantenda zicitika naa kupenzyegwa kwabakwesu alimwi naaba makani aamaseseke aambilizyigwa ku Zikolo Zyamulimo wa Bwami. Bamwi balibonya kuba bantu bayandisisya kutumina twaambo tuli boobu kabayanda kuba bataanzi kwaambila beenzinyina.
3 Zimwi ziindi, twaambo alimwi azyakuluula zyanyonganyizigwa antela kuyungizya twaambo tumwi tutali twamasimpe. Naa ambweni mukusola kubotya makani, bamwi baamba makani aakubeja. Aabo bafwambaana kwaamba makani aali boobu kanji-kanji tabajisi twaambo toonse tuzulide. (Tus. 29:20) Zimwi ziindi, nokuba kuti makani aboneka kuti alagambya, alatuminwa akaambo kakuti alakondelezya. Makani aatali aamasimpe naa aanyonganya boobu inga aba ‘mmakani aakubeja,’ aatakulwaizyi kulyaaba kwini-kwini kuli Leza.—1 Tim. 4:6, 7.
4 Ikuti mwatumina makani aajanika kuti ngakubeja, muyooba amulandu kumapenzi naa manyongwe aakonzya kubawo akaambo kamakani aayo. Davida naakatambula mulumbe wakajisi twaambo tuyungizyidwe wakuti bana bakwe boonse bajaigwa, “wakadeluula zyakusama zyakwe” akaambo kakupenga mumoyo. Pele mubwini, omwe buyo akati kabana bakwe nguwakafwide. Masimpe eeci cakali kuusisya kapati, pele twaambo ootu tutali twamasimpe twakapa Davida kuba mumause mapati. (2 Sam. 13:30-33) Masimpe, tatweelede kucita cintu cili coonse cikonzya kunyonganya naa kutyompya mukwesu uuli woonse.
5 Nzila Njabikkide Leza: Mutalubi kuti Taateesu wakujulu wakabikka bubambe “[bwa]muzike musyomesi uucenjede” bwalo mbwabelesya kutwaambila twaambo. “Muzike” ooyo ujisi mukuli wakubona kuti ino mmakani aali buti aayelede kuzyibya bamuŋanda yalusyomo, alimwi “aciindi ceelede” cakubazyibya. Cakulya cakumuuya eeci cipegwa buyo kwiinda mumbunga yeendelezyegwa a Leza. Ciindi coonse tweelede kulangila kububambe mbwabikkide Leza kutegwa twaambilwe makani aasyomeka, kutali kubantu babelesya Internet.—Mt. 24:45.
6 Kkeyala yaa Internet: Tujisi kkeyala yesu ya Internet eeyi: www.watchtower.org. Kkeyala eeyi ilakonzya kupa twaambo tuyandika kubanamaleya. Kunyina muntu, kkomiti naa mbungano iili yoonse yeelede kuba akkeyala yaa Internet iyaamba kujatikizya Bakamboni ba Jehova. Bamwi babikka makani aali mumabbuku eesu kubikkilizya amagwalo oonse alimwi atwaambo toonse tupandulula makani alimwi mane babikka atwaambo tujisi makani aakumuswaangano wacooko kubelesya bubambe bwakusanga. Tacikwe makani naa kuli mpindu njobajana naa pe, ikulembulula alimwi akumwaya mabbuku aa Bakamboni ba Jehova kwiinda mukubelesya kkompyuta nkusotoka milawo iikasya kulembulula zintu. Nokuba kuti bamwi inga balimvwa kuti babelekela bakwesu, kucita oobo takuzumizidwe aboobo kweelede kulekwa.
7 Amuzizyibe Zintu Zisowa Ciindi: Ciindi aciindi toonse tweelede kulilingula akubona mbotucibelesya ciindi ncotujisi. Ibbaibbele litukulwaizya kuti: “Amucenjele loko mbumweenda. Muteendi mbuli bafubafuba, pe, amweende mbuli basimaanu. Amujatisye loko ciindi canu coonse, nkaambo kakuti mazuba aasunu mabi.” (Ef. 5:15, 16) Amulange-lange mapenzi aaboola akaambo kakusumpuka mukutuminana twaambo akkompyuta. Nokuba kuti makkompyuta alimwi azibelesyo zimwi zilagwasya, zilakonzya kuba zilebyo ikuti tiitwacenjela kapati kujatikizya mbotucibelesya ciindi ncotujisi.—1 Kor. 7:29, 31.
8 Aumwi wesu weelede kulibuzya kuti: ‘Sena ciindi ncejisi abuzuba ndicibelesya kubala naa kwiingula magwalo akkompyuta alo aanyemya buyo? Sena kanji-kanji ndilaambaula kubelesya luwaile naa kutuma milumbe yaaluwaile lwamumaanza kujatikizya twaambo tunyina mpindu? (1 Tim. 5:13) Sena ndilalanga-langa zijanika mumakkeyala aa Internet kakunyina amakanze aali oonse naa ciindi coonse ndiide kweebelela kufwumbwa caboola acipekupeku? Sena kusobana zisobano zyaakkompyuta naa zyaavidiyo kundimanina ciindi cakucita ciiyo cangu ca Jwi lya Leza?’ Kuyandisisya zintu zili boobu kulakonzya kutunyonganya kumuuya.—Tus. 12:11.
9 Kuzilanga munzila mbotu zintu alimwi akulilemeka notubelesya kkompyuta mukubandika abantu bali kule kuyoopa kuti mizeezo yesu izuzyigwe “imbono zyoonse ziyandika zibotezya.”—Tus. 24:4.