Kabbokesi Kamubuzyo

◼ Ino ninzila nzi mbotu njotukonzya kubelesya kusanga mali kutegwa tugwasye bakwesu bayandika lugwasyo muzisi zimwi?

Zimwi ziindi tulaakumvwa kuti bakwesu kucisi cimwi bayandika lugwasyo lwazintu zyakumubili akaambo kakupenzyegwa, ntenda naa mapenzi amwi. Bamwi bakwesu cabapa kuti batume mali kuofesi lyamutabi kucisi oko kuli mapenzi kulomba kuti mali akabelesyegwe kugwasya muntu umwi, imbungano imwi naa bubambe bumwi bwamayake bubikkidwe.—2 Kor. 8:1-4.

Nokuba kuti ikubikkila maano nkobacita bakwesu ooku kulalumbwa kapati, kanji-kanji kujanika kuti kuli zintu ziyandika kapati kwiinda zyeezyo sikusanga zyajisi mumizeezo. Zimwi ziindi kujanika kuti awo mpaali kuyanda kugwasya sikusanga mulimo ooyo wacitwa kale. Masimpe, tulakonzya kuba alusyomo lwakuti imali aasangwa naatumwa kuofesi lyamutabi kubusena nkotubede kuti akabelesyegwe kumulimo wanyika yoonse, Mali Aakugwasilizya Kuyaka Maanda aa Bwami naa akugwasyilizya kubusena kuli ntenda, aya mali aasangwa ayakubeleka mbweena bwaamba sikusanga.

Bakwesu mumitabi yoonse bakaiisigwa kabotu kuti beelede kucita cakufwambaana ikuti kwacitika cintu catali kulangilwa. Mumbazu zyoonse eezyi, mutabi ooyu ulabazibya ba Kabunga Keendelezya kukaambo aka. Naa kuli lugwasyo lumwi luyandika, iba Kabunga Keendelezya balakonzya kwaambila mitabi imwi kuti igwasye, naa imali alakonzya kutumwa kuzwa kumaofesi mapati.—2 Kor. 8:14, 15.

Aboobo, mali oonse aasangilwa mulimo wanyika yoonse, bubambe bwamayake muzisi zimwi naa kubelesyegwa kumasena kwacitika ntenda, ayelede kutumwa kuofesi yamutabi mucisi momukkala kwiinda mumbungano naa kutuma buyo kuofesi. Munzila iili boobu, “muzike musyomesi uucenjede” kwiinda mububambe bwambunga bubikkidwe a Kabunga Keendelezya, ulabagwasya bakwesu abo babulide munyika yoonse munzila iili kabotu.—Mt. 24:45-47; 1 Kor. 14:33, 40.