Amugwasye Bamwi Kuti ‘Baswiilile Amoyo Woonse’
1. Ncinzi Jehova ncayanda kubakombi bakwe?
1 Ikuswiilila kulayandika mukukomba Jehova munzila njayanda. (Dt. 12:28; 1 Pet. 1:14-16) Ino-ino, lubeta lwa Leza luyoobasikila aabo “batamuzi Leza akutaswiilila Makani Mabotu.” (2 Tes. 1:8) Mbuti mbotukonzya kugwasya bamwi ‘kuswiilila amoyo woonse’ injiisyo zya Jwi lya Leza?—Rom. 6:17.
2. Nkaambo nzi ncociyandika kugwasya bamwi kuba alusyomo luyumu?
2 Kwiinda Mukubagwasya Kuba Alusyomo Aluyando: Mu Magwalo, ikuswiilila kuliswaangene kapati alusyomo. Mwaapostolo Paulo wakaamba zya ‘mulazyo wa Leza uuteeli kulibamasi boonse kuti kabaswiilila akaambo kalusyomo.’ (Rom. 16:26) Ku Ba-Hebrayo caandano 11 kulizubuludwe zikozyanyo zyalusyomo zinji, ibunji bwanzinzyo zyakali kujatikizya kubweza ntaamu yeendelana akuyanda kwa Jehova kugaminide. (Heb. 11:7, 8, 17) Kulubazu lumwi, ikutaswiilila kuliswaangene akubula lusyomo. (Joh. 3:36; Heb. 3:18, 19) Tweelede kuba aluzyibo mukubelesya Ijwi lya Leza kutegwa tugwasye bamwi kuba alusyomo lukonzya kupa kuti kabaswiilila munzila eeyo.—2 Tim. 2:15; Jak. 2:14, 17.
3. (a) Ino kuswiilila kuswaangene buti aluyando? (b) Mbuti mbotukonzya kugwasya basikwiiya Bbaibbele kuyanda Jehova?
3 Alimwi ikuswiilila kuliswaangene akuyanda Leza. (Dt. 5:10; 11:1, 22; 30:16) Lugwalo lwa 1 Johane 5:3 lwaamba kuti: “Oku nkokuyanda Leza, kuti twabamba milazyo yakwe, alimwi milazyo yakwe tiili miyumu.” Mbuti mbotukonzya kugwasya basikwiiya Bbaibbele kuyanda Jehova? Amujane ciindi nomwiiya cakubagwasya kubuyandisya bube bwa Jehova. Amwaambe mbomulimvwa mumoyo kujatikizya Leza. Amumugwasye sikwiiya kubikkila maano kukuba acilongwe cini-cini a Jehova. Icipati ncakuti, ikuyanda Jehova kuyookulwaizya bamwi—kubikkilizya andiswe—kumuswiilila amoyo woonse.—Mt. 22:37.
4. (a) Nkaambo nzi cikozyanyo cesu ncociyandika? (b) Ncinzi ncotweelede kucita kutegwa tube a “moyo wakumvwa”?
4 Kwiinda Mucikozyanyo Cesu: Nzila iiyandika kapati motukonzya kukulwaizya bamwi kuswiilila makani mabotu nkwiinda mucikozyanyo cesu. Pele, tuyandika kusolekesya lyoonse kutegwa tube a “moyo wakumvwa.” (1 Bam. 3:9; Tus. 4:23) Ino eeci cibikkilizya nzi? Amulye cakulya cakumuuya kwiinda mukwiiya Bbaibbele lyoonse akujanika kumiswaangano. (Int. 1:1, 2; Heb. 10:24, 25) Amuyanzane abantu ibakamantene mubukombi bwakasimpe. (Tus. 13:20) Amutole lubazu lyoonse mumulimo wamumuunda, kamukanzide ncobeni kugwasya bantu bali mucilawo momubelekela. Amupailile lugwasyo lwa Jehova kutegwa amusololele kuba amoyo mubotu. (Int. 86:11) Amutantamuke zintu zikonzya kusofwaazya moyo wanu, mbuli kulikondelezya kujatikizya kutalilemeka akulwana. Amutobele zintu zikonzya kumugwasya kuba acilongwe a Leza alimwi zikonzya kuyumya cilongwe canu anguwe.—Jak. 4:7, 8.
5. Mmuunzila iili buti aabo ibaswiilila mobali mukulongezyegwa?
5 Jehova wakasyomezya bantu bakwe bansiku kuti zilongezyo zyakali kuyoobasikila ikuti baswiilila ijwi lyakwe. (Dt. 28:1, 2) Ncimwi buyo amazuba ano, Jehova ulabalongezya kapati aabo “bamuswiilila.” (Mili. 5:32, Ci) Aboobo, kwiinda mukuyiisya alimwi acikozyanyo cesu, atugwasye bamwi kuti baswiilile amoyo woonse.