Kuzibya Bantu Munyika Yoonse Zyamuswaangano Wacooko wa “Lufwutuko Luli Afwaafwi!”
Basikumwaya Bali Mumbungano Aimwi Beelede Kwaabila Kapepa Kaalubazu
1 Kutalikila mumwezi wa May, 2006 mumasi aamwi kusikila miswaangano yacooko nyika yoonse ikamane, kuyooba kuzibya bantu munyika yoonse zyamuswaangano wacooko uuyoocitwa mumasi aabalilwa ku 155. Makanze ngakucita kuti babe aluyandisisyo akukulwaizyigwa kuyoojanika kumuswaangano wacooko. Kuzibya ooku kuyoobikkilizya amuswaangano wacooko waalubazu uuyoocitwa mucisi ca Germany, Czech Republic alimwi a Poland mumwezi wa July kuyoosika kunsondo yakusaanguna ya August 2006.
2 Akaambo kakuti tupona kumazuba aakumamanino kwini-kwini, muswaangano wacooko uukankaizya lufwutuko kubukkale oobu bubyaabi Leza ndwasyomezyede, weelede kubakulwaizya kapati bantu aabo basalidwe buumi butamani. Mulumbe weelede kubakulwaizya kutelaika ziyoocitika kumbele. Kutegwa tuulunzuma twabantu tukajane ciindi cakumvwa mulumbe waluumbulizyo alimwi wabulangizi, mbungano zya Bakamboni ba Jehova ziinda ku 98,000 zyakulwaizyigwa kutola lubazu cabusungu mukuzibya bantu zyamuswaangano wacooko nkozyeelede kuyoojanika.
3 Mbungano ziyoopegwa tupepa tunji calo ciyoopa kuti sikumwaya aumwi apegwe tupepa tusika ku 15. Ooto tunga twayindilila tulakonzya kubelesyegwa abapainiya bali mumbungano. Mumbungano aimwi, ikuzibya ooku kuyootalika kakucili nsondo zyotatwe ibuzuba bwamuswaangano wacooko mbungano nkoyeelede kuyoojanika kabutanasika. Eeci ceelede kumupa ciindi cinji cakubeleka busena bupati bwacilawo cambungano.
4 Cilayandika kupa aumwi uuli aŋanda kapepa kamugeme ciindi nokwakonzyeka. Nokuba boobo, ikuti bamwi tiibajanika aŋanda, mulakonzya kukasyonka kapepa cabusongo amulyango naa nzila iimbi iikonzya kubeleka. Alimwi basikumwaya bayooyandika kuba masimpe kuti mbobaiya limwi Bbaibbele, bamumukwasyi wambobaiya limwi Bbaibbele, abaabo bantu bajisi luyandisisyo ibali mucilawo, baswaigwa akutambwa kumuswaangano wacooko. Mweelede kusolekesya kutwaabila tupepa toonse munsondo zyotatwe.
5 Lipooti ya Mulimo wa March mu Mulimo Wesu wa Bwami uuno yeelede kutukulwaizya kumulimo uuyungizyigwa ooyu. Tulikkomene kumuzibya kuti kwaba kuyungizyigwa kupya kuli mbokubede. Kwakaba kuyungizyigwa kupati kwabapainiya baciindi coonse kusika kumweelwe wa 10,168 calo capa kuti basikumwaya boonse basike amweelwe wa 129,806. Kuyungizya waawo, kwakaba kuyungizyigwa kupya kwakwaabila mabbuku aali 37,454 alimwi amamagazini aali 667,593. Alimwi lipooti itondezya kuyungizyigwa kupati kwakweendelezya Ziiyo zya Bbaibbele zili 209,034.
6 Sena mulabuyeeya busungu bwakatondezyegwa mumbungano yanu akaambo kamulimo wakumuuya waciindi cisyoonto mumwezi wa March? Sena kuyungizyigwa kwamusyobo ooyu kulakonzya kwiindwa amweelwe uyoocitwa ciindi cakuzibya bantu munyika yoonse? Balangizi baciiyo cabbuku alimwi abaabo babagwasyilizya, beelede kubona mbobakonzya kubakulwaizya boonse bali mukabunga kabo kuyungizya mulimo wabo. Kuyungizya waawo, balembi beelede kulemba lipooti yamulimo wamumuunda yambungano iiluzi alimwi akwiitumina cakufwambaana kuofesi yamutabi. Sikumwaya uupa lipooti yamulimo wamumuunda aimbi akaambo kakuti tanaakapa lipooti mwezi wamana, ubalwa kuti mbaasikumwaya bobile.
7 Tulisinizyide kuti bukambausi bubotu buyoocitwa akaambo kakusolekesya ooku kwakuzibya bantu munyika yoonse zya Muswaangano Wacooko wa “Lufwutuko Luli Afwaafwi!” mbuli mbokutondezyedwe mucibalo ecino. Tumukombela kuti Jehova amulongezye kapati mukusolekesya kwanu nomutola lubazu mukuzibya ooku kwanyika yoonse.