Amubagwasye Kulumba Bube bwa Jehova Butakonzyi Kweezyanisyigwa
1 Mumulimo wesu, tatuyiisyi buyo bamwi kasimpe kamu Bbaibbele kantalisyo. Tulabagwasya bantu kumuziba mbwabede Jehova alimwi akubagwasya kulumba bube bwakwe butakonzyi kweezyanisyigwa. Babombemyoyo nobaiya kasimpe kujatikizya Leza, kalabajatikizya kapati alimwi cibapa kuti bacince bukkale bwabo ‘kutegwa beende munzila iielede cakubotezya Jehova muziyanza zyoonse.’—Kol. 1:9, 10; 3:9, 10.
2 Bbuku Lipya Lyakuyiisya: Kuzwa kumatalikilo, bbuku lya Bbaibbele Ncoliyiisya lilabupandulula bube bwa Jehova. Ncicona cibalo cakusaanguna cilayiingula mibuzyo eeyi: Sena ncobeni Leza ulamulanganya?, Ino Leza ulibonya buti? awakuti Sena cilakonzyeka kuba acilongwe a Leza? Alimwi cibalo eeci cilapandulula busalali bwa Jehova (munc. 10), bululami aluzyalo ndwajisi (munc. 11), luyando ndwajisi (munc. 13), nguzu zyakwe (munc. 16), alimwi aluse, buuya, kulisungula kulekelela, kukkazyika moyo akusyomeka (munc. 19). Muncali 20 mukufwiinsya waamba kuti: “Mbomuya buvwuzya nzyomwiiya kujatikizya Jehova, uyooba mwini-mwini kulindinywe alimwi muyoojana twaambo tunji ncomweelede kumuyanda akuba mulongwe wakwe.”
3 Ino mbuti mbotukonzya kulibelesya bbuku lya Bbaibbele Ncoliyiisya kutegwa tubagwasye basikwiiya Bbaibbele kuba acilongwe a Jehova? Twamana kulanga-langa muncali uupandulula bube bwa Leza bumwi, inga twamubuzya sikwiiya kuti, “Ino eeci nywebo kumugama cimuyiisya nzi kujatikizya mbwabede Jehova?” naa “Ino mbuti eeci mbocitondezya Leza mbwamubikkila maanu nywebo kumugama?” Kwiinda mukubelesya mibuzyo yamusyobo eeyi ziindi zimwi notweendelezya ciiyo, tuyiisya mbotwiiya limwi Bbaibbele kuzinzibala kuyeeya nzyobaiya akubagwasya kulumba kapati kujatikizya bube bwa Jehova butakonzyi kweezyanisyigwa.
4 Amukabelesye Kabbokesi Kakwiinduluka: Kumamanino kwacibalo acimwi, amumulombe sikwiiya kwiingula mumajwi aakwe ikaambo akamwi kali mukabbokesi kakuti “Bbaibbele Ncoliyiisya.” Amumugamike kumagwalo aabikkidwe. Kutegwa mumukulwaizye sikwiiya kwaamba zili kumoyo wakwe, ziindi zimwi inga mwabuzya kuti, “Ino mulimvwa buti kujatikizya eeco Bbaibbele ncoliyiisya kukaambo aaka?” Kwiinda mukucita boobo, tamukookankaizya buyo twaambo tupati-pati pele alimwi muyooziba cini-cini ncasyoma sikwiiya. Eeci ciyoomugwasya sikwiiya kubamba cilongwe a Jehova.