Amubagwasye Bamwi Kuba Balongwe ba Leza
1 Mazuba aano, bantu bazwa mumasi oonse bali mukuyiisyigwa nzila zya Jehova. (Is. 2:2, 3) Nokuba boobo, kutegwa bantu aaba bacikonzye ‘kuzyala micelo calunamba,’ beelede kumuyandisya Jehova. (Lk. 8:15; Mk. 12:30) Ikuti kabatalujisi luyando oolu, tabakakonzyi kuyuma mukukazya kuyungwa kutali kabotu naa kuba basicamba mukucita zintu ziluleme. Nzila imwi yakugwasya bamwi kuba acilongwe cibotu a Jehova, nkubagwasya kuyandisya bube bwakwe. Amubakulwaizye kutulanga-langa kabotu-kabotu twaambo tuli mubbuku lya Amubaa Cilongwe a Jehova.
2 Cikozyanyo Canu: Micito yanu ilakonzya kubajatikizya kapati basikwiiya Bbaibbele. Ciindi nobabona kuti mulacibikkila maanu cilongwe canu a Jehova akubona mbocibujatikizya buumi bwanu, balakonzya kukulwaizyigwa kuba acilongwe camusyobo ooyu abalo. (Lk. 6:40) Masimpe, cikozyanyo cesu kanji-kanji cilabajatikizya kapati bamwi ikwiinda nzyotwaamba.
3 Nzila mpati bazyali mobayiisya bana babo kuba aluyando kuli Jehova nkwiinda mucikozyanyo cabo. (Dt. 6:4-9) Bamwi banabukwetene bakali kuyanda kukomezya bana babo mukasimpe, bakalomba kupegwa malailile kubazyali bakacikonzya kuyiisya bana babo. Mulumi wakaamba kuti: “Muzeezo boonse mbondakabandika limwi ngobakajisi bakaamba kuti cikozyanyo cabazyali cilayandika kapati.” Aboobo, kwiinda mubukkale bwabo boonse, bazyali balakonzya kuba cikozyanyo cibotu kubana babo kujatikizya ncocaamba kuba ‘mulongwe wa Jehova.’—Jak. 2:23.
4 Kupaila Camoyo Woonse: Alimwi mulakonzya kubagwasya bamwi kuba acilongwe a Jehova kwiinda mukubayiisya kupaila kuzwa kunsi aamoyo. Mulakonzya kubagamika kumupailo wacikozyanyo wa Jesu, kubikkilizya amipailo minji yakapailwa camoyo omwe iilembedwe mu Magwalo. (Mt. 6:9, 10) Mulakonzya kubayiisya bana banu alimwi abasikwiiya Bbaibbele mbobakonzya kupaila kwiinda mukuswiilila kumipailo yanu. Ciindi nobamvwa nzyomwaamba camoyo woonse, balaziba mbomulimvwa kujatikizya Jehova. Amubakulwaizye “kujatisya kukomba” ciindi nobali mumasunko. (Rom. 12:12) Banoobona kuti Jehova ulabagwasya muziindi nobayandika lugwasyo, bayootalika kumusyoma alimwi akumuyanda kali mulongwe wini-wini.—Int. 34:8; Flp. 4:6, 7.