“Amube Amyoyo Yakulumba”
1 Jesu naakaponya basicinsenda bali kkumi, omwe buyo nguwakapiluka kuzoolumba. Jesu wakabuzya kuti: “Sena tabasalede abali kumi? Ino bali kuli abali musanu mubane?” (Lk. 17:11-19) Elo cilayandika kaka kuba bantu balumba zipego zibotu zyoonse alimwi azyoolwe zyoonse nzyotupegwa kuzwa kuli Taateesu mwaabi alimwi siluyando, Jehova Leza!—Kol. 3:15; Jak. 1:17.
2 Ino nzintu zili nzyotweelede kulumba? Tulalumba cinunuzyo, icipego ciinda kukomena Leza ncaakapa kubantu. (Joh. 3:16) Alimwi tulamulumba Jehova akaambo kakutukwelela kulinguwe. (Joh. 6:44) Ilukamantano lwa Bunakristo bwanyika yoonse nkaambo akambi katupa kulumba. (Int. 133:1-3) Cakutazumbauzya, kuli zipego zinji nzyatupede Jehova nzyomunga mwayeeya. Swebo kaka tutabi mbuli bana Israyeli batakali kulumba, ibakaluba milimo yoonse mibotu njaakabacitila Jehova!—Int. 106:12, 13.
3 Amutondezye Kulumba: Nokuba kuti basicinsenda boonse bali kkumi balakonzya kuti bakalumba kuli nzyaakabacitila Jesu, omwe buyo nguwakatondezya kulumba. (Lk. 17:15) Mbubwenya buyo, tulatondezya kulumba kwiinda mukutola lubazu cabusungu mumulimo wakukambauka. Ikuti katulumba ncobeni kuzintu zyoonse nzyaatucitila Taateesu wakujulu siluyando, myoyo yesu iyootukulwaizya kwiiya luyando lwakwe alimwi abwaabi kwiinda mukwaambila bamwi kujatikizya nguwe. (Lk. 6:45) Mpoonya, twana kwaambila bamwi kujatikizya ‘milimo mibotu ya Jehova alimwi amakanze aakwe kulindiswe,’ luyando ndotujisi kulinguwe alimwi akulumba kwesu ziyookomena.—Int. 40:5.
4 Amubagwasye Bantu Kutondezya Kulumba: Tweelede kuyandaula nzila mbotukonzya kubagwasya bana besu alimwi ambotwiiya limwi Bbaibbele kuba bantu balumba. Bazyali bajisi zyoolwe zinji mbobakonzya kucita boobu, mbuli ciindi nobalangilila zilenge zya Jehova antoomwe abana babo. (Rom. 1:20) Notweendelezya ciiyo ca Bbaibbele, inga twamubuzya ngotuyiisya kuti: “Ino eeci citwaambila nzi kujatikizya mbwabede Jehova?” Sikwiiya nayaambele mukulumba kwakwe, alwalo luyando ndwajisi kuli Leza alimwi amakanze aakwe aakumukkomanisya ziyookomena.
5 Mumazuba aano aakumamanino, bantu banji tabalumbi. (2 Tim. 3:1, 2) Elo Jehova ulakkomana kaka nabona babelesi bakwe balyaabide kabatondezya kulumba kwiinda mukutola lubazu cabusungu mumulimo wakukambauka!—Jak. 1:22-25.