Kabbokesi Kamubuzyo

◼ Sena cileelede kuti baswiilizi kabakambilila kufwumbwa ciindi mwaambi wamana kukanana makani aakwe mu Cikolo Camulimo Weendelezyegwa a Leza alimwi amu Muswaangano wa Mulimo?

Imulengi Jehova naakamana kubamba nyika, “zyakaimba nyenyeezi zyabucedo, abaangelo [bakoompolola] mukusekelela.” (Job. 38:7) Aaba bana ba Leza ibangelo bakalombozya kutembaula Jehova akaambo kamulimo wakwe wakulenga, calo cakali nzila mpya yakutondezyela busongo, bubotu alimwi anguzu zyakwe.

Ncintu cibotu kuti katulumba camoyo woonse kumulimo nguboonda bakwesu alimwi amakani antela citondezyo ncobacita. Mucikozyanyo, tulakambilila muntu wamana kukanana makani alimwi akucita zitondezyo kumiswaangano iilibedelede, mbuli miswaangano yabbazu ayaalubazu alimwi amiswaangano yacooko. Makani aakananwa akatola ciindi cili mbocibede alimwi akubikkila maano mukulibambila. Ikukambilila takutondezyi buyo kulumba bunkutwe bwamwaambi, pele alimwi tulalumba akaambo kamalailile Jehova ngapa kwiinda mu Jwi lyakwe alimwi amumbunga.—Is. 48:17; Mt. 24:45-47.

Ino mbuti kukambilila amana kupegwa makani mu Cikolo Camulimo Weendelezyegwa a Leza alimwi amu Muswaangano wa Mulimo? Kunyina mulawo uukasya kukambilila kuti kwacitwa munzila yeelede, ambweni mbuli sikupa makani naamana kupa makani aakwe aakusaanguna mucikolo. Pele, kukambilila kulakonzya kusika aciimo mpokukonzya kucitwa buyo cakwiinzya mulawo, aboobo inga takucigwasyi pe. Aboobo tatweelede kwiide kukambilila mbwaamanina makani aali woonse pe.

Nokuba kuti tatukambilili kumakani manji aapegwa mu Cikolo Camulimo Weendelezyegwa a Leza alimwi amu Muswaangano wa Mulimo, kuli nzila zinji toonse mbotukonzya kulumba malailile alimwi abunkutwe bwabaabo bali kukanana makani. Tulakonzya kucita oobo kwiinda mukupakamana lyoonse alimwi akubikkila maano kapati nobakanana makani baambi. Eelyo wamana muswaangano, kanji-kanji cilakonzyeka kubonana amwaambi kutegwa tumulumbe akaambo kamulimo ngwaawonda.—Ef. 1:15, 16.