Sena Mulaibelesya Kabotu?
1 “Ndilangila kuya kwiibelesya mumuunda.” Mbombubo oobo mbwaakalemba mucizyi uumwi naakamana kubala Ngazi Yamulindizi ya January 1, 2008. Sena mulazilanga-langa zibeela zijanika lyoonse mumagazini yabuleya, alimwi sena mulajana nzila mbomukonzya kuzibelesya kabotu mumulimo wenu wamumuunda?
2 “Nzyotwiiya Kuli Jesu”: Ambweni mwakajana kale kuti cibeela eeci cilamugwasya kutalisya ziiyo zya Bbaibbele. Ikuti naa tamuningacita oobo, amusole kubabalila bamukamwini ŋanda mutwe wacibalo mpoonya amubatondezye Jesu ncaamba kujatikizya kaambo aako kweelana amuncali wakusaanguna mbowaamba. Ikuti naa batondezya luyandisyo kumatalikilo, amusole kuzumanana amubandi kwiinda mukubelesya tutwe twamakani, twalo tutalika amibuzyo iipa kuyeeya. Amubape ciindi cakuvwiila mubuzyo. Amupandulule mubufwaafwi ikuti naa kuli zifwanikiso, mwamana mubale muncali uutobela. Inga mwakonzya kulanga-langa cisela cacibalo mulweendo lwakusaanguna, mpoonya mwaakupilukila inga mwacimanizya. Amulibambile kuyoozumanana aciiyo mubbuku lya Bbaibbele Ncoliyiisya.
3 “Nzila Zikonzya Kupa Mukwasyi Kukkomana”: Eeci cibalo cilembelwa kugwasya balumi, bamakaintu antoomwe abazyali kutegwa babone mbobakonzya kubelesya njiisyo zyamu Bbaibbele mukulwana mapenzi aakonzya kumana luumuno mumukwasyi. Alimwi mulakonzya kuzibelesya zibalo eezyi ikugwasya batali Bakamboni kuti babone busongo bujanwa mu Bbaibbele.—2 Tim. 3:16, 17.
4 Zibeela Zyabana: Izibalo zyakuti “Cibeela Cabana,” zilembedwe munzila iipa sikubala ciindi cakuti ayeeye ncolyaamba Bbaibbele kujatikizya cibalo comwe kucigama. Mulakonzya kuzibelesya kugwasya bakubusi mbomuyaanya mumulimo kuti babone mbocigwasya kwiiya Jwi lya Leza. (Int. 119:9, 105) Ikuti kamukanana abazyali mulakonzya kubatondezya cibeela cakuti “Amubayiisye Bana Benu.” Zibalo eezyi zilakonzya kugwasya bana basyoonto kujana njiisyo ziyandika kuzwa kubantu bamu Bbaibbele. Sena mulajana ciindi cakubala zibalo eezyi abana banu?
5 Zibeela Zimwi: Cibalo cakuti “Basikubala Balabuzya” cilaingula mubuzyo ngobalangilwa kubuzya ibantu batali Bakamboni. Inga mwabatondezya cibalo eeci nomwaabila magazini mumulimo wakuŋanda aŋanda. Cibalo cakuti “Lugwalo Kuzwa Kuli . . .” ncibeela comwe cikondelezya camuntu uuluula kujatikizya buumi bwakwe kumugama, buyumu-yumu mbwajana ambobajana bamisyinali alimwi abamwi mumulimo wabo wakukambauka. Zibalo eezyi zilakonzya kugwasya bantu bajisi luyandisyo kutegwa bazyibe kuti makani mabotu alakambaukwa nyika yoonse mboizulwa, mukuzuzikizya citondezyo cakubako kwa Kristo.—Mt. 24:3, 14.
6 Cibalo cakuti “Amube Acilongwe a Leza,” calo icizwa mucibeela cakubala Bbaibbele camu Cikolo Camulimo Weendelezyegwa a Leza, inga cagwasya bantu babombe myoyo kwiiya zinji kujatikizya Jehova. Cibalo cakuti “Amwiiye Lusyomo Lwabo,” cakalembelwa kugwasya bantu kweezyeezya zibalo zyamu Bbaibbele, calo cipa kuti nzyobakali kusala, buyumu-yumu, alusyomo lwabantu bamu Bbaibbele, zibabotele kubala bantu bamumazuba aano.
7 Elo kaka cilatukkomanisya kutambula Ngazi Yamulindizi iyakabambilwa kubelesya mumuunda! Aboobo, atusoleke kuzizyiba zili mukati akwiibelesya kabotu mumulimo wesu.