Mulimo Wesu Wakukambauka—Ncitondezyo Caluyando Ndotujisi Kuli Leza
1. Ino luyando ndwajisi Jesu kuli Leza lwakamupa kucita nzi?
1 Luyando lwakapa kuti Jesu abeleke mulimo wakukambauka. Tacizumbauzyigwi buya kuti milimo yoonse njaakacita Jesu yakali kutondezya luyando ndwajisi kuli Jehova. Jesu wakaamba kuti: “Nkokuti inyika izibe kuti ndamuyanda Taata, akwalo kuti ndacita mbuli mbwaakandilailila Taata.” (Joh. 14:31) Mbotuli basikutobela mikondo ya Jesu, andiswe tujisi coolwe cakutondezya luyando ndotujisi kuli Leza kwiinda mumulimo wesu wakukambauka.—Mt. 22:37; Ef. 5:1, 2.
2. Ino luyando ndotujisi kuli Jehova lutupa kucita nzi kujatikizya mulimo wesu wakukambauka?
2 “Alilemekwe Izina Lyako”: Notucibelesya cabusungu ciindi cili coonse ncotukonzya kujana cakubandika abantu kujatikizya Jehova alimwi a Bwami bwakwe, tutondezya luyando ndotujisi kuli Leza akutola lubazu mukusalazya zyina lyakwe. (Int. 83:18; Ezk. 36:23; Mt. 6:9) Kweelena ambocakabede kujatikizya mulimo ngwaakali kucita Jesu, mulimo wesu wakukambauka ncitondezyo cakuti tulombozya kuti izyina lya Jehova lisalazyigwe akuti kuyanda kwakwe kucitwe.—Mt. 26:39.
3. Ino muunzila nzi luyando ndotujisi kuli Jehova mbolutugwasya kuzunda mapenzi?
3 Luyando Lutupa Kuzunda Zisinkilizyo: Luyando ndotujisi kuli Jehova lutupa kuzunda zisinkilizyo zili zyoonse. (1 Kor. 13:4, 7) Jesu wakacitikilwa zyintu zinji izyakali kukonzya kumulesya kubeleka mulimo wakwe. Nokuba boobo, ciindi naakali kujana buyumu-yumu, luyando ndwaakajisi alimwi amakanze aakwe aakucita kuyanda kwa Jehova kwakamugwasya kwaazunda mapenzi oonse. (Mk. 3:21; 1 Pet. 2:18-23) Andiswe tulacitikilwa mapenzi manji, nokuba boobo luyando ndotujisi kuli Leza lulatugwasya kwaazunda. Kwiinda mukuzumanana kutobela cikozyanyo ncaakatusiila Kristo, tulakonzya kuba basicamba alimwi akutanyonganizyigwa notuzuzikizya mulimo wesu wakukambauka. Nokuba kuti tulakonzya kunyonganizyigwa akukazyigwa abamumukwasyi, kuciswa-ciswa, kucembaala, nokuba kukazyigwa abantu bamwi, eeci tacitulesyi kutondezya luyando ndotujisi kuli Jehova kwiinda mukuubeleka kabotu mulimo wesu wakukambauka kweelana ambotukonzya.
4. Ino luyando ndotujisi kuli Jehova lutupa coolwe nzi?
4 Luyando ndotujisi kuli Leza lupa kuti tucikonzye kubeleka mulimo wakukambauka amoyo woonse. (1 Kor. 13:13) Mbotuyaabuswena kuciindi izyina lya Jehova noliyoosalazyigwa cakumaninina, ‘luyando lwesu aluzumanane kuvula.’—Flp. 1:9; Mt. 22:36-38.