Ino Ndilili Notweelede Kupilukila Kubantu Batondezya Kuti Balijisi Luyandisisyo?
1. Ino ncinzi ncotweelede kucita kutegwa tugwasye bantu kuba basikwiiya?
1 Kutegwa tugwasye bantu kuba basikwiiya, tweelede kupilukila kumuntu uuli woonse watondezya kuti ulayanda kwiiya kujatikizya Bwami bwa Jehova. (Mt. 28:19, 20) Iciindi cibotu cakupilukila kuya kubona muntu ooyu, kanji-kanji ciya buyo mbuli mbumwamvwana. Ino nkaambo nzi ncotweelede kupilukila cakufwambaana?
2, 3. Ino nkaambo nzi ncotweelede kupilukila cakufwambaana?
2 Ino Nkaambo Nzi Ncotweelede Kupilukila Cakufwambaana? Imulimo wakukambauka “Makani Mabotu aa-Bwami” ulaafwaafwi kumana, alimwi amamanino aabweende bwazyintu oobu aswena. (Mt. 24:14; 1 Pet. 4:7) Aboobo, nobuciliko “buzuba bwalufutuko,” tweelede kutobela malailile aakuti ‘tukambauke makani cakufwambaana,’ eeci cilabikkilizya akupilukila cakufwambaana kuli baabo ibatondezya kuti balayanda kwiiya.—2 Kor. 6:1, 2; 2 Tim. 4:2.
3 Saatani ukanzide kunyonyoona mbuto zya Bwami zyoonse nzyotusyanga mumoyo wamuntu uujisi luyandisisyo. (Mk. 4:14, 15) Kanji-kanji, banamukwasyi, babelesinyina alimwi abantu bamwi buyo balabafwubaazya aabo ibayanda kwiiya. Aboobo, tweelede kupilukila cakufwambaana kutegwa tukazumanane kubandika ambabo kabatana kunyonganizigwa abasikubakazya.
4. Ino ncinzi ncotweelede kucita mukuswaya kwakusaanguna kutegwa tulibambile nyendo yakupilukila?
4 Amupangane Buzuba Aciindi: Kamutanalaya, inga cabota kuti mwapanganina limwi buzuba aciindi nomuya kubandika alimwi. Amubuzye mubuzyo ngomuya kwiingula mwaakupilukila. Cilayandika kapati kulemba makani aajatikizya mubandi wakusaanguna alimwi abubambe bwakupilukila. Ikuti kacikonzyeka inga mwalomba kuti mukabandike alimwi buzuba butobela, naa kakutanainda mazuba manji. Ikuti muntu mwamuswaya kumamanino aansondo alimwi kuti naa ulabeleka mukati kansondo, ndiza inga wayanda kuswaigwa kumamanino aansondo iitobela. Mweelede kucizuzikizya cipangano.—Mt. 5:37.
5. Ino kupilukila cakufwambaana inga kwatugwasya buti kuzuzikizya mulimo ngwaakatupa Jesu iwakugwasya bantu kuba basikwiiya?
5 Tulijisi twaambo tubotu ncotweelede kupilukila cakufwambaana. Aboobo, amupangane amuntu ooyo akupilukila cakufwambaana, nkaambo “ciindi [ciceede] ncifwiifwi.” (1 Kor. 7:29) Ikuti katufwambaana kupilukila kubantu bayanda kwiiya mulumbe wa Bwami, tuya kugwasya bantu banji.