Amubagwasye ‘Amoyo Woonse’ Bantu Mbomuyiisya Bbaibbele
1. Ino ncinzi ncotweelede kucita kutegwa tugwasye muntu ngotuyiisya Bbaibbele?
1 Tatweelede kweendelezya buyo ciiyo ca Bbaibbele lyoonse kutegwa tugwasye sikwiiya Bbaibbele kusika akulyaaba. Mwaapostolo Paulo wakakozyanisya cilongwe ncaakajisi abantu mbaakali kuyiisya kucilongwe cili akati kamutumbu abana bakwe. Andiswe tulalyaaba ‘amyoyo yesu tobeni’ kutegwa tugwasye bantu mbotuyiisya Bbaibbele kuyaambele kumuuya.—1 Tes. 2:7-9.
2. Ino nkaambo nzi ncotweelede kutondezya kuti tulababikkila maano basikwiiya Bbaibbele, alimwi mbuti mbotukonzya kucita boobo?
2 Amubabikkile Maano: Sikwiiya Bbaibbele mbwaya bubelesya zyintu nzyaiya, manjezyeezya aakwe ayoomukulwaizya kuleka kuyanzana abantu batatobeli njiisyo zyamu Bbaibbele. (1 Pet. 4:4) Bamukwasyi wakwe balakonzya kumukaka. (Mt. 10:34-36) Tulakonzya kupa kuti atalendelelwi kwiinda mukumubikkila maano. Mukwesu umwi wabeleka mulimo wabumisyinali kwaciindi cilamfwu wakaamba kuti: “Mutani kufwambaani kulaya mbomwamanina buyo kwiiya. Ikuti kacikonzyeka, amukkale kwaciindi cili mbocibede akubandika.” Amulibambile kumugwasya sikwiiya munzila zimwi. Mucikozyanyo, sena mulakonzya kumutumina luwaile naa kumuswaya ciindi nacisidwe? Ikuti kamukonzya kucita boobo, sena mulakonzya kukkala asikwiiya lyamiswaangano akumugwasyilizya kulanganya bana bakwe?
3. Ino mbuti mbotukonzya kugwasya muntu ngotwiiya limwi Bbaibbele ikugwasyigwa ambungano?
3 Imbungano Mboikonzya Kugwasya: Ikuti kamubelekela kufwaafwi akuŋanda yamuntu ngomwiiya limwi Bbaibbele, mulakonzya kumuswaya kwaciindi cisyoonto kutegwa azyibane abasikumwaya mbomubeleka limwi. Ikuti kacikonzyeka, mweelede kuunka abasikumwaya baindene-indene, kubikkilizya abaalu, nomuunka kuya kweendelezya ciiyo. Mbomwatalisya buyo ciiyo, mweelede kukulwaizya muntu ngomwiiya limwi Bbaibbele kujanika kumiswaangano ku Ŋanda ya Bwami. Ikucita boobo kuya kupa kuti agwasyigwe abalongwe babotu bali mumbungano balo ibakonzya kuba bamukwasyi wakwe wakumuuya.—Mk. 10:29, 30; Heb. 10:24, 25.
4. Ino mbubotu nzi mbotukonzya kujana mumulimo wesu?
4 Imuzyali uuzumanana kugwasya bana bakwe munzila yakumuuya ulakkomana kapati ciindi bana nobasala kubelekela Jehova akweenda mukasimpe. (3 Joh. 4) Andiswe tulakonzya kukkomana ciindi notugwasya basikwiiya Bbaibbele amyoyo yesu yoonse.