Kabbokesi Kamubuzyo

◼ Sena Bakamboni ba Jehova baleelede kumwaya makani aa Bbaibbele aakalekkoodwa naa aakalembwa?

Tulayumizyigwa akukulwaizyigwa amakani aa Bbaibbele aapegwa. (Mil.15:32) Aboobo, tacigambyi kuti tulayanda kwaambila baabo batakajanika twaambo tukulwaizya. Akaambo kakuyaambele kwazyakupanga-panga zyakulekkoodesya, makani alakonzya kulekkoodwa akumwayigwa mukaindi kasyoonto. Bamwi baliyobwede makani aa Bbaibbele aakalekkoodwa kubikkilizya ayaayo aakapegwa myaka minji yainda, alimwi kabajisi makanze mabotu babbweleka bamwi kuti baswiilile naa kwaalekkooda alimwi kutegwa bape beenzinyina. Bamwi bapanga ma Web site a Intaneti akubikka makani kutegwa kufwumbwa uuyanda inga wakkopa.

Kunyina cilubide kuti twalekkooda makani kutegwa katuswiilila tobeni naa bamukwasyi wesu. Kuyungizya waawo, baalu balakonzya kubikka bubambe bwakuti makani kaalekkoodwa akupegwa kuli basimbungano batabukili bulo ibatakonzyi kujanika kumiswaangano. Nokuba boobo, kuli twaambo tulimvwisya ncotuteelede kumwaya makani aa Bbaibbele aakalekkoodwa naa aakalembwa.

Akaambo kakuti makani alapegwa kweelana aziyandika zyakubusena ooko, tulakonzya kutumvwa buteelede twaambo tuli mumakani aakalekkoodwa mbokunga tatuzyi bukkale mbobwakabede ciindi makani naakali kupegwa. Kunze lyaboobo, cilakonzya kutuyumina kuzyiba wakapa makani alimwi akuti ndilili naakapegwa kutegwa tube masimpe kuti twaambo tuli mumakani tuliluzi. (Lk. 1:1-4) Alimwi, kumwaya makani aakalekkoodwa naa akalembwa cilakonzya kupa kuti bamwi batalike kupa naa kutambula bulemu buteelede.—1 Ko. 3:5-7.

Muzike musyomesi uucenjede ulabeleka canguzu kwaabila cakulya cakumuuya “cikkwene” alimwi “aaciindi ceelede.” (Lk. 12:42) Eeci cilabikkilizya abubambe bwakupa makani mumbungano zya Bakamboni ba Jehova azyakuswiilila zyakalekkoodwa zyalo zikonzya kukkopwa kuzwa a Web site ya jw.org. Tulakonzya kusyoma kuti muzike musyomesi uucenjede alimwi a Kabunga kakwe Keendelezya banootwaabila nzyotuyandika kutegwa tuyume mulusyomo.—Mil.16:4, 5.