Amulibambile Kutalisya Ciiyo ca Bbaibbele Lyoonse
1. Ino ncinzi ncotweelede kucita kutegwa tuzuzikizye mulimo ngwaakaamba Jesu kulugwalo lwa Matayo 28:19, 20?
1 Jesu wakatupa mulimo ‘wakuyiisya bantu.’ (Mt. 28:19, 20) Aboobo tweelede kulibambila kutalisya ciiyo ca Bbaibbele lyoonse, ikutali buyo mubuzuba bwakasalilwa limwi bwakutalisya ziiyo zya Bbaibbele. Nzila eezyi zitobela zilakonzya kutugwasya.
2. Ino mbaani mbotukonzya kwaambila kuti tulakonzya kwiiya Bbaibbele ambabo?
2 Amutalisye Ciiyo ca Bbaibbele: Ikuti katwaambila bantu banji kuti tulakonzya kubayiisya Bbaibbele, tulakonzya kuba acoolwe cakutalisya ziiyo zya Bbaibbele zinji. (Muk. 11:6) Sena mwakaisola kale nzila yacigaminina? Imbungano imwi kucisi ca United States yakasoleka canguzu kutobela nzila eeyi kwamwezi woonse. Elo bakakkomana kaka nibakacikonzya kutalisya ziiyo zya Bbaibbele zisika ku 42! Mutayeeyi kuti bantu batondezya luyandisisyo mbomukambaukila balizyi kale kuti mulilyaabide kwiiya Bbaibbele ambabo. Mwaakupilukila, amukabaambile kuti mulakonzya kubayiisya Bbaibbele. Pele kuti bakaka, mutatyompwi. Mulakonzya kuzumanana kubagwasya kuba aluyandisisyo. Sena mwakabaambila kale basimukobonyoko, bamukwasyi wanu, mbomubeleka limwi ambomwiiya limwi kucikolo kuti mulakonzya kubayiisya Bbaibbele? Alimwi mulakonzya kubabuzya mbomwiiya limwi Bbaibbele ikuti naa balijisi beenzyinyina naa bamukwasyi bakonzya kuyanda kwiiya Bbaibbele.
3. Ino ncibelesyo nzi cikonzya kutugwasya kutalisya ziiyo zya Bbaibbele, alimwi ndilili notukonzya kucibelesya?
3 Cibelesyo Cikonzya Kutugwasya: Cibelesyo ciyandika kapati mukutalisya ziiyo zya Bbaibbele nkatulakiti kakuti Sena Mulayanda Kuzyiba Bwiinguzi Bwakasimpe? Mulakonzya kubapa katulakiti aaka bamukamwini ŋanda kufwumbwa naa balatambula mabbuku aamwi naa pe. Katulakiti aaka kalakonzya kubelesyegwa notukambaukila mumasena mucitilwa makwebo, notuli mubukambausi bwamumugwagwa, notutuma magwalo alimwi anotucita nyendo zyakupilukila. Tulakonzya kutusiya amaanda mpotutajani bantu. Amubwezelezye matulakiti aaya nomuli mulweendo, nomuya kwaakuula zyintu alimwi anomuli kumilimo. Peeji lyamamanino lilapandulula mubufwaafwi bubambe bwaciiyo ca Bbaibbele alimwi lilatondezya abbuku lya Bbaibbele Ncoliyiisya.
4. Mbuti mbotukonzya kukabelesya katulakiti kakuti Kuzyiba Bwiinguzi Bwakasimpe kutalisya ciiyo?
4 Mwamana kumutambika katulakiti, mulakonzya kumutondezya mibuzyo iili kumatalikilo apeeji akumubuzya kuti, “Ino mibuzyo iili akati kayeeyi njomwakkomanina?” Mpoonya amubulange bwiinguzi antoomwe mukatulakiti akubala naa kupandulula majwi aali apeeji yamamanino aamba bubambe bwaciiyo ca Bbaibbele. Mwamana inga mwamutondezya makani aamwi aajatikizya mubandi ooyo mpaajanika mubbuku lya Bbaibbele Ncoliyiisya, mpoonya mumwaabile bbuku akupangana buzuba mbomuya kupilukila kutegwa mukazumanane kubandika.
5. Ino nkaambo nzi ncotweelede kulibambila kutalisya ciiyo ca Bbaibbele lyoonse?
5 Bantu ibayanda kuzyiba cini Bbaibbele ncoliyiisya nkobacili mucilawo cesu. Kwiinda mukulibambila kutalisya ciiyo ca Bbaibbele lyoonse, tuyookkomana kugwasya bamwi kujana nzila iitola kubuumi.—Mt. 7:13, 14.