“Maanu Alalulamikwa Kumilimo Yao”
1. Ino bamwi baubona buti mulimo wesu wakukambauka?
1 Zimwi ziindi tulakonzya kutatambulwa kabotu amwini ŋanda akaambo kakuti tatuzyi kabotu naa wakaambilwa zyintu zitaluzi kujatikizya Bakamboni ba Jehova. Ambweni wakayungwa azyintu zitaluzi nzyaakamvwa muli sikapepele. Mumasena amwi batwaamba kuba “kabunga kabukombi kabi.” Ino mbuti mbotweelede kucita ciindi notufwubaazyigwa naa notukazyigwa boobo?
2. Ino ncinzi ciyakutugwasya kutegwa tutatyompwi ciindi notufwubaazyigwa naa notukazyigwa?
2 Amuzumanane Kuzilanga Kabotu Zyintu: Jesu ababelesi ba Jehova bamwi bamumwaanda wamyaka wakusaanguna, bantu tiibakalibazyi kabotu alimwi bakali kubaamba zyintu zibi. (Inc. 28:22) Nokuba boobo, tiibakauleka mulimo wakukambauka akaambo kakukazyigwa naa kufwubaazyigwa. Jesu wakati: “Maanu alalulamikwa kumilimo yao.” (Mt. 11:18, 19) Wakazumanana cabusungu kucita kuyanda kwa Bausyi, kasyomede kuti aabo bayandaula kasimpe bayakwaatambula makani mabotu. Tatukonzyi kutyompwa pe kuti naa twayeeya kuti awalo Mwana wa Leza bakamufwubaazya akumukazya.
3. Ino nkaambo nzi ncotuteelede kugambwa ciindi notukazyigwa akwaambwa zyintu zibi?
3 Jesu wakaamba kuti nyika iyakubasula basikumutobela mbubwenya mbuyakamusulide awalo. (Joh. 15:18-20) Aboobo, tatweelede kugambwa bantu nobatukazya akutwaamba zyintu zibi mazuba aano. Mubwini, zyintu eezyi zilalangilwa kuvwula notuyaabuya kumamanino aanyika alimwi abukali bwa Saatani nobuyaabukomena. (Ciy. 12:12) Tweelede kukkomana akaambo kakuti zyintu eezyi zicitika zitondezya kuti nyika ya Saatani ilaafwiifwi kumana.
4. Ino mbuti mbotweelede kucita kuti naa bantu tiibatuvwiila kabotu ciindi nitukambauka makani mabotu?
4 Amwiingule Cakukkazyika Moyo: Kuti naa tiibatuvwiila kabotu, lyoonse tweelede kwiingula cakukkazyika moyo. (Tus. 15:1; Kol. 4:5, 6) Kuti kacikonzyeka, inga twamupandulwida mwini ŋanda uuyanda kuzyiba masimpe kuti kuli twaambo tunji twakubeja ntobabaamba Bakamboni ba Jehova naa kumubuzya kuti aambe cimupa kulimvwa boobo. Kwiingula cakukkazyika moyo kulakonzya kupa kuti sikukazya ayande kuzyiba bwini kujatikizya Bakamboni ba Jehova alimwi ulakonzya kuswiilila ciindi citobela Kamboni nanga waswaya. Nokuba boobo, ikuti naa mwini ŋanda wanyema, inga cagwasya kuti twazwa buyo kabotu-kabotu. Tulakonzya kuba masimpe kuti kunyina makani ambobatubona bamwi, Jehova ulaukkomanina mulimo wesu.—Is. 52:7.