Kuzwidilila Kuliko Mukutamba Bantu
Kakusyeede nsondo zyotatwe kuti muswaangano wacooko utalike, mbungano ziyootola lubazu mukutamba bantu bajisi luyandisisyo ibali mucilawo kuti bakajanike kumuswaangano. Kuli kaambo kabotu katupa kutamba bantu mwaka amwaka. Aabo bazumina kutambwa akujanika kumuswaangano kanji-kanji balakkomana kapati akaambo kamakani aamu Magwalo, kubona madipatimenti aayendelezyegwa kabotu abasikulisungula, kulilemeka kabotu alimwi alukamantano ndotutondezya. (Int. 110:3; 133:1; Is. 65:13, 14) Pele ino nkuzwidilila kuli buti kujanika mukutamba bantu kumuswaangano, kwaambisya mumasena oomo bantu bajisi luyandisisyo mobeelede kweenda musinzo mulamfwu kutegwa bakajanike?
Nowakamana muswaangano wacooko wamu 2011, ofesi yamutabi yakatambula lugwalo kuzwa kumukaintu umwi iwakajana kapepa kakutamba bantu amulyango wakwe. Bunji bwaziindi wakali kuyuba kuti naa Bakamboni ba Jehova basika aŋanda yakwe. Wakalemba kuti: “Ndakajisi ŋanda mbotu, mulumi uuli kabotu, aboobo ndakali kuyeeya kuti ndilijisi zyintu zyoonse zikonzya kundipa kukkomana. Cuusisya ncakuti, tiindakakkomene pe, alimwi buumi bwangu bwakanyina mpindu. Aboobo ndakayeeya kweenda amootokala wangu musinzo uulampa makilomita aali 320 kutegwa ndikajanike kupulogilamu yamu Mujibelo.” Mukaintu ooyu wakaukkomanina kapati muswaangano cakuti wakatumina mulumaakwe fooni akumwaambila kuti uloona kumuswaangano kutegwa akajanike akupulogilamu yamu Nsondo. “Ndakaaswiilila makani oonse, ndakazyiba Bakamboni ba Jehova banji, alimwi tiindakali kuyanda kuti muswaangano ooyu umane.” Naakapiluka kuŋanda, wakatalika kwiiya mpoonya nikwakainda myezi yone wakaba sikumwaya uutanabbapatizyigwa. “Ndilikkomene kapati kuti ndakajana kapepa aaka kakutamba bantu amulyango wangu nkaambo lino buumi bwangu bulaampindu ncobeni!”
Bantu bamwi ibatambula tupepa twakutamba bantu bayoojanika kumuswaangano. Aboobo, amukatole lubazu cabusungu mumulimo ooyu wakutamba bantu uuyandika kapati. Amukatuletelezye kumuswaangano tupepa twakutamba bantu ituyoocaala, mpoonya amukatubelesye kupa bumboni bwamukwiizya.
[Kabbokesi kali apeeji 1]
Ino Tuyakwaabilwa Buti Tupepa?
Kutegwa tukabape bantu boonse bali mucilawo cesu, tweelede kwaamba buyo mubufwaafwi. Tulakonzya kwaamba boobu: “Mwapona buti? Tutola lubazu mumulimo wakutamba bantu uucitwa nyika yoonse. Nkaaka kapepa nkondiyanda kumupa. Makani manji mulaajana mukapepa aaka.” Amusungwaale. Notwaabila tupepa kumamanino aansondo, tulakonzya kwaabila amamagazini ikuti kacikonzyeka.