Ino Ncinzi Citukulwaizya Kukambauka?
1. Ino luyando alimwi amulimo wesu wakukambauka ziswaangene buti?
1 Kukambauka makani mabotu aa Bwami bwa Leza ngomulimo uulaampindu kapati ngotukonzya kucita mazuba aano. Masimpe, kwiinda mumulimo ooyu, tulatondezya kuti tulaitobela milawo mipati yobilo, nkokuti, mulawo wakuyanda Jehova alimwi awakuyanda basimukoboma. (Mk. 12:29-31) Luyando ncecintu cipati cikonzya kutukulwaizya kuba babelesi basungu.—1 Jo. 5:3.
2. Ino mulimo wesu wakukambauka utondezya buti luyando ndotujisi kuli Jehova?
2 Luyando Ndotujisi Kuli Jehova: Luyando ndotujisi kumulongwe wesu ngotuyandisya kapati, Jehova, lutukulwaizya kumwiiminina. Kwamyaka iibalilwa ku 6,000, wali kubejelezyegwa a Saatani. (2 Ko. 4:3, 4) Aboobo, bantu basyoma kuti Leza ulabasubula basizibi mumulilo wahelo, kuti Leza mbutatu, alimwi akuti tababikkili maano bantu. Alimwi buya banji batalika kuyeeya kuti tako. Eelo kaka tuyanda kuti bantu bazyibe kasimpe kajatikizya Taateesu wakujulu! Kubeleka canguzu nkotucita mumulimo wamumuunda kulamukkomanisya Leza alimwi kupa kuti Saatani acimwe.—Tus. 27:11; Heb. 13:15, 16.
3. Muunzila nzi mulimo wesu wakukambauka moutondezya luyando kuli basimukoboma?
3 Luyando Ndotujisi Kuli Basimukoboma: Kufwumbwa ciindi notukambaukila muntu tutondezya kuti tulamuyanda. Akaambo kakuti tupona muziindi zino zikatazya, bantu bayandika kumvwa makani mabotu. Bantu banji bali mbuli bana Nineve bamuciindi ca Jona ‘ibatakazyi kwiiya kwaandaanya ijanza lyabo lyalulyo ajanza lyabo lyalumwensyi.’ (Jon. 4:11) Mulimo wesu uyiisya bantu mbobakonzya kupona buumi bubotu alimwi bukkomanisya. (Is. 48:17-19) Ubapa bulangizi. (Lom. 15:4) Ikuti naa baswiilila alimwi akutobela nzyobaiya, ‘bayoofwutuka.’—Lom. 10:13, 14.
4. Ino ncinzi ncatakalubi Jehova?
4 Ibana bali kabotu tabalutondezyi buyo muziindi luyando ndobajisi kubazyali babo. Balasoleka kubayanda lyoonse. Mbubwenya buyo, alwalo luyando luyumu ndotujisi kuli Leza alimwi akuli basimukoboma luyootukulwaizya kukambauka kufwumbwa ciindi nokwajanika coolwe, kutali buyo aciindi cibikkidwe. Tuyoozumanana kukambauka cakutaleka. (Mil. 5:42) Jehova kunyina nayooluba luyando luli boobu.—Heb. 6:10.