Amutobele Cikozyanyo Cabasinsimi—Joeli
1. Ino inga twaciiya buti cikozyanyo ca Joeli cakulicesya ciindi notukambauka?
1 Ino musinsimi Joeli wakali ni? Ulyaamba buyo kuti wakali “Joeli mwana wa-Petueli.” (Joel. 1:1) Musinsimi ooyu uulicesya wakakankaizya mulumbe wa Jehova, kutali lubazu ndwaakabeleka mbuli sikutumwa. Mbubwenya buyo, muciindi cakuyanda kutembaulwa naa kuba ampuwo ciindi notuli mumulimo wakukambauka, tuyanda kuti bantu babikkile maano kuli Jehova alimwi aku Bbaibbele. (1 Ko. 9:16; 2 Ko. 3:5) Kuyungizya waawo, tujana nguzu kuzwa mumulumbe ngotwaambilizya. Ino ntwaambo nzi tuli mubusinsimi bwa Joeli itukonzya kupa kuti tube basungu alimwi akuba abulangizi mazuba aano?
2. Ino kuswena afwaafwi kwabuzuba bwa Jehova kweelede kutukulwaizya kucita nzi?
2 “Buzuba Bwa-Jehova Buli Afwaafwi.” (Joel. 1:15): Nokuba kuti majwi aaya akalembwa zyuulu zyamyaka minji yainda, tupona muciindi kuzuzikizyigwa kwangawo nokuli afwaafwi kusika kumamanino. Bukkale bwamunyika ibuyaabwiindila kubija alimwi akutabikkila maano kwabantu kubikkilizya akufwubaazya nkobacita bantu, mbumboni butondezya kuti mazuba aamamanino aabweende bwazyintu oobu bubyaabi aswena afwaafwi. (2 Ti. 3:1-5; 2 Pe. 3:3, 4) Ciindi notuzinzibala kuyeeya kujatikizya mbwaaswena afwaafwi mamanino, tulijisi twaambo tulimvwisya itupa kuti mulimo wakukambauka tuubikke mubusena bwakusaanguna mubuumi bwesu.—2 Pe. 3:11, 12.
3. Nkaambo nzi mulimo wakukambauka ncouyandika kapati mapenzi mapati nayaabuswena afwaafwi?
3 “Jehova Ngemacijilo Aabantu Bakwe.” (Joel. 3:16): Kuteketa ikwaambwa mukapango aaka inga kwajatikizya buyo ciindi Jehova nayoonyonyoona lyamapenzi mapati. Tulaumbulizyigwa kuzyiba kuti Jehova uyakubafwutula babelesi bakwe basyomeka aciindi eeco. (Ciy. 7:9, 14) Ciindi notucita mulimo wakukambauka akubona mbwatuyumya Jehova, lusyomo lwesu lulayuma alimwi tulazumanana kuliyumya, bube ibuyootugwasya lyamapenzi mapati aaboola kumbele.
4. Nkaambo nzi ncotukonzya kukondwa akuba aalusyomo notulangila zyintu ziyoocitika kumbele?
4 Nokuba kuti bantu bamwi baamba kuti mulumbe wa Joeli mulumbe uutapi bulangizi, bantu ba Leza ubapa bulangizi bubotu kapati bwalufwutuko. (Joel. 2:32) Aboobo, atube aalusyomo notulangila zyintu ziyoocitika kumbele alimwi akwaambilizya cabusungu makani mabotu aa Bwami bwa Leza ciindi notutobela majwi aali mulugwalo lwa Joeli 2:23 aakuti: “Amusekelele akukondelelwa Jehova Leza wanu.”