Inzila Nzyomukonzya Kubelesya mu Kukomba Mumukwasyi
1. Ino mabbuku eesu akabambilwa mulimo nzi?
1 Mabbuku eesu manji alijisi makani aakabambilwa kugwasya bana bacili baniini kumvwana abazyali babo alimwi akuba acilongwe a Jehova. (Dt. 6:6, 7) Ino inga mwazibelesya buti nzyomujisi kuyiisya bana banu?
2. Mbuti mbomunga mwasala makani aakwiiya abana banu kweelana amyaka yakuzyalwa njobajisi?
2 Kamucinca-cinca: Mwana umwi aumwi kuli zyintu nzyayandika. (1 Ko. 13:11) Aboobo, mbuti mbomukonzya kusala makani ngomukonzya kubandika abana banu kweelana amyaka yakuzyalwa njobajisi? Amulibuzye kuti: ‘Ino ncinzi cikonzya kubakkomanisya bana bangu? Ino manji buti makani ngobakonzya kwiiya? Ino inga batola ciindi cilamfwu buti kabaswiilila?’ Kubana bajisi myaka yakuzyalwa yotatwe naa iitasiki aawo, mulakonzya kubandika makani aajanika mucibeela cilembedwe kuti “Nzyondiiya Kuzwa mu Bbaibbele” a Web site yesu. Mikwasyi imwi ilakkomana kubandika makani aamu Bbaibbele aali mucibeela cakuti “Amubayiisye Bana Banu.” Alimwi, amulange-lange twaambo tutobela.
3. Ino kukomba mumukwasyi kupa zyoolwe nzi?
3 Mikwasyi iimwi ilibambilila antoomwe miswaangano yambungano. Nokuba kuti kucita boobu cili kabotu, pele tacili ncecintu cilikke ncotukonzya kucita ciindi cakukomba mumukwasyi. Kukomba mumukwasyi takweelede kuba mbuli muswaangano wambungano. Ciindi cakukomba mumukwasyi ceelede kuba ciindi cakubandika akwaamba zili mumoyo wesu. Nceciindi notukonzya kubelesya mizeezo yesu alimwi akuba amibandi iikondelezya. Ikuzyiba mbwalimvwa mwaneesu kujatikizya makani aayandika cili mbuli kulida buci, kuyandika bupampu pele kuli zilongezyo. Ciindi cakukomba mumukwasyi ceelede kuba ciindi cikkomanisya kuli boonse.
4. Mbuti bazyali mbobakonzya kubelesya mizeezo yabo nobalibambila kukomba mumukwasyi?
4 Nobazyali—Amubelesye Mizeezo Yanu: Kuti kamujisi bana bacili baniini, amulange-lange twaambo ootu tutobela:
• Amulibambile cisobano cijatikizya makani aamu Bbaibbele. Mwanaanu ulakonzya kusama mbuli muntu waambwa mu Bbaibbele alimwi akumwiiya muntu ooyo. Mpoonya bamwi inga bamwaamba zyina.
• Amudulowiŋe zifwanikiso zizwa mumabbuku eesu. Kamuyeeya kuti: Zifwanikiso tazijisi majwi, aboobo mulakonzya kubelesya mapeeji aakupenta aamu Sinsimuka! yamu Cingisi. Sena inga mwaabikka mpomukonzya kwaabona muŋanda yanu?
• Amucite zyintu zikonzya kupa kuti bana babelesye mizeezo yabo. Amubalombe kuti baambe mbobakali kupona akulimvwa ba Nowa, Musa, Josefa, Mariya, Petro alimwi abamwi.
• Amubale antoomwe zibalo nzyomwasala.
• Amwiiye kwiimba Nyimbo zya Bwami. Mulakonzya kupanga ncomukonzya kubelesya mukwiimba.
5. Nkaambo nzi bazyali ncobeelede kumulomba Jehova kuti abagwasye kuyiisya bana babo kasimpe?
5 Nobazyali, Jehova uyanda kuti muzwidilile mukukomezya bana banu. Aboobo, amumulombe kuti amugwasye kuyiisya bana banu kasimpe. (Bab. 13:8) Kwiinda mukugwasyigwa a Jehova, mulakonzya kuyiisya bana banu kuti babe ‘basongo kutegwa bakafwutuke kwiinda mulusyomo muli Kilisito Jesu.’—2 Ti. 3:15; Tus. 4:1-4.