Mbotukonzya Kukambauka Kubelesya Twakubikkila Mabbuku

Bukambausi bwakubelesya tutebulu naa twakubikkila mabbuku twakukuba bwazwidilila kapati mukugwasya babombe myoyo kwiiya kasimpe. (Joh. 6:44) Aboobo, baalu bakulwaizyigwa kupanga bubambe bwakukambauka kubuleya mucilawo cambungano ooko bantu banji nkobainda kapati. Mbwaanga itwakubikkila mabbuku twakukuba tatubelesyegwi buyo abusena bomwe, kanji-kanji takuyandiki kulomba kuzumizyigwa kubeendelezi. Ino mbaani beelela kutola lubazu mumulimo ooyu? Basikumwaya bapampu, ibasama cabulemu, alimwi ibacizyi kubandika kabotu. Twaambo tutobela tutondezya ncobeelede kucita alimwi ancobateelede kucita basikumwaya kutegwa bazwidilile.

Ncobeelede Kucita:

Amutondezye muuya wabulongwe alimwi akuyandisisya kugwasya basimweendanzila. Basikumwaya bamwi balamwetamweta akwaanzya cabulongwe. Ikuti umwi walanga amabbuku nayaabwiinda, mulakonzya kwaamba kuti, “Inga mwabweza bbuku lyamukkomanisya.”
Amwiimine abusena bweelede kuzwa waawo mpokabede kakubikkila mabbuku. Mumasena aamwi kwajanika kuti basikumwaya balazwidilila kapati ciindi nobaimina afwaafwi amabbuku. Bamwi baamba kuti nzila eeyi ipa kuti bantu kabawayawaya kwiima, aboobo baimina alaale akulindila kusikila muntu waima aawo mpaabede mabbuku. Kufwumbwa buyo kuti muntu wasika aawo mpaabede mabbuku, amusoleke kubandika anguwe, andiza kwiinda mukubuzya kuti, “Sena kuli nomwakalibuzyide kale mubuzyo ooyu?”
Amulibelesye Bbaibbele bunji bwaziindi.
Amumupandulwide bubambe bwaciiyo ca Bbaibbele muntu uuli woonse wabweza bbuku lyakwiiya lili lyoonse, mbuli bbuku lya Bbaibbele Ncoliyiisya. Amumutondezye kavidiyo kakuti Nkaambo Nzi Ncomweelede Kwiiya Bbaibbele? kubelesya fooni naa kancini kali koonse.
Amulembe makani aajatikizya baabo ibatondezya luyandisisyo kuti kacikonzyeka. Ikuti muntu katakkali mucilawo canu, amulembe foomu ya Amuzumanane a Muntu Ooyu (S-43), akupa mulembi cakufwambaana.